Gi den Romesma

7 Mi brada, na sabi unu no sabi taki a Wet na basi fu wan sma solanga a sma de na libi? (Mi e taki nanga den wan di sabi a Wet.) 2 Fu eksempre, a Wet e sori taki te wan frow trow, a tai na en masra solanga a masra de na libi. Ma efu en masra dede, a no abi fu hori ensrefi moro na den wet fu en masra. 3 Dati meki te a frow ben o trow nanga wan tra man, aladi en eigi masra de na libi ete, dan sma ben o taki dati a e waka gi en masra. Ma te a masra fu en dede, a frow no abi fu hori ensrefi na den wet fu en masra moro. Èn te a frow trow nanga wan tra man, dan a no waka gi en masra.

4 Na so a de tu nanga unu, mi brada. A ben de neleki unu ben trow nanga a Wet. Ma fu di Krestes gi en skin leki wan ofrandi, meki a trow dati no e teri moro. Now unu kon de fu Krestes di kisi libi baka. Dati meki wi musu du sani di Gado lobi. 5 Di wi ben e libi soleki fa wi skin wani, dan a Wet ben tyari kon na krin taki den takru lostu ini wi skin* e meki wi sondu èn taki sondu ben o meki wi dede te fu kba. 6 Ma now wi no abi fu hori wisrefi na a Wet moro, bika wi kon fri fu a Wet di ben basi wi. Dati meki wi no musu de srafu moro fu na owru Wet di ben skrifi, ma wi musu tron srafu di a santa yeye e tiri.

7 San wi sa taki dan? A Wet na sondu? Kwetkweti! Mi no ben o sabi san na sondu efu a Wet no ben de. Fu eksempre, mi no ben o sabi san na big’ai efu a Wet no ben taki: „Un no musu abi big’ai.” 8 Ma a Wet meki mi kon sabi san na sondu trutru. A meki mi si taki mi abi ala sortu big’ai èn taki dati na wan sondu. Sondro a Wet mi no ben o sabi san na sondu. 9 Fu taki en leti, sondro a Wet mi ben e libi nomo. Ma di a Wet doro, mi kon sabi san na sondu. Na so mi kon sabi tu taki mi o dede. 10 Mi kon si tu taki a Wet di ben musu tyari libi kon, tyari dede kon. 11 Bika a Wet sori mi san na sondu. A sori mi tu taki sondu kori mi èn taki a kiri mi. 12 Sobun, a Wet srefi santa èn den sani di skrifi na ini a Wet disi santa, den soifri èn den bun.

13 Ma a de so dan taki wan bun sani tyari dede kon gi mi? Kwetkweti! Na sondu tyari dede kon gi mi. Sondu gebroiki wan bun sani fu tyari dede kon gi mi, so taki a ben o kon na krin san na sondu. Ja, a Wet e sori krin taki sondu na wan bun ogri sani. 14 Wi sabi taki a Wet kmoto fu Gado. Ma mi na wan sondu sma, wan srafu fu sondu. 15 Mi no man ferstan fu san ede mi e tyari misrefi na so wan fasi. Bika san mi wani du, mi no e du, ma san mi no lobi srefsrefi, na dati mi e du. 16 Ma efu mi e du san mi no wani du, dan disi e sori taki mi e agri taki a Wet bun. 17 Now a no mi e du den sani disi moro, ma na a sondu di de na ini mi. 18 Bika mi sabi taki nowan bun sani de na ini mi, dati wani taki na ini mi skin. Mi wani du san bun, ma mi no man du en. 19 A bun di mi wani du, mi no e du, ma na ogri di mi no wani du, na dati mi e du. 20 Efu mi e du a sani di mi no wani du, dan a no mi e du a sani disi moro, ma na a sondu di de na ini mi.

21 Mi kon si taki disi na a wet di de na ini mi: Te mi wani du bun, dan ogri de na ini mi. 22 Na ini mi ati mi e prisiri trutru nanga a wet fu Gado, 23 ma mi e si taki wan tra wet de na ini mi skin* èn a e feti nanga a wet fu mi ferstan. A wet dati na a sondu di de na ini mi skin* èn a e basi mi. 24 Tye pôti fu mi! Suma o ferlusu mi fu a skin disi di e tyari mi go dede? 25 Mi e taki Gado tangi taki a ferlusu mi nanga yepi fu wi Masra Yesus Krestes! Sobun, nanga mi ferstan mi na wan srafu fu a wet fu Gado, ma nanga mi skin mi na wan srafu fu sondu di de leki wan wet na ini mi skin.