Gi den Romesma

6 San wi sa taki dan? Wi o tan du sondu, so taki Gado kan sori wi moro bun-ati? 2 Kwetkweti! Now di wi kon fri fu sondu, dan fa wi kan tan libi na ini sondu? 3 Unu no sabi taki wi alamala di dopu èn di de wán nanga Krestes Yesus now, dopu fu dede tu neleki en? 4 Fu di wi dopu fu dede neleki en, meki Gado beri wi tu nanga en. Dati meki wi musu libi wan nyun libi neleki fa Krestes e libi wan nyun libi, baka di a P’pa gi en libi baka nanga a bigi krakti fu en. 5 Wi de wán nanga en fu di wi o dede leki en èn te wi kisi libi baka neleki en, dan wi o de wán nanga en tu. 6 A sma di wi ben de fosi spikri makandra nanga Krestes na wan postu. Dati meki wi sondu skin no musu basi wi moro èn wi no musu de srafu fu sondu moro. 7 Bika te wan sma dede, dan a no abi fu pai moro gi* den sondu fu en.

8 Boiti dati, efu wi dede nanga Krestes, wi e bribi taki wi o libi nanga en tu. 9 Bika wi sabi taki now di Krestes kon na libi baka, a no o dede moro. Dede no man basi en moro. 10 Bika di a dede, a dede wán leisi nomo fu puru sondu fu ala ten. Ma now di a e libi, a e libi gi Gado. 11 Na so a de tu nanga unu. Unu no musu de sma moro di e libi gi sondu. Ma unu na sma di e libi gi Gado nanga yepi fu Krestes Yesus.

12 Fu dati ede, no meki sondu tiri leki kownu moro na ini un skin di o dede gwe. No du san a sondu skin wani. 13 No gebroiki un skin* tu fu du sondu. No gebroiki en leki wan fetsani fu du ogri. Ma gi unsrefi abra na Gado leki sma di kon na libi baka. Gebroiki un skin* fu du san Gado wani. Gebroiki en leki wan fetsani fu du bun. 14 Unu no abi fu hori unsrefi na a Wet moro, fu di Gado sori unu bun-ati. Dati meki un no musu meki sondu basi unu.

15 San dati wani taki dan? Wi o du wan sondu fu di wi no abi fu hori wisrefi na a Wet moro èn fu di Gado sori wi bun-ati? Kwetkweti! 16 Unu sabi taki efu ala ten unu e du san wan sma e taki, dan unu na en srafu. Sobun, efu unu na srafu fu sondu, unu o dede. Ma efu unu na srafu fu Gado èn unu e gi yesi na en, dan unu o de ret’ati sma. 17 Ma mi e taki Gado tangi. Bika fosi, unu ben de srafu fu sondu, ma now unu e gi yesi na Gado nanga un heri ati èn unu e du san a leri unu. 18 Ja, now di unu kon fri fu sondu, unu tron srafu fu Gado èn unu e du san reti. 19 Mi e taki na wan fasi di libisma man ferstan, fu di unu na sondusma. Fosi, unu ben de srafu fu sondu fu di unu ben e libi wan doti libi èn unu ben e du soso ogri. Ma now un musu du san reti so taki unu kan de santa. 20 Bika di unu ben de srafu fu sondu, unu no ben e du san reti.

21 Ma san ben de a bakapisi di unu ben de srafu fu sondu? Unu ben e du sani di no ben bun èn now unu e syen fu den sani dati. Den sani dati e tyari dede kon. 22 Ma now unu kon fri fu sondu èn unu tron srafu fu Gado. A bakapisi na taki unu kon santa èn disi o meki unu kisi têgo libi. 23 Bika a pai fu sondu na dede, ma a kado di Gado e gi sma na têgo libi nanga yepi fu Krestes Yesus wi Masra.