Gi den Hebrewsma

9 Na ini a fosi ferbontu sani ben seti di ben e sori fa a santa wroko ben musu du èn taki wan santa presi ben musu de na grontapu. 2 Di den meki a fosi pisi fu a tenti, den kari en a Santa Presi. Drape yu ben abi a kandratiki, a tafra nanga den brede di den ben poti na fesi Gado. 3 Ma baka a di fu tu garden, a tenti ben abi wan pisi di den ben e kari a Moro Santa Presi. 4 Drape yu ben abi wan gowtu patu fu bron switismeri, nanga a santa kisi fu a ferbontu di ben tapu nanga gowtu. Na ini a santa kisi yu ben abi wan gowtu watrakan di ben abi mana na ini, a tiki fu Aron di ben meki bromki, nanga den plata ston fu a ferbontu. 5 Na tapsei fu a santa kisi yu ben abi den moi kerub-engel. A skaduw fu den ben e tapu a deksel* fu a santa kisi. Ma now a no a ten fu taki finfini fu den sani disi.

6 Baka di den sani disi meki, den priester ben abi a gwenti fu go na ini a fosi pisi fu a tenti fu du santa wroko. 7 Ma wán leisi ini a yari a granpriester w’wan e go na ini a di fu tu pisi fu a tenti. A musu tyari brudu di a e gi leki ofrandi gi ensrefi èn gi den sondu di a pipel du sondro fu den sabi. 8 Na so a santa yeye e sori krin taki di a fosi tenti ben de ete, a pasi no ben opo ete fu go na ini a santa presi. 9 A tenti disi e sori san ben o psa na ini a ten disi. Na a srefi seti disi e meki taki sma e tyari kado nanga srakti-ofrandi. Ma den sani disi no man meki a sma di e du santa wroko, kisi wan krin konsensi. 10 Den kado nanga den ofrandi disi abi fu du nanga sani di sma e n’nyan èn e dringi. Den abi fu du tu nanga difrenti fasi fa den ben meki libisma nanga tra sani kon krin.* Soleki fa a Wet ben sori, dan den sani disi ben de fanowdu, ma den ben abi fu du nomo nanga a skin. Sma ben de ferplekti fu du den teleki a ten ben doro fu meki sani kon bun baka.

11 Ma di Krestes kon leki wan granpriester di ben musu meki wi kisi ala den bun sani di wi e si now, dan a psa go na ini a moro bigi tenti di moro bun èn di no meki nanga anu. A tenti disi no meki dyaso na grontapu. 12 Di a go na ini a santa presi, a no go nanga a brudu fu bokoboko èn nanga a di fu yongu mankaw, ma nanga en eigi brudu. A du disi wán leisi nomo fu ala ten èn a meki taki wi kisi têgo ferlusu. 13 Efu a brudu fu bokoboko nanga mankaw èn na asisi fu wan yongu kaw di den ben e it’iti na tapu den sma di no krin, ben meki den sma disi kon krin na ini Gado ai, 14 dan a brudu fu Krestes man du dati moro srefi. Di Krestes gi ensrefi na Gado, a yeye di e tan fu têgo ben e tiri en èn a no ben abi fowtu. A brudu fu en o krin a konsensi fu wi, so taki wi no du sani moro di e tyari dede kon. Na so wi kan du santa wroko gi a libilibi Gado.

15 Na fu dati ede Krestes na wan mindriman fu wan nyun ferbontu, so taki den sma di Gado kari kan kisi têgo libi soleki fa Gado ben pramisi. A dede fu en meki taki wan lusu-paiman pai gi den sma disi, so taki den ben kan kon fri fu den sondu di den ben du di a fosi ferbontu ben de ete. 16 Bika efu wan ferbontu meki, dan a libisma di meki a ferbontu musu dede fosi, 17 fu di wan ferbontu e wroko, baka te a sma di meki a ferbontu dede.* Te a sma di meki a ferbontu de na libi ete a ferbontu disi no e wroko. 18 Fu dati ede brudu ben de fanowdu tu fu meki a fosi ferbontu bigin wroko. 19 Bika di Moses ferteri a heri pipel ala den sani di skrifi na ini a Wet, a teki a brudu fu yongu mankaw èn fu bokoboko, dan a moksi en nanga watra. Dan nanga wan pisi redi krosi di a ben tai na wan taki fu wan hisop-bon a natnati a buku* fu a ferbontu èn a natnati a heri pipel tu. 20 A taki: „Disi na a brudu fu a ferbontu di Gado ben taigi unu fu hori.” 21 Baka dati a teki a brudu, dan a natnati a tenti nanga ala den patu nanga koba di den ben e gebroiki fu du santa wroko. 22 Ja, soleki fa a Wet e taki, dan bijna ala sani e kon krin nanga brudu èn efu brudu no kanti trowe, dan sma no man kisi pardon.

23 Dati meki a ben de fanowdu fu krin den sani disi nanga a brudu fu meti di sma tyari leki ofrandi. Den sani disi ben de wan eksempre fu den sani di de na hemel. Ma den sani na hemel musu kon krin nanga ofrandi di betre omeni tron moro den ofrandi dati. 24 Bika Krestes no go na ini wan santa presi di meki nanga anu èn di de wan prenki fu a trutru santa presi. Ma now a go na ini hemel srefi fu go na fesi Gado gi a bun fu wi. 25 A no du disi fu gi ensrefi leki wan ofrandi ibri leisi baka, soleki fa a granpriester e go na ini a santa presi ibri yari baka nanga brudu di no de fu en. 26 Noso Krestes ben o abi fu pina furu leisi sensi a ten di grontapu seti. Ma now a sori ensrefi wán leisi nomo na a kba fu a ten disi,* fu puru sondu nanga yepi fu en eigi libi di a gi leki wan ofrandi. 27 Neleki fa ala libisma e dede wán leisi nomo èn neleki fa den o kisi krutu baka dati, 28 na so Krestes gi ensrefi tu leki wan ofrandi wán leisi nomo, fu tyari den sondu fu furu sma. Te a o kon a di fu tu leisi, a no o kon fu puru sondu, ma fu ferlusu den sma di e howpu fayafaya na en tapu.