A di fu tu brifi gi den Korentesma
2 Mi besroiti fu no meki unu sari te mi kon baka na unu. 2 Efu mi meki un sari, dan suma o meki mi prisiri? A no den srefi sma di mi meki firi sari? 3 Mi ben skrifi den sani dati so taki den sma di musu meki mi prisiri, no o meki mi firi sari te mi kon. Mi de seiker taki den sani di e meki mi prisiri e meki un alamala prisiri tu. 4 A ben hebi gi mi fu skrifi unu. Mi du en nanga bigi sari na ini mi ati èn nanga furu watra-ai. Ma mi no du disi fu meki unu sari, ma fu meki unu kon ferstan o furu mi lobi unu.
5 Un no musu firi wan fasi taki mi e taki en so, ma efu wan sma no tyari ensrefi bun, dan a no mi a meki firi sari, ma a meki un alamala sari. 6 A pir’ai di furu fu unu gi a sma dati, nofo gi en. 7 Ma now un musu gi en pardon nanga un heri ati èn un musu trowstu en, so taki a no sari so te, taki a las’ati. 8 Fu dati ede mi e begi unu fu sori en taki unu lobi en. 9 Dati meki mi skrifi unu tu, fu kon sabi efu unu e du ala san mi taigi unu. 10 Efu unu gi wan sma pardon fu iniwan ogri di a du, dan mi e gi en pardon tu. Fu taki en leti, efu mi gi wan sma pardon, dan mi du dati fu yepi unu èn mi du dati na fesi Krestes. 11 Na so Satan no o man wini* wi, bika wi sabi san a abi na prakseri.*
12 Di mi doro na Trowas mi ferteri sma a bun nyunsu fu Krestes èn mi kisi na okasi fu du wroko gi Masra. 13 Mi ben e broko mi ede fu di mi no ben feni mi brada Titus. Ne mi taki den brada odi èn mi go na Masedonia.
14 Ma grantangi fu Gado! Ala ten a e waka na wi fesi èn a e tyari wi leki srudati di wini wan feti makandra nanga Krestes. A e meki wi panya a sabi fu en leki wan switi smeri na ala presi! 15 Bika gi Gado, wi nanga a boskopu fu Krestes na wan switi smeri. Den sma di o kisi ferlusu èn den sma di o dede e smeri en tu. 16 Gi den sma di o dede, a de wan smeri di e tyari dede kon, ma gi den sma di o kisi ferlusu, a de wan smeri di e tyari libi kon. Ma suma fiti fu du a wroko disi? 17 Na wi fiti fu du a wroko disi, bika wi no e meki moni nanga a wortu fu Gado soleki fa furu sma e du. Ma wi e taki nanga wan krin ati leki bakaman fu Krestes èn leki sma di Gado seni, aladi Gado e luku wi.