Gi den Efeisesma
3 Dati meki mi, Paulus, de na strafu fu Krestes Yesus ede èn fu di mi yepi unu di de trakondre sma. 2 A musu fu de so taki unu yere taki mi kisi a frantwortu fu yepi unu, so taki Gado kan sori unu bun-ati. 3 A ben tyari kon na krin gi mi san na a santa kibritori èn mi ben skrifi pkinso fu a tori disi kba. 4 Fu dati ede te unu e leisi disi, unu o man ferstan o furu mi sabi fu a santa kibritori di abi fu du nanga Krestes. 5 Na ini owruten, sma no ben sabi a kibritori disi leki fa a yeye tyari en kon na krin now gi den santa apostel èn gi den profeiti fu Gado. 6 A santa kibritori disi na taki den trakondre sma di tron wán nanga Krestes Yesus nanga yepi fu a bun nyunsu, o kisi a gudu tu. Den o tron wan pisi fu a srefi skin èn den o kisi a srefi sani di Gado pramisi wi. 7 Fu di Gado sori mi bun-ati, meki mi tron wan dinari fu a santa kibritori disi. A bun-ati disi de leki wan kado di a gi mi fu sori mi en krakti.
8 Aladi mi na a moro pkinwan fu ala den santawan, tòg Gado sori mi a bun-ati disi. Dati meki mi kan ferteri den trakondre sma a bun nyunsu di abi fu du nanga den gudu fu Krestes di bigi moro leki san wi man ferstan 9 èn mi kan sori fa a santa kibritori kon na krin. Na ini a ten di psa, Gado di meki ala sani, no ben tyari a santa kibritori disi kon na krin. 10 A du disi fu di now a e gebroiki a gemeente fu meki den tirimakti nanga den makti na hemel sabi fa a e sori a koni fu en na furu difrenti fasi. 11 A du ala den sani disi soleki fa a ben abi na prakseri sensi ten kba èn den abi fu du nanga wi Masra Yesus Krestes. 12 Wi kan de seiker taki nanga yepi fu en wi man taki sondro frede èn wi man begi Gado o ten wi wani, fu di wi e bribi na ini Krestes. 13 Fu dati ede mi e aksi unu fu no las’ati te mi e kisi tesi fu unu ede, bika den tesi o meki unu kisi glori.
14 Dati meki mi e saka kindi gi a P’pa 15 di gi ibri famiri na hemel èn na grontapu a nen fu den. 16 Mi e begi taki Gado, a sma di abi bigi glori, o gebroiki a krakti fu en yeye fu tranga unu.* 17 Mi e begi en tu taki a bribi fu unu kan meki taki Krestes de na ini un ati èn taki unu lobi makandra. Mi e aksi en tu fu meki unu tnapu steifi na tapu a fundament, neleki fa rutu e meki wan bon tnapu steifi. 18 Na so unu nanga ala den santawan o man ferstan finfini san na a bradi nanga a langa nanga a hei nanga a dipi fu den sani di abi fu du nanga Gado. 19 Boiti dati, unu o kon sabi a lobi fu Krestes di bigi moro leki san unu man ferstan. Dan Gado kan gi unu ala den fasi fu en.
20 We, fu di Gado na a sma di e meki a krakti fu en wroko na ini wi, meki a kan du moro leki iniwan sani di wi e aksi noso prakseri. 21 Na en musu kisi glori nanga yepi fu a gemeente èn nanga yepi fu Krestes Yesus fu têgo, ja, fu ala ten. Amen.