A di fu tu brifi fu Yohanes

1 Mi na a owru man di e skrifi a lespeki uma di Gado kari. Mi e skrifi den pikin fu en tu di mi lobi trutru. Ma a no mi wawan lobi den. Ala den sma di kon sabi a tru leri, lobi den tu. 2 Wi lobi unu fu di a tru leri de na ini wi ati èn a o de nanga wi fu têgo. 3 Meki Gado a Tata nanga Yesus Krestes, a Manpikin fu a Tata, sori wi bun-ati nanga sari-ati èn meki a freide fu den de nanga wi, makandra nanga a tru leri èn nanga lobi.

4 Mi e prisiri srefisrefi fu di mi kon sabi taki wan tu pikin fu yu e tan gi yesi na a tru leri, soleki fa a Tata ben gi wi a komando. 5 Fu dati ede wi lespeki uma, mi e aksi yu now fu wi lobi makandra. Disi a no wan nyun komando di mi e skrifi yu, ma a de wan komando di wi ben abi kaba sensi a bigin. 6 Disi na lobi, taki wi musu tan waka soleki fa den komando fu a Tata e taki. Disi na a komando di unu yere kaba sensi a bigin, so taki unu kan tan sori lobi, 7 bika furu bedrigiman de na grontapu. Den e taki krin dati den no e bribi taki Yesus Krestes kon leki wan libisma. Den na bedrigiman èn den na feanti fu Krestes.*

8 Luku bun taki unu no lasi den sani di wi ben wroko so tranga fu den, ma sorgu taki unu kisi a heri pai. 9 A sma di e leri trawan tra sani leki san Krestes ben e leri sma èn di no e tan na ini a leri fu Krestes, no de wán nanga Gado. A sma di e tan na ini a leri disi, na a sma di de wán nanga a Tata èn nanga a Manpikin. 10 Efu wan sma e kon na unu èn a no e kon nanga a leri disi, dan noiti un musu teki en na ini un oso. Un no musu taki en odi tu, 11 bika a sma di e taki en odi, e horibaka gi den ogri sani di a e du.

12 Aladi mi musu skrifi unu furu sani ete, toku mi no wani taki fu den na ini wan brifi. Ma mi howpu taki mi kan taki nanga unu te wi o miti, so taki unu kan prisiri srefisrefi.

13 Den pikin fu yu sisa, a wan di Gado kari, e seni taki yu odi.