A fosi brifi gi den Korentesma

16 Now mi wani taki fu a moni di unu e piki gi den santawan. Unu kan wroko nanga den srefi rai di mi ben gi den gemeente na Galasia. 2 Ibri fosi dei fu a wiki, ibriwan fu unu musu poti san a man na wan sei, so taki moni no abi fu piki te mi doro. 3 Un musu skrifi mi sortu man unu e fertrow, dan te mi doro drape mi o seni den man dati go na Yerusalem fu tyari a moni di unu gi nanga un heri ati. 4 Ma efu a de fanowdu taki misrefi musu go drape, dan den kan go drape nanga mi.

5 Te mi o psa na ini Masedonia mi o kon na unu, bika mi abi na prakseri fu psa na ini Masedonia. 6 Kande mi o tan nanga unu noso a kan srefi taki mi tan a heri kowru pisi ten fu a yari. Baka dati unu kan tyari mi afpasi awinsi pe mi o go. 7 Bika mi no wani miti unu soso te mi o psa, ma mi wani tan wan pisi ten nanga unu, efu Yehovah* wani. 8 Ma now mi o tan na Efeise teleki a Pinksterfesa. 9 Bika mi kisi wan moi okasi fu du furu wroko, ma furu sma e gens mi.

10 Te Timoteyus kon na unu, un musu horbaka gi en so taki a no abi fu frede noti te a de na un mindri, bika a e du a wroko fu Yehovah* neleki mi. 11 Fu dati ede, no meki nowan sma wiswasi en. Un musu tyari en afpasi èn sorgu taki noti no psa nanga en. Dan a musu kon na mi, bika mi nanga den brada e wakti en.

12 Now mi wani taki fu wi brada Apolos. Mi begi en fu kon na unu makandra nanga den brada. A no ben prakseri fu kon now, ma a o kon te a feni na okasi.

13 Tan na ai, tnapu kánkan na ini a bribi, tyari unsrefi leki mansma* èn kon tranga. 14 Ala sani di unu e du, un musu du nanga lobi.

15 Unu sabi taki na osofamiri fu Stefanas na den fosi sma fu Akaya di kon na ini a bribi èn taki den du ala muiti fu yepi den santawan. Fu dati ede brada nanga sisa, mi wani gi unu a rai disi: 16 Tan saka unsrefi na ondro den sortu sma dati tu èn na ondro ibri sma di e wroko tranga makandra nanga unu. 17 Ma mi breiti taki Stefanas, Fortunatus nanga Akaikus de dyaso, bika den gi wi a yepi di unu ben o gi wi efu unu ben de dyaso. 18 Den gi mi nanga unu krakti baka. Fu dati ede un musu lespeki den sortu sma disi.

19 Den gemeente fu Asia e seni taki unu odi. Akwila nanga Preska èn a gemeente di e kon makandra na ini na oso fu den, e seni wan switi odi gi unu leki bakaman fu Masra. 20 Ala den brada e seni taki unu odi. Gi makandra odi nanga wan bosi.*

21 Mi, Paulus, e seni taki unu odi tu. Na misrefi skrifi disi.*

22 Efu wan sma no lobi Masra, dan meki fluku kon na tapu a sma dati. Grantangi, kon, wi Masra! 23 Meki wi Masra Yesus sori unu bun-ati. 24 Mi lobi un alamala di de wán nanga Krestes Yesus.