A fosi brifi fu Petrus
1 Disi na wan brifi fu Petrus, wan apostel fu Yesus Krestes. A brifi disi na gi unu alamala di kisi wan kari fu Gado èn di e libi fu wan pisi ten na difrenti presi na ini Pontus, Galasia, Kapadosia, Asia nanga Bitinia. 2 Gado, wi P’pa na hemel, ben sabi kba taki a ben o kari unu. A kari unu èn a gebroiki en yeye fu meki unu kon santa. Na so unu kan du a wani fu en èn unu kan kon krin nanga a brudu fu Yesus Krestes.*
Meki Gado sori unu moro bun-ati èn meki a gi unu moro freide.
3 Prèise a Gado nanga a P’pa fu wi Masra Yesus Krestes fu di a abi furu sar’ati nanga wi. A meki wi gebore baka, so taki wi kan abi wan howpu di no e lasi gwe. Wi abi a howpu disi fu di a gi Yesus Krestes wan opobaka. 4 Gado gi unu wan gudu di no man pori, di no doti èn di no o lasi gwe. A gudu disi de na hemel gi unu. 5 Gado e kibri unu nanga en krakti fu di unu abi bribi. A e kibri unu, so taki unu kan kisi ferlusu na ini den lasti dei.* 6 Dati meki unu e prisiri srefsrefi, awinsi unu e sari fu wan syatu pisi ten fu di difrenti tesi e miti unu. 7 Den tesi disi o tranga un bribi di warti moro gowtu di kan lasi gwe, awinsi sma bron en na ini faya fu krin en. Dati meki sma o prèise unu èn den o gi unu glori nanga grani te Yesus Krestes sori ensrefi. 8 Noiti unu no si Krestes, ma tòg unu lobi en. Awinsi unu no e si en now, tòg unu e bribi na ini en. Unu breiti srefsrefi èn unu e prisiri psa marki 9 fu di unu sabi taki a bribi fu unu o meki taki unu kisi ferlusu.
10 Den profeiti ben taki na fesi dati Gado ben o sori unu bun-ati na a fasi disi. Den ben e ondrosuku sani finfini èn den ben e du ala muiti fu kon sabi moro fu a fasi fa Gado ben o ferlusu unu. 11 A santa yeye ben sori den profeiti na fesi taki Krestes ben o pina èn taki a ben o kisi glori baka dati. Dati meki den tan du muiti fu kon sabi san ben o psa nanga Krestes èn o ten dati ben o psa. 12 Gado ben sori den taki den sani di den ben skrifi no ben de gi den srefi, ma den ben skrifi den fu yepi unu. Na den sani disi unu e yere now fu den sma di ferteri unu a bun nyunsu. Den du disi fu di den kisi yepi fu a santa yeye di e kon fu hemel. Srefi den engel e angri fu kon sabi den sani disi di skrifi.
13 Fu dati ede un musu sreka unsrefi* fu wroko tranga. De nanga krin ferstan ala ten. No fergiti a bun di Gado o du gi unu te Yesus Krestes sori ensrefi. 14 Fosi, unu ben meki takru lostu basi unu fu di unu no ben sabi noti fu Gado. Ma now unu kon de Gado pkin èn unu e du san a taki. No meki den takru lostu basi unu moro. 15 Na presi fu dati un musu kon santa na ini ala san unu e du, neleki a Santawan di kari unu. 16 Bika Gado Buku taki: „Un musu de santa, bika mi na wan santa Gado.”
17 Wi P’pa na hemel no e teki sei te a e koti krutu èn a e strafu ibri sma gi den sani di den e du. Efu unu e kari Gado un P’pa, dan meki den sani di unu e du sori taki unu abi bigi lespeki gi en na ini a pisi ten di unu e libi dya. 18 Unu sabi taki di a ferlusu unu* fu a soso fasi fu libi di unu ben teki abra fu den afo fu unu,* a no pai nanga solfru, gowtu noso tra sani di man pori. 19 Ma a ferlusu unu nanga a brudu fu Krestes. A brudu disi warti srefsrefi, neleki a brudu fu wan pkin skapu di no abi nowan mankeri noso flaka. 20 Fosi grontapu ben seti* Gado ben sabi kba san Krestes ben o du. Ma Krestes sori ensrefi na ini den lasti dei fu yepi unu. 21 Na en meki taki unu e bribi na ini Gado di gi en wan opobaka èn di gi en glori. Na so unu kan bribi èn howpu tapu Gado.
22 Fu di unu e hori unsrefi na a tru leri, meki unu krin un libi èn unu kon lobi makandra leki brada nanga sisa, sondro fu hoigri. Ma now un musu du ala muiti fu lobi makandra moro.* 23 Bika unu gebore baka fu di unu kmoto fu wan siri di no man pori.* A no de leki tra siri di e pori. Un gebore baka nanga yepi fu a wortu fu a libilibi Gado di e tan fu têgo. 24 Gado Buku e taki dati ’ala libisma de leki grasi èn a moi fu den de leki bromki di e gro na den weigron. A grasi e kon drei èn a bromki e fadon, 25 ma den sani di Yehovah* taki* e tan fu ala ten.’ We, den „sani di a taki”* na a bun nyunsu di sma ferteri unu.