Gi den Galasiasma

4 Mi e taigi unu taki solanga a sma di musu kisi den gudu fu en p’pa na wan pkin ete, a no e difrenti fu wan srafu, awinsi ala sani na fu en. 2 A abi fu saka ensrefi ondro den sma di abi a frantwortu fu luku en èn ondro den futuboi di abi a frantwortu fu luku na oso, teleki a dei doro di en p’pa poti. 3 Na so a de nanga wi tu. Di wi ben pkin wi ben de srafu fu den sani fu grontapu. 4 Ma di a ten doro di Gado poti, a seni en Manpkin kon. A gebore leki wan libisma èn a ben musu hori ensrefi na a Wet, 5 so taki a ben kan bai den sma di ben hori densrefi na a Wet. Na so den kon fri fu a Wet èn Gado ben kan teki wi leki en manpkin.

6 Fu di unu na manpkin, meki Gado poti a santa yeye di a gi en Manpkin na ini wi ati tu. A santa yeye disi e meki wi bari: „Abba,* Papa!” 7 Sobun, unu a no srafu moro, ma unu na manpkin. Efu unu na manpkin, dan Gado meki unu tron pkin di musu kisi wan gudu tu.

8 Ma di unu no ben sabi Gado, unu ben de srafu fu falsi gado. 9 Ma now di unu kon sabi Gado, noso yu kan taki, now di Gado kon sabi unu, dan fa a du kon taki unu e drai go baka na den sani fu grontapu di no warti noti? Fu san ede unu wani dini den baka leki srafu? 10 Ala ten unu e hori unsrefi na spesrutu dei, mun, ten nanga yari. 11 Mi e frede taki na fu soso mi du so furu muiti fu yepi unu.

12 Brada, mi e begi unu fu kon de leki mi, bika misrefi ben de leki unu. Unu no du mi nowan ogri. 13 Ma unu sabi taki na fu di mi ben siki meki mi kisi na okasi fu ferteri unu a bun nyunsu a fosi leisi. 14 A siki fu mi ben de wan tesi gi unu, ma tòg unu no ben si mi leki noti èn unu no ben fisti gi mi.* Ma unu teki mi leki wan engel fu Gado, leki Krestes Yesus. 15 Mi de seiker taki efu unu ben man, unu ben o diki un ai puru èn unu ben o gi mi den. San psa nanga a prisiri di unu ben abi fosi? 16 Na tron mi tron un feanti fu di mi e taigi unu san tru? 17 Son sma e du ala sortu sani fu kisi unu na den sei, ma den no e du dati nanga bun prakseri. Den wani tapu unu fu bemui nanga mi, so taki unu kan go waka na den baka. 18 Te sma e du ala sortu sani fu kisi unu na den sei fu du bun, dan ala ten dati na wan bun sani. Ma a sani disi no musu psa nomo te mi de nanga unu. 19 Mi lobi pkin, fu unu ede mi e firi pen baka neleki te wan uma de fu kisi en pkin, èn a pen disi o tan teleki unu kisi den srefi fasi fu Krestes. 20 Mi e winsi taki mi ben kan de nanga unu nownowde èn taki mi ben kan taki tra fasi nanga unu, bika mi no sabi moro san mi musu du nanga unu.

21 Unu di wani du san a Wet e taki, unu no sabi san a Wet e taki? 22 Fu eksempre, Gado Buku taki dati Abraham ben abi tu manpkin. Wán a meki nanga na umasrafu èn a trawan a meki nanga a fri uma. 23 Ma a wan di a meki nanga na umasrafu gebore leki ala tra sma èn a trawan di a meki nanga a fri uma gebore fu di Gado ben pramisi en dati. 24 Den sani disi de leki wan agersitori. Den uma disi e agersi tu ferbontu. Wan fu den ferbontu meki na tapu Sinai-bergi. A ferbontu disi de leki Hagar èn den pkin fu en na srafu. 25 Hagar e agersi Sinai-bergi di de na ini Arabia. A e agersi Yerusalem fu a ten disi tu, bika Yerusalem nanga den pkin fu en de na ini katibo. 26 Ma a Yerusalem di de na hemel de fri èn en na wi m’ma.

27 Bika Gado Buku taki: „Ai, uma di no man kisi pkin, yu musu prisiri. Bari fu prisiri, yu di no sabi a pen di wan uma e kisi te a musu meki wan pkin. Bika na uma di en masra gwe libi en kisi moro pkin leki na uma di abi masra.” 28 We brada nanga sisa, unu na pkin fu a pramisi neleki Isak. 29 Ma neleki fa a ben de na a ten dati, na so a de tu na ini a ten disi taki a pkin di gebore leki ala tra sma bigin ferfolgu a pkin di gebore nanga yepi fu a yeye. 30 Ma san Gado Buku e taki? „Yagi na umasrafu nanga en manpkin gwe, bika noiti a manpkin fu na umasrafu o kisi den gudu di a manpkin fu a fri uma musu kisi.” 31 Sobun, brada nanga sisa, wi a no pkin fu wan umasrafu, ma wi na pkin fu a fri uma.