Yohanes skrifi en

12 Siksi dei fosi a Paskafesa, Yesus doro na Betania pe Lasarus ben e tan. Na a man disi Yesus ben gi wan opobaka. 2 Na neti den ben sreka wan n’nyan gi Yesus drape. Marta ben e tyari n’nyan gi den èn Lasarus ben de wan fu den sma di ben e sdon nyan nanga Yesus na tafra. 3 Ne Maria teki sowan afu liter* switismeri oli. A ben de echte nardus-oli di diri srefsrefi. A kanti en na tapu Yesus futu, dan a drei en futu nanga en ede-w’wiri. A switi smeri fu na oli panya na ini a heri oso. 4 Ma Yudas Iskariot, a disipel di ben o seri en, taki: 5 „Fu san ede wi no seri a switismeri oli disi gi 300 solfru moni,* so taki wi kan gi a moni dati na den pôtisma?” 6 A no ben taki disi fu di a ben e broko en ede nanga den pôtisma, ma na fu di a ben de wan fufurman èn a monikisi ben de na en. A ben gwenti fufuru a moni di den ben poti na ini a kisi. 7 Dan Yesus taki: „Libi en. Meki a sreka mi skin gi a dei te den o beri mi. 8 Bika den pôtisma de nanga unu ala ten, ma mi no o de nanga unu ala ten.”

9 Wan lo Dyu ben kon sabi taki Yesus ben de drape. Dati meki den kon drape tu. Ma den no ben kon fu si Yesus w’wan. Den ben wani si Lasarus tu, a man di Yesus ben gi wan opobaka. 10 Dati meki den edeman fu den priester go taki nanga makandra fa den ben kan kiri Lasarus tu. 11 Bika furu fu den Dyu ben go drape, fu di den bigin bribi na ini Yesus èn den ben wani si Lasarus.

12 A tamara fu en, den sma di ben kon na a fesa yere taki Yesus ben de na pasi e kon na Yerusalem. 13 Dati meki den teki taki fu den palmbon èn den waka go miti en. Den bigin bari: „Wi e begi yu, tyari ferlusu kon! Blesi fu a sma di e kon na ini a nen fu Yehovah,* a Kownu fu Israel!” 14 Dan Yesus feni wan yongu buriki èn a go sdon na en tapu, bika na ini Gado Buku skrifi: 15 „No frede, umapkin fu Sion. Luku! A kownu fu yu e kon èn a e sdon na tapu a pkin fu wan buriki.” 16 Na ini a bigin den disipel fu en no ben ferstan den sani disi. Ma di Yesus kisi glori, den memre taki den sani di den sma du ben de precies san Gado Buku ben taki fu en.

17 Den sma di ben de nanga Yesus di a kari Lasarus kmoto na ini a grebi* ben e ferteri na ala sei taki Yesus gi Lasarus wan opobaka. 18 Di den sma yere taki Yesus du a wondru disi, den waka go miti en. 19 Fu dati ede den Fariseiman taigi makandra: „Yu no si taki wi no man du noti? Luku! Heri grontapu e waka na en baka.”

20 Wan tu Grikisma ben kon na a fesa tu fu anbegi Gado. 21 Ne den go na Filipus di ben de fu Betsaida na ini Galilea. Den taigi en: „Brada, wi wani si Yesus.” 22 Filipus go taigi Andreas. Ne Andreas nanga Filipus go taigi Yesus.

23 Ma Yesus piki den: „A yuru doro taki a Manpkin fu libisma musu kisi glori. 24 Bribi mi: Efu wan siri aleisi no fadon na gron èn a no dede, a e tan wán siri nomo. Ma efu a dede, a o gi furu n’nyan. 25 A sma di lobi en libi,* o lasi en, ma a sma di no lobi en libi na ini a grontapu disi, o kibri en fu kan kisi têgo libi. 26 Efu wan sma wani de mi futuboi, meki a waka na mi baka. Pe mi de, na drape mi futuboi o de tu. Efu wan sma wani de mi futuboi, dan a P’pa o gi en grani. 27 Now a hebi gi mi* trutru, ma san mi musu taki? Mi P’pa, puru mi na ini a nowtu disi. Ma tòg mi musu psa a muilek ten disi, bika na fu dati ede mi kon. 28 Mi P’pa, gi yu nen glori.” Ne wan sten kmopo fu hemel. A taki: „Mi ben gi mi nen glori kba èn mi o gi en glori baka.”

29 Di den sma di ben e tnapu drape, yere disi, den taki dati na dondru bari. Trawan taki: „Wan engel taki nanga en.” 30 Yesus piki den: „A no fu mi ede a sten disi taki, ma na fu unu ede. 31 Now Gado o krutu grontapu èn a o yagi a tiriman fu a grontapu disi. 32 Ma te mi opo gwe fu grontapu, mi o hari ala sortu sma kon na mi.” 33 A ben taki disi fu sori den na sortu fasi a ben o dede syatu baka dati. 34 Ne den sma piki en: „A Wet leri wi taki Krestes e tan fu têgo. Dan fa yu kan taki dati a Manpkin fu libisma o opo gwe fu grontapu? Suma na a Manpkin fu libisma?” 35 Fu dati ede Yesus taigi den: „A leti o de nanga unu pkinso ete. Waka na ini a leti, solanga a leti de nanga unu ete, so taki a dungru no tapu unu. A sma di e waka na ini a dungru no sabi pe a e go. 36 Solanga a leti de nanga unu, un musu bribi na ini a leti, so taki unu tron manpkin fu a leti.”

Baka di Yesus taki disi, a gwe go kibri gi den. 37 Aladi a du someni wondru na den fesi, tòg den no ben bribi na ini en. 38 Na so den wortu fu a profeiti Yesaya ben kon tru. A ben taki: „Yehovah,* suma e bribi a sani di den yere fu wi?* Suma si a krakti* fu Yehovah?”* 39 Den no ben bribi, bika Yesaya ben taki tu: 40 „A breni den ai fu den èn a meki den ati kon tranga, so taki den no o man si nanga den ai èn den no o man ferstan nanga den ati. Dati meki den no o drai kon baka èn mi no o meki den kon betre.” 41 Yesaya ben taki den sani disi fu di a ben si a glori fu Krestes èn a ben taki fu en tu. 42 Tòg furu heihei man ben e bribi na ini Krestes. Ma den no ben wani taki disi krin fu di den ben frede taki den Fariseiman ben o yagi den puru na ini a snoga. 43 Den ben lobi a grani di den ben e kisi fu libisma moro leki a grani di den ben kisi fu Gado.

44 Ma Yesus taki nanga wan tranga sten: „A sma di e bribi na ini mi, no e bribi na ini mi w’wan, ma a e bribi tu na ini a sma di seni mi kon. 45 A sma di si mi, si a sma tu di seni mi kon. 46 Mi kon leki wan leti na grontapu, so taki ala sma di e bribi na ini mi, no o tan na ini a dungru. 47 Ma awinsi wan sma yere san mi taki èn a no e du en, tòg mi no o krutu en. Bika mi no kon fu krutu grontapu. Mi kon fu ferlusu grontapu. 48 Wan sma di no abi lespeki gi mi èn di no e bribi san mi taki, o kisi krutu. Den sani di mi taki o krutu en na a lasti dei. 49 Bika mi no taki san mi srefi e prakseri. Na mi P’pa di seni mi kon, taigi mi san mi musu taki èn san mi musu leri sma. 50 Mi sabi tu taki den sani di a taki e meki sma kisi têgo libi. Fu dati ede, te mi e taki, mi e taki soleki fa a P’pa taigi mi.”