Esekièl

1 Na a di fu feifi dei fu a di fu fo mun na ini a di fu 30 yari, mi ben de nanga den katiboman na Kebar-liba. Ne hemel opo, dan mi bigin kisi fisyun fu Gado. 2 Na a di fu feifi dei fu a mun, feifi yari baka di den tyari Kownu Yoyakin gwe leki strafman, 3 Yehovah taki nanga mi, Esekièl,* a manpkin fu Priester Busi. Na a ten dati mi ben de na Kebar-liba na ini a kondre fu den Kaldeyasma. Drape mi firi a krakti fu Yehovah.

4 Ne mi si na ini wan fisyun fa wan bigi winti nanga wan bigi wolku wai kon fu noordsei. Faya* ben e koti na ini a wolku. A heri wolku ben e brenki èn na mindrisei fu a faya wan sani ben de di ben e brenki leki gowtu di moksi nanga solfru. 5 Fo libisani ben de na mindrisei fu a faya. Den ben gersi libisma. 6 Ibriwan fu den ben abi fo fesi nanga fo frei. 7 Den futu fu den no ben beni. Den ondrofutu ben de leki na ondrofutu fu wan pkin kaw èn den ben e brenki leki brenki kopro. 8 Den fo libisani di ben abi fesi nanga frei, ben abi wan libisma anu na ondro ibriwan fu den fo frei. 9 Den frei fu den ben e tuka nanga makandra. Te den ben e gwe den no ben e drai, ma ibriwan fu den ben e go langalanga na fesi.

10 Disi na fa a fesi fu den fo libisani ben de: Ibriwan fu den ben abi wan libisma fesi. Na ret’anusei den ben abi a fesi fu wan lew. Na kruktu-anusei den ben abi a fesi fu wan mankaw. Den fo libisani ben abi a fesi fu wan aka tu. 11 Na so den fesi fu den ben de. Den ben bradi den frei fu den opo go na loktu. Ibriwan fu den libisani ben abi tu frei di ben e tuka nanga makandra èn tu frei di ben tapu den skin.

12 Ibriwan fu den ben e gwe langalanga. Awinsi pe a yeye ben wani den fu go, na drape den ben e go. Den no ben e drai te den ben e gwe. 13 Den libisani ben gersi krofaya di e bron. Sani di ben gersi frambo* ben e beweigi go-kon na mindri den libisani. A faya fu den frambo ben e brenki èn bliksem ben e koti kmoto na ini a faya. 14 Te den libisani ben e gwe èn te den ben e drai kon baka, den ben gersi bliksem di ben e koti na hemel.

15 Di mi luku den libisani, mi si wan wiel na tapu a gron na sei ibriwan fu den libisani di abi fo fesi. 16 Den wiel ben e brenki leki krisolit-ston.* Ala den fo wiel ben de a srefi. Den wiel ben meki na so wan fasi taki a ben gersi leki wan wiel ben de na ini wan tra wiel.* 17 Te den ben e gwe, den ben kan go na iniwan fu den fo sei sondro taki den ben abi fu drai. 18 Den wiel ben hei so te, taki den ben meki sma frede. Ala den fo wiel ben furu nanga ai. 19 Te den libisani ben e gwe, den wiel ben de leti na den sei. Te den libisani ben e opo go na loktu, den wiel ben e opo go na loktu tu. 20 Awinsi pe a yeye ben wani den fu go, na drape den ben e go. Ibri leisi te den libisani ben opo go na loktu, den wiel ben opo go na loktu tu, bika a yeye di ben de na ini den libisani,* ben de na ini den wiel tu. 21 Te den libisani ben e gwe, den wiel ben e go nanga den tu. Te den libisani ben e tan tnapu, den wiel ben e tan tnapu tu. Te den libisani ben e opo go na loktu, den wiel ben e opo go na loktu tu, bika a yeye di ben de na ini den libisani, ben de na ini den wiel tu.

22 Na tapsei fu den libisani wan bigi plata sani ben de. A sani disi ben gersi wan plata pisi ijs di ben e brenki èn di ben moi srefsrefi. A ben bradi na tapsei fu den libisani. 23 Na ondrosei fu a plata sani den frei fu den libisani ben opo go na loktu* èn den ben tuka nanga makandra. Ibriwan fu den ben abi tu frei di ben tapu a wan sei fu den skin, nanga tu frei di ben tapu a tra sei fu den skin. 24 Mi yere a b’bari di den frei fu den ben e meki. A ben de leki a b’bari fu wan bigi sula, leki a sten fu na Almaktiwan. Te den ben e gwe, dan a b’bari fu den frei ben de leki a b’bari fu wan legre. Te den ben tan tnapu, den ben saka den frei.

25 Ne mi yere wan sten e kmoto na tapsei fu a plata sani di ben de na loktusei fu den libisani. (Te den ben tan tnapu, den ben saka den frei.) 26 Na tapsei fu a plata sani disi wan sani ben de di gersi wan kownusturu fu safir-ston. A ben gersi leki wan libisma ben e sdon na tapu a kownusturu. 27 Fu en dyonku* go na loktu mi si wan sani di ben e brenki leki gowtu di moksi nanga solfru èn a ben de leki wan faya na en lontu. Fu en dyonku go na ondro a ben de leki faya. Wan brenki leti ben de na en lontu. 28 A leti ben gersi wan regenboog di de fu si na ini den wolku, baka te alen fadon. A ben gersi a glori fu Yehovah. Di mi si a sani disi mi boigi nanga mi fesi go na gron, dan mi yere wan sma bigin taki nanga mi.