Mateyus skrifi en

7 No krutu sma moro, so taki Gado no krutu unu. 2 Bika na a fasi fa unu e krutu trawan, na a srefi fasi dati Gado o krutu unu. Na a fasi fa unu e libi nanga trawan, na a fasi dati den o libi nanga unu tu. 3 Fu san ede yu e luku a fini pisi udu na ini yu brada ai, ma yu no e si a postu na ini yu eigi ai? 4 Noso fa yu kan taigi yu brada: ’Kon meki mi puru a fini pisi udu na ini yu ai’, aladi wan postu de na ini yu eigi ai? 5 Hoigriman! Puru a postu na ini yu eigi ai fosi, dan yu o si krin fa yu kan puru a fini pisi udu na ini yu brada ai.

6 No gi den dagu santa sani èn no trowe un parel* gi den agu, noso den o masi den parel nanga den futu èn den o drai kon baka fu priti unu pispisi.

7 Tan aksi, dan unu o kisi. Tan suku, dan unu o feni. Tan naki na tapu a doro, dan a doro o opo gi unu. 8 Bika a sma di e aksi, o kisi. A sma di e suku, o feni. A sma di e naki na tapu a doro, a doro o opo gi en. 9 Iya, suma fu unu o gi en pkin wan ston, te a e aksi en brede? 10 Noso kande te a e aksi en wan fisi, a no o gi en wan sneki tòg? 11 Fu dati ede, efu unu di abi takru fasi, man gi un pkin bun sani, dan unu kan de seiker taki un P’pa di de na hemel o gi sma bun sani te den e aksi en!

12 Fu dati ede, ala sani di unu wani meki sma du gi unu, na dati un musu du gi den tu. Fu taki en leti, disi na san a Wet nanga den leri fu den Profeiti wani taki.

13 Psa go na ini a smara doro, bika a pasi di e tyari sma go dede bradi èn a bigi. Furu sma e waka a pasi dati. 14 Ma a doro di e tyari sma go na libi pkin èn a pasi fu en smara. Wan tu sma nomo e feni en.

15 Luku bun nanga den falsi profeiti. Den e kon na unu leki skapu, ma na ini den ati den na ogri busdagu. 16 Na den froktu fu den, unu o si suma na den. Sma no e piki droifi noso figa fu makabon tòg? 17 Ibri bun bon e meki bun froktu, ma ibri siki bon e meki froktu di no bun. 18 Wan bun bon no kan meki froktu di no bun èn wan siki bon no kan meki bun froktu. 19 Ibri bon di no e meki bun froktu musu koti trowe èn iti go na ini faya. 20 Sobun, na den froktu fu den, unu o man si suma na den sma dati trutru.

21 A no ala sma di e taigi mi: ’Masra, Masra’, o go na ini a Kownukondre fu hemel. Ma na soso den sma di e du a wani fu mi P’pa na hemel o go na ini. 22 Furu sma o taigi mi na a dei dati: ’Masra, Masra, a no na ini yu nen wi ben taki profeititori? A no na ini yu nen wi ben puru ogri yeye na sma tapu? A no na ini yu nen wi ben du furu bigi wondru?’ 23 Tòg mi o taigi den krin: ’Mi no sabi unu! Un kmoto na mi tapu, un takr’ati sma.’

24 Fu dati ede, efu wan sma yere den sani disi di mi taki èn a e du den, dan a o de leki wan koni man di bow en oso na tapu ston-gron. 25 Alen fadon, bigi frudu kon, winti wai èn a naki na oso bun tranga, ma na oso no fadon bika a ben bow na tapu ston-gron. 26 Efu wan sma yere den sani disi di mi taki èn a no e du den, dan a o de leki wan don man di bow en oso na tapu santi. 27 Alen fadon, bigi frudu kon, winti wai èn a naki na oso bun tranga. Ne na oso fadon broko èn noti fu en no tan abra.”

28 Di Yesus kba taki den sani disi, ala den sma ferwondru fu a fasi fa a ben gi leri. 29 Bika a ben e gi den leri leki wan sma di kisi makti fu Gado. A no ben e gi leri leki den leriman fu a Wet.