Yeremia
47 Fosi a kownu fu Egepte teki Gasa abra, Yehovah ben gi Profeiti Yeremia wan boskopu di abi fu du nanga den Filisteasma. 2 Yehovah taki:
„Luku! Watra e kmoto fu noordsei.
A o tron wan liba di o sungu a heri kondre.
Iya, a o sungu a heri kondre nanga ala sani di de na ini.
A o sungu a foto nanga den sma di e tan na ini.
Den man o bari
èn ala sma na ini a kondre o bari krei.
3 Te den yere fa den asi e lon kon,
fa den fetwagi e rèi kon
èn fa den wiel fu den wagi e meki b’bari,
dan den p’pa no o luku den manpkin fu den nanga wan ai srefi.
Den no o man du noti fu di den e frede srefsrefi.
4 A dei e kon te den feanti o kiri ala den Filisteasma.
Den o kiri ala den yepiman fu Tirus nanga Sidon di tan abra.
Yehovah o kiri den Filisteasma
di tan abra fu na èilanti Kaftor.*
Askelon o de pî.
Un sma di e tan na a lagipresi fu den,
o langa unu o kotkoti un skin ete?
6 Ai, fet’owru fu Yehovah!
O langa yu o rigeri ete?
Go baka na yu presi.
Go rostu èn tan pî.
7 Ma fa a kan tan pî
efu na Yehovah taigi en san a musu du?
A musu go na Askelon èn na a sesyoro.
Na drape a seni en go.”