Gi den Romesma
15 Ma wi di abi wan tranga bribi musu yepi den wan di bribi swaki, so taki den kan tyari den hebi fu den. Wi no musu de nomonomo fu du san wi feni bun. 2 Meki ibriwan fu wi du bun gi tra sma èn meki wi gi den dek’ati. 3 Bika srefi Krestes no ben suku en eigi bun. Ma a de soleki fa Gado Buku taki: „A srefi fasi fa sma e kosi yu, na so den e kosi mi.” 4 Bika ala sani di sma skrifi fosten, ben skrifi fu leri wi wan sani. Disi e yepi wi fu hordoro èn fu kisi trowstu fu Gado Buku, so taki wi kan abi howpu. 5 Meki Gado di e gi wi krakti fu hordoro èn di e gi wi trowstu, yepi unu alamala fu abi a srefi denki di Krestes Yesus ben abi, 6 so taki unu kan gi a Gado èn a P’pa fu wi Masra Yesus Krestes glori leki wán man èn nanga wán sten.*
7 Fu dati ede, no desko nowan sma neleki fa Yesus no desko unu, so taki Gado kan kisi glori. 8 Mi e taigi unu taki Krestes tron wan dinari fu den sma di besnèi.* Na a fasi disi a sori taki Gado e taki san tru èn a bewijs taki den sani di Gado pramisi den afo fu den de tru. 9 Na so den pipel kan gi Gado glori fu di a abi sar’ati. A de soleki fa Gado Buku taki: „Fu dati ede mi o prèise yu na mindri den pipel èn mi o singi fu prèise yu nen.” 10 A e taki tu: „Un kondre, prisiri nanga a pipel fu Gado.” 11 Gado Buku taki tu: „Un pipel, un prèise Yehovah,* ja, meki ala pipel prèise en.” 12 Yesaya e taki tu: „Wan sma* fu a famiri fu Isai o kon èn a o tiri den pipel. Na tapu en den pipel o howpu.” 13 Meki a Gado di e gi sma howpu, gi unu furu prisiri nanga freide fu di unu e fertrow na en tapu. Dan a santa yeye o meki unu kon abi wan moro tranga howpu.
14 We, mi brada, mi sabi heri bun taki unu lobi fu du bun tu, unu abi furu sabi èn unu sabi fa fu gi makandra rai. 15 Ma now mi skrifi moro krin fu ete wan tu sani di mi ben wani memre unu. Mi e du disi fu di Gado sori mi bun-ati 16 so taki mi, di de wan dinari fu Krestes Yesus, kan du a santa wroko fu preiki a bun nyunsu fu Gado gi den trakondre sma. Mi e du a wroko disi, so taki den trakondre sma kan de leki wan ofrandi di Gado feni bun èn di a santa yeye meki kon santa.
17 Dati meki mi breiti fu du a wroko fu Gado leki wan bakaman fu Krestes Yesus. 18 Bika mi no o taki fu nowan tra sani, boiti fu den sani di Krestes meki mi taki èn du fu yepi den trakondre sma fu gi yesi na Gado. 19 Den gi yesi fu di den si den wondru nanga den bigi sani di du nanga a krakti fu a santa yeye. Dati meki mi bigin na ini Yerusalem fosi èn mi waka lontu go te na Iliria fu preiki a bun nyunsu fu Krestes finfini. 20 Mi du muiti fu no preiki a bun nyunsu na den presi pe sma yere fu Krestes kba, so taki mi no ben o bow na tapu a fundament fu wan tra sma. 21 Ma a de soleki fa Gado Buku taki: „Den sma di no yere a nyunsu fu en, o si en èn den sma di no yere fu en, o ferstan.”
22 Someni leisi a sani disi ben tapu mi fu kon na unu. 23 Ma now mi wroko kba na ala presi na ini den kontren disi èn na omeni* yari kba mi wani kon na unu. 24 Mi howpu taki mi kan si unu te mi de na pasi fu go na Spanyorokondre. Baka te mi tan wan pisi ten nanga unu, mi howpu taki unu kan tyari mi afpasi. 25 Ma now mi o go na Yerusalem fu yepi den santawan. 26 Bika den wan di de na Masedonia nanga Akaya breiti taki den ben kan prati den sani fu den nanga den pôti santawan di de na Yerusalem. 27 Ja, den du disi nanga prisiri fu di den ben firi leki den ben abi wan paiman na den santawan. Bika efu den santawan na ini Yerusalem yepi den fu kisi blesi fu Gado,* dan den pipel musu yepi den santawan tu nanga den sani di den abi fanowdu. 28 Fu dati ede, te mi kba nanga a wroko disi èn mi tyari den sani disi go na den, dan mi o kon na unu, fosi mi go na Spanyorokondre. 29 Boiti dati, mi sabi taki te mi kon na unu, mi o kon nanga furu blesi fu Krestes.
30 We, mi brada, fu di wi e bribi na ini wi Masra Yesus Krestes èn fu di a santa yeye meki taki wi abi lobi, mi e gi unu dek’ati fu begi Gado fayafaya gi mi, neleki fa mi e du dati, 31 so taki a kan ferlusu mi fu den sma na Yudea di no e bribi èn so taki den santawan kan prisiri nanga a wroko di mi e du na Yerusalem. 32 Efu Gado wani, mi o kon na unu nanga prisiri èn wi o gi makandra dek’ati. 33 Meki a Gado di e gi freide de nanga un alamala. Amen.