Numeri

25 Di den Israelsma ben e tan na Sitim, dan den du hurudu nanga den uma fu Moab. 2 Te den uma ben e tyari ofrandi gi den gado fu den, dan den ben kon kari a pipel fu nyan den ofrandi makandra nanga den. A pipel ben e go nyan nanga den èn den ben e boigi gi den gado fu den uma disi. 3 Na so Israel bigin anbegi a Bâal fu Peor. Ne Yehovah en ati bron nanga Israel srefisrefi. 4 Yehovah taigi Moses: „Grabu ala den edeman fu a pipel. Kiri den èn anga den na postu na ini a son na fesi Yehovah, so taki Yehovah ati no bron nanga Israel moro.” 5 Dan Moses taigi den krutuman fu Israel: „Ibriwan fu unu musu kiri den man di anbegi a Bâal fu Peor.”

6 Ne wan man fu Israel tyari wan uma fu Midian kon na ini a kampu fu den Israelsma, leti na fesi Moses nanga den tra Israelsma. Den ben e krei ete na a mofodoro fu a konmakandra-tenti. 7 Drape yu ben abi Pinehas tu di ben de a manpikin fu Eleasar èn a granpikin fu Priester Aron. Di a si san ben e pasa, dan wantewante a opo teki en lansri, 8 dan a go na ini a tenti pe na Israel man ben de. Ne a dyuku den ala tu kiri. A dyuku a man fu Israel èn a dyuku na uma na en syenpresi. A sani disi meki taki Gado tapu nanga a strafu di a ben e strafu den Israelsma. 9 Tutenti na fo dusun sma dede di Gado strafu den.

10 Dan Yehovah taigi Moses: 11 „Pinehas di de a manpikin fu Eleasar èn a granpikin fu Priester Aron, meki taki mi ati no e bron moro nanga den Israelsma. Mi no kiri den alamala, fu di Pinehas no gi pasi taki den anbegi tra gado boiti mi. Mi wani taki sma anbegi mi wawan. 12 Dati meki yu musu taigi en taki mi o meki wan frubontu nanga en fu du bun gi en. 13 A frubontu disi o meki taki en nanga den bakapikin fu en o de priester ala ten. A no gi pasi taki sma anbegi tra gado boiti a Gado fu en. Dati meki mi kon bun baka nanga den Israelsma.”

14 A nen fu na Israel man di Pinehas kiri makandra nanga na uma fu Midian, ben de Simri. A ben de a manpikin fu Salu èn na edeman fu wan famiri na ini a lo fu Simeon. 15 A nen fu a Midian uma di Pinehas kiri, ben de Kosbi. A ben de na umapikin fu Sur, na edeman fu den famiri na ini wan lo fu Midian.

16 Bakaten, Yehovah taigi Moses: 17 „Un musu go feti nanga den Midiansma èn un musu kiri den, 18 bika den meki rampu miti unu di den kori unu na Peor. Den ben seni Kosbi, na umapikin fu wan edeman na ini Midian, fu kori unu. En na a Midian uma di dede na a dei di mi strafu unu gi den sani di pasa na Peor.”