Yesaya
11 Wan pkin taki o bigin gro na a tompu fu Isai.
A rutu fu en o gi wan pransun di o meki furu froktu.
2 A yeye fu Yehovah o de na en tapu.
Fu dati ede a o koni, a o ferstan sani bun,
a o gi bun rai, a o tranga,
a o abi furu sabi èn a o abi bigi lespeki gi Yehovah.
3 A o feni en wan prisiri sani fu sori lespeki gi Yehovah.
Te a o koti krutu, a no o poti prakseri nomo na san en ai si.
Te a o pir’ai gi sma, a no o poti prakseri nomo na san en yesi yere.
4 Na wan reti fasi a o koti krutu gi den mofinawan.
Nanga wan krin ati a o pir’ai gi sma, so taki den safr’ati sma na grontapu feni bun.
Te a o leisi strafu gi den sma na grontapu, a o de leki a naki den nanga wan tiki.
Nanga a bro fu en mofo a o kiri den ogrisma.
5 A o lobi retidu èn ala ten sma o man fertrow na en tapu.
Den sani disi o de leki wan riem na en mindribere.
6 Wan busdagu o tan nanga wan pkin skapu,
èn wan pkin krabita o d’don na sei wan penitigri.
Pkin kaw, lew* nanga fatu meti o de makandra*
èn wan pkin boi o luku den.
7 Kaw nanga beer o nyan nanga makandra
èn den pkin fu den o d’don sei makandra.
Lew o nyan grasi neleki mankaw.
8 Wan pkin di de na bobi ete o prei na a olo fu wan kobrasneki.
Wan pkin di no e dringi bobi moro o poti en anu na a olo fu wan takru sneki.
9 Den no o du nowan ogri
èn den no o pori nowan sani na mi santa bergi,
fu di heri grontapu o furu nanga a sabi fu Yehovah
neleki fa a se furu nanga watra.
10 Na a ten dati a rutu fu Isai o opo tnapu èn a o de leki wan fraga* di den pipel kan si.
Ala den pipel o go suku rai na en*
èn a tanpresi fu en o furu nanga glori.
11 Na a dei dati Yehovah o langa en anu ete wan leisi fu yepi den sma di tan abra fu en pipel. A o teki den puru fu Asiria, fu Egepte, fu Patros, fu Kus, fu Elam, fu Sineyar,* fu Hamat èn fu den èilanti na ini a se. 12 A o poti wan fraga* meki den pipel si dati. Den sma fu Israel nanga den sma fu Yuda ben panya go na ala sei, ma a o puru den na den fo uku fu grontapu èn a o tyari den kon na wán.
13 Efrayim no o dyarusu moro
èn den sma di abi bita-ati gi Yuda o dede.
Efrayim no o dyarusu tapu Yuda
èn Yuda no o abi bita-ati gi Efrayim.
14 Den o lon saka den bergi* fu feti nanga den Filisteasma na west-sei.
Makandra den o teki den gudu fu den sma fu Owstusei.
Den o wini Edom nanga Moab
èn den o basi den Amonsma.
Nanga a faya bro fu en a o naki den seibi liba di e kmoto na Gran Liba*
èn a o meki sma waka go na abrasei.
16 Dan wan bigi pasi o opo gi den sma di tan abra fu en pipel èn den o kmoto na Asiria,
neleki fa wan bigi pasi ben opo gi Israel di den ben kmoto na Egepte.