Psalm
Wan begi fu David.
17 Yehovah, arki mi te mi e begi yu èn krutu den feanti fu mi.
Arki mi te mi e kari yu fu yepi mi.
Arki mi te mi e begi yu nanga wan krin ati.
2 Mi e begi yu fu krutu mi na wan reti fasi.
Meki yu eigi ai si taki mi e du san reti.
3 Yu ondrosuku mi ati, iya, te neti yu kon luku san mi e du.
Yu meki mi kon krin.*
Yu o si taki mi no prakseri fu go du ogri
èn mi no taki ogri sani nanga mi mofo.
4 Mi sorgu taki mi no du san den ogrisma e du.
Mi du san yu taigi mi. Mi no e waka a pasi fu den fufurman.
5 Meki mi tan waka na tapu a pasi fu yu,
so taki mi no stotu mi futu.
6 Mi Gado, na yu mi e begi fu yepi mi, fu di mi sabi taki yu o piki mi.
Poti yesi arki* mi. Arki san mi e taki.
7 Mi e begi yu, du bigi sani fu sori a lobi* fu yu.
Bika yu na a Ferlusuman fu den sma di e kon suku kibri na yu.
Kibri den gi den wan di e opo densrefi teige yu.
8 Kibri mi leki a popki fu yu ai.
Kibri mi na ondro den frei fu yu.
9 Kibri mi gi den takr’ati sma di wani du ogri nanga mi.
Kibri mi gi den feanti di e lontu mi.
Den e gi sma bigitaki.
11 Now den feanti fu wi lontu wi.
Den e luku efu den kan feni wan fasi fu du ogri nanga wi.*
12 Den de leki lew di e angri fu priti wan meti pispisi,
leki yongu lew di e d’don e luru wan meti.
13 Yehovah, mi e begi yu, opo go feti nanga den èn wini den.
Teki yu fet’owru, dan yu ferlusu mi fu na ogriwan.
14 Yehovah, ferlusu mi nanga yu tranga anu.
Ferlusu mi fu den sma fu a grontapu disi di e prakseri nomo san den kan kisi na ini a libi disi.
Noti no e mankeri den fu di yu e gi den bun sani.
Den e libi den gudu fu den na baka gi den furu manpkin fu den.