Yesaya
16 Seni wan manskapu fu Sela gi a tiriman fu a kondre.
Meki a waka psa na ini a sabana
go na a bergi fu na umapkin fu Sion.
2 Leki wan fowru di sma yagi fu en nesi,
na so den umapkin fu Moab o de na den lagi presi fu Arnon-liba.
3 „Taki san unu o du. Du san unu besroiti.
Na mindridei un musu de leki wan kowrupe di dungru leki neti.
Kibri den wan di sma yagi gwe. No gi den sma di e lowe, abra na den feanti.
4 Grantangi Moab, meki a pipel fu mi di sma yagi gwe, kon tan nanga yu.
Kibri den gi a wan di wani puru den na pasi.
Ma a sma di ben pina den, o dede.
A no o man du nowan ogri nanga den moro.
Den wan di ben pina trawan, no o de moro na grontapu.
5 Dan wan kownukondre o seti steifi tapu wan fundament fu lobi.*
Wan sma di de fu fertrow o sdon na tapu a kownusturu na ini a tenti fu David.
A o koti krutu na wan reti fasi èn a no o draidrai fu du san bun.”
6 Wi ben yere fu a bigifasi fu Moab.
Wi ben yere taki a abi heimemre, a abi bigifasi èn a abi bigi atibron.
Ma den soso sani di a e taki na noti.
7 Dati meki Moab o bari krei fu a rampu di o miti en.
Iya, ala sma na ini Moab o bari krei.
Den sma di lasi a feti o krei fu di den krentikuku fu Kir-Hareset no de moro.
8 Ala den sani di prani na den gron fu Hesbon, kon drei.
Den droifibon fu Sibma kon drei tu.
Den tiriman fu den pipel trapu den taki fu den di abi furu redi droifi.*
Den taki ben doro te na Yaeser
èn den ben gro go te na ini a sabana.
Den pransun ben gro na ala sei, te na a se srefi.
9 Fu dati ede mi o krei gi den droifibon fu Sibma leki fa mi ben krei gi Yaeser.
Ai Hesbon nanga Eleale, mi o nati unu nanga mi watra-ai,
fu di sma no o bari moro fu prisiri* na a kotiten èn na a ten te unu e koti den froktu di e gro na ini a waran ten fu a yari.
10 Nowan sma na ini a froktudyari e breiti moro èn nowan fu den e prisiri.
Nowan sma e singi noso bari fu prisiri na ini den droifidyari.
Nowan sma e masi droifi moro na ini den baki fu meki win.
Mi meki taki nowan sma e bari fu prisiri moro.
11 Fu Moab ede mi e beifi na insei
neleki den t’tei fu wan harpu.
Ala mi inbere e trubu fu Kir-Hareset ede.
12 Awinsi Moab tan go na a hei presi pe a e anbegi den gado fu en, awinsi a e go na en santa presi fu begi, tòg dati no o yepi en.
13 Na dati Yehovah ben taki fu Moab fosi. 14 Now Yehovah taki: „Moab ben abi furu glori, ma na ini dri yari a o kisi syen. (Den yari disi na fa wrokoman e teri yari.) Ala sortu dyugudyugu o de. Wan tu sma nomo o tan abra drape èn den no o man du noti.”