Esekièl

40 A ben de a bigin fu a di fu 25 yari di wi ben de leki strafman na Babilon, na a di fu tin dei fu a mun. A dei dati a yeye fu Yehovah kon na mi tapu èn a tyari mi go na a foto. Disi psa na a di fu 14 yari, baka di sma teki Yerusalem abra. 2 Na ini den fisyun di Gado sori mi, a tyari mi go na a kondre Israel èn a meki mi sdon na tapu wan bun hei bergi. Na tapu a bergi, na zuidsei, wan sani ben de di ben gersi wan foto.

3 Di Gado tyari mi go drape mi si wan man. En skin ben de leki kopro. A ben e hori wan vlas-t’tei* nanga wan markitiki* na ini en anu èn a ben e tnapu na a portu. 4 Ne a man bigin taki nanga mi. A taki: „Manpkin fu libisma, luku bun èn arki bun. Poti prakseri* na ala den sani di mi o sori yu, bika mi tyari yu kon dya fu sori yu den sani disi. Ferteri den Israelsma ala san yu e si.”

5 Ne mi si wan skotu di ben de lontu a heri tempel. Na ini en anu a man ben hori wan markitiki di ben langa sowan 3 meter nanga 11 centimeter.* A bigin marki a skotu. A ben bradi 3 meter nanga 11 centimeter èn a ben hei 3 meter nanga 11 centimeter.

6 Dan a man go na a portu di ben e sori go na owstusei èn a kren a trapu di e go na a portu. Di a marki a doromofo fu a portu, dan a ben bradi 3 meter nanga 11 centimeter. A tra doromofo ben bradi 3 meter nanga 11 centimeter tu. 7 Ibri waktiman-kamra ben langa 3 meter nanga 11 centimeter èn den ben bradi 3 meter nanga 11 centimeter. A pisi na mindri den waktiman-kamra ben bradi 2 meter nanga 59 centimeter. Na a bakasei pisi fu a portu di ben e sori go na a bigi tempel-dyari yu ben abi wan bigi kamra. A doromofo fu a portu di e tyari yu go na a kamra disi ben bradi 3 meter nanga 11 centimeter.

8 A marki a bigi kamra di ben de na a bakasei pisi fu a portu di ben e sori go na a bigi tempel-dyari. A kamra ben bradi 3 meter nanga 11 centimeter. 9 Ne a marki a bigi kamra fu a portu. A kamra ben bradi 4 meter nanga 14 centimeter. Den pilari na sei a kamra ben bradi wán meter nanga fo centimeter. A bigi kamra fu a portu ben de na a sei fu a bigi tempel-dyari.

10 Na ala tu sei fu a portu yu ben abi dri waktiman-kamra. Den dri kamra disi ben bigi a srefi. Den pilari na ala tu sei fu a portu ben bigi a srefi.

11 Baka dati a man marki a doromofo fu a portu èn a ben bradi 5 meter nanga 18 centimeter. A heri portu ben bradi 6 meter nanga 73 centimeter.

12 Na fes’sei fu ibriwan fu den waktiman-kamra wan pkin balkon ben de di ben abi wan lagi skotu. Seisei fu a pkin balkon disi ben bradi 52 centimeter. Den pkin balkon ben de na abrasei fu makandra. Wán waktiman-kamra ben langa 3 meter nanga 11 centimeter èn a ben bradi 3 meter nanga 11 centimeter.

13 Baka dati a marki o bradi a portu ben de. A marki fu a bakasei muur fu wan fu den waktiman-kamra* te go miti a bakasei muur fu a waktiman-kamra di ben de na abrasei. A portu ben bradi 12 meter nanga 95 centimeter. A doro fu a wan waktiman-kamra ben de leti na abrasei fu a doro fu a tra waktiman-kamra. 14 A marki den pilari èn den ben hei 31 meter nanga 8 centimeter. A marki den pilari tu di ben de na sei den kamra fu ala den portu di ben de lontu a bigi tempel-dyari. 15 Fu fes’sei fu a portu pe sma ben e waka kon na insei, te go miti fes’sei fu a bigi kamra fu a portu di ben e sori go na a dyari, ben langa 25 meter nanga 90 centimeter.

16 Ibri waktiman-kamra ben abi fensre di ben bradi na insei èn smara na dorosei. Den pilari na ini den waktiman-kamra ben abi den sortu fensre disi tu. Na insei, den bigi kamra fu den portu ben abi den fensre disi na ibri sei. Na tapu den pilari yu ben abi prenki fu palmbon.

17 Baka dati a man tyari mi go na a bigi tempel-dyari. Drape mi si n’nyan-kamra.* A heri gron fu a bigi tempel-dyari ben meki fu ston. Dritenti n’nyan-kamra ben de na tapu a ston-gron disi. 18 A ston-gron na sei den portu ben bradi a srefi leki a langa sei fu den portu. Den ben kari a pisi fu a ston-gron disi a moro lagi ston-gron.

19 Baka dati a marki a pisi* di ben de na mindri a lagi portu nanga a portu fu a pkin tempel-dyari. A pisi disi ben de 51 meter nanga 80 centimeter. A pisi na a owstusei portu èn a pisi na a noordsei portu ben bigi a srefi.

20 A bigi tempel-dyari ben abi wan portu na noordsei. Ne a man marki o langa èn o bradi a portu ben de. 21 Na ala tu sei fu a portu yu ben abi dri waktiman-kamra. Den pilari fu a portu disi èn a bigi kamra fu a portu ben bigi a srefi leki den wan fu a fosi portu. A portu ben langa 25 meter nanga 90 centimeter èn a ben bradi 12 meter nanga 95 centimeter. 22 Den fensre nanga a bigi kamra fu a portu èn den prenki fu den palmbon ben bigi a srefi leki den wan fu a portu di ben de na owstusei. Sma ben kan kren wan trapu fu seibi trei go na a portu. A bigi kamra fu a portu ben de abrasei fu a trapu disi.

23 Abrasei fu a portu na noordsei èn abrasei fu a portu na owstusei yu ben abi wan tra portu tu pe sma ben kan go na a pkin tempel-dyari. Dan a man marki a pisi di ben de na mindri den tu portu disi. A ben de 51 meter nanga 80 centimeter.

24 Baka dati a man tyari mi go na zuidsei. Ne mi si wan portu di ben de na zuidsei. A marki den pilari fu a portu drape èn a bigi kamra fu a portu. Den ben bigi a srefi leki den wan fu den tra portu. 25 Den muur fu a portu nanga a bigi kamra fu a portu ben abi fensre di ben de a srefi leki den fensre fu den tra portu. A portu ben langa 25 meter nanga 90 centimeter èn a ben bradi 12 meter nanga 95 centimeter. 26 Sma ben kan kren wan trapu fu seibi trei fu go na a portu. A bigi kamra fu a portu ben de abrasei fu a trapu disi. Na tapu den tu pilari na a bigi kamra fu a portu yu ben abi prenki fu palmbon.

27 A pkin tempel-dyari ben abi wan portu na zuidsei. Di a man marki a pisi na mindri a portu fu a pkin tempel-dyari nanga a tra portu na zuidsei, a ben de 51 meter nanga 80 centimeter. 28 Baka dati a meki mi waka na a portu di ben de na zuidsei fu go na a pkin tempel-dyari. Dan a marki a portu na zuidsei. A ben bigi a srefi leki den tra portu. 29 Den waktiman-kamra, den pilari nanga a bigi kamra fu a portu ben bigi a srefi leki den wan fu den tra portu. Den muur fu a portu nanga a bigi kamra fu a portu ben abi fensre. A portu ben langa 25 meter nanga 90 centimeter èn a ben bradi 12 meter nanga 95 centimeter. 30 Ala den portu pe sma ben musu waka fu go na a pkin tempel-dyari ben abi wan bigi kamra. Den ben langa 12 meter nanga 95 centimeter èn den ben bradi 2 meter nanga 59 centimeter. 31 A bigi kamra fu a portu ben e sori go na a bigi tempel-dyari. Na tapu den pilari fu a kamra yu ben abi prenki fu palmbon. A trapu fu kren go na a portu ben abi aiti trei.

32 A man meki mi waka na owstusei fu go na a pkin tempel-dyari. Dan a marki a portu drape. A portu disi ben bigi a srefi leki den tra portu. 33 Den waktiman-kamra, den pilari nanga a bigi kamra fu a portu ben bigi a srefi leki den wan fu den tra portu. Den muur fu a portu nanga a bigi kamra fu a portu ben abi fensre. A portu ben langa 25 meter nanga 90 centimeter èn a ben bradi 12 meter nanga 95 centimeter. 34 A bigi kamra fu a portu ben e sori go na a bigi tempel-dyari. Na tapu den tu pilari na a kamra fu a portu yu ben abi prenki fu palmbon. A trapu fu kren go na a portu ben abi aiti trei.

35 Dan a tyari mi go na a portu na noordsei èn a marki en. A portu disi ben bigi a srefi leki den tra portu. 36 Den waktiman-kamra, den pilari nanga a bigi kamra fu a portu ben bigi a srefi leki den trawan. Na ala tu sei a portu ben abi fensre. A portu ben langa 25 meter nanga 90 centimeter èn a ben bradi 12 meter nanga 95 centimeter. 37 Na a portu di ben e sori go na a bigi tempel-dyari, tu pilari ben de. Na tapu den pilari yu ben abi prenki fu palmbon. A trapu fu kren go na a portu ben abi aiti trei.

38 Na den pilari fu a portu yu ben abi wan n’nyan-kamra di ben abi wan doro. Na drape den ben e wasi den meti gi a bron-ofrandi.

39 Na ini a bigi kamra fu a portu yu ben abi tu tafra na a wan sei èn tu tafra na a tra sei. Na tapu den tafra disi den ben e srakti den meti gi a bron-ofrandi, a sondu-ofrandi nanga a pardon-ofrandi. 40 Na a trapu pe sma ben e kren go na a portu na noordsei yu ben abi tu tafra na dorosei. Na ini a bigi kamra fu a portu yu ben abi tu tafra tu. 41 Fo tafra ben de na dorosei fu a portu èn fo tafra ben de na ini a bigi kamra fu a portu. Ala nanga ala yu ben abi aiti tafra pe den ben e srakti meti. 42 Den fo tafra pe den ben e srakti a meti gi a bron-ofrandi ben meki fu ston di koti puru na ini bergi. Wán tafra ben langa 78 centimeter, a ben bradi 78 centimeter èn a ben hei 52 centimeter. Na tapu den tafra den ben poti den wrokosani di den ben gebroiki fu srakti den meti gi den bron-ofrandi nanga den tra ofrandi. 43 Na insei fu a bigi kamra fu a portu yu ben abi planga di ben fasi na ala den muur. Den planga ben de fu poti sani na tapu. Den ben bradi seibi centimeter. Na tapu den tafra den ben e poti a meti di den ben gi leki ofrandi.

44 Dorosei fu a portu di ben de na noordsei fu a pkin tempel-dyari, yu ben abi den n’nyan-kamra gi den singiman. Den doro fu den kamra disi ben e sori go na zuidsei. Wán tra n’nyan-kamra ben de na sei a portu na owstusei. A doro fu a n’nyan-kamra disi ben e sori go na noordsei.

45 A man taigi mi: „A n’nyan-kamra disi di e sori go na zuidsei, na gi den priester di abi a frantwortu fu wroko na ini a tempel. 46 A n’nyan-kamra di e sori go na noordsei, na gi den priester di abi a frantwortu fu wroko na a altari. Den na den bakapkin fu Sadok. Den na den Leifisma di kisi a wroko fu kon na fesi Yehovah fu wroko gi en.”

47 Baka dati a man marki a pkin tempel-dyari. A dyari ben langa 51 meter nanga 80 centimeter èn a ben bradi 51 meter nanga 80 centimeter. Sobun, a dyari ben de wan fokanti. Na altari ben de na fesi a tempel.

48 Dan a tyari mi go na a gadri* fu a tempel èn a marki den pilari na a mofodoro fu a gadri fu a tempel. Ibriwan fu den pilari ben deki 2 meter nanga 59 centimeter èn den ben bradi 1 meter nanga 55 centimeter.

49 A gadri ben langa 10 meter nanga 36 centimeter èn a ben bradi 5 meter nanga 70 centimeter. Efu sma ben wani go na insei, den ben musu kren wan trapu. Na sei den tu bradi pilari fu a gadri yu ben abi tu smara pilari.