Gi den Hebrewsma

12 We dan, efu someni kotoigi de na wi lontu neleki wan bigi wolku, dan meki wi puru ala hebi na wi tapu tu nanga a sondu di kan kisi wi makriki. Meki wi hordoro te wi e lon a streilon di wi musu lon ete, 2 aladi wi e poti ala wi prakseri na Yesus, a Moro Prenspari Fesiman fu wi bribi èn a sma di e yepi wi fu kon abi a tranga bribi di wi musu abi. Na fu di a ben sabi taki prisiri ben e wakti en, meki a ben de klarklari fu dede na a pinapostu* sondro fu broko en ede taki a ben o kisi syen. A go sdon na a ret’anusei fu a kownusturu fu Gado. 3 Ja, poti prakseri finfini na a sma di ben hordoro, srefi te sondari ben e taki ogri fu en, aladi na densrefi den ben e du ogri na a fasi dati. Na so unu no o kon weri èn unu no o las’ati.

4 Na ini a feti di unu e feti nanga sondu, noiti unu ben abi fu feti teleki un brudu lon. 5 Boiti dati, unu fergiti krinkrin sortu rai unu leki manpkin ben kisi: „Mi boi, no si a pir’ai fu Yehovah* leki wan pkin sani èn no las’ati tu te a e strafu yu, 6 bika Yehovah* e pir’ai gi den sma di a lobi. Fu taki en leti, a e wipi* ala sma di a e teki leki en manpkin.”

7 Un musu hordoro te unu e kisi pir’ai,* so taki unu kan leri wan sani. Gado e si unu leki en manpkin. Sortu manpkin no e kisi strafu fu en p’pa? 8 Ma efu unu alamala no ben kisi a pir’ai disi, dan unu ben o de hurupkin. Unu no ben o de trutru manpkin. 9 Boiti dati, den libisma p’pa fu wi ben gwenti strafu wi fu leri wi wan sani èn wi ben e lespeki den. Dati meki wi musu saka wisrefi moro ete na ondro a P’pa di e tiri a libi fu wi nanga en santa yeye, dan wi o feni libi. 10 Den p’pa fu wi strafu wi fu wan syatu pisi ten nomo, soleki fa den ben denki taki a bun. Ma te Gado e strafu wi, a e du dati fu sani kan go bun nanga wi, so taki wi kan kon santa tu neleki en. 11 A tru taki te sma e kisi strafu, dan a no de wan prisiri sani na a momenti dati, ma a e hati.* Ma efu den leri wan sani fu a strafu disi, dan bakaten a o tyari blesi kon. Den o abi freide èn den o du san reti.

12 Fu dati ede tranga den kindi di kon swaki èn meki den anu di e anga kisi krakti baka. 13 Tan waka a yoisti pasi, so taki a futu di malengri no kmoto na en skrufu, ma taki a kon betre. 14 Du muiti fu libi bun nanga ala sma èn fu kon santa, bika nowan sma no o si Masra efu a no santa. 15 Ma un musu de na ai, so taki Gado kan sori unu alamala bun-ati. Luku bun taki nowan takru rutu bigin gro, bika dati kan tyari problema kon èn a kan pori furu sma. 16 Luku bun tu taki nowan huruman* de na un mindri noso wan sma di no e warderi santa sani, leki fa a ben de nanga Esau di ben gi wan tra sma a reti fu en di a ben abi leki a fosi pkin, soso fu kan kisi wan preti n’nyan. 17 Bika unu sabi taki bakaten, di a ben wani a blesi, a no kisi en. Aladi a ben e krei watra-ai fu meki en p’pa kenki a besroiti fu en, tòg a no kisi a blesi.

18 Ja, unu no kon krosbei na wan bergi di unu kan si èn fasi, di e bron nanga faya, di abi blaka wolku nanga bigi dungru na en lontu èn pe bigi winti e wai. 19 Unu no yere a b’bari fu wan trompet nanga wan sten di ben e taki. Di a pipel yere a sten disi, den begi Moses fu a sten no taki moro nanga den, 20 bika den kon frede srefsrefi di Gado taki: „Srefi wan meti no musu poti en futu tapu a bergi, noso un musu ston en kiri.” 21 A sani di a pipel si frede den so te, taki Moses srefi ben taki: „Mi e frede, mi e beifi.” 22 Ma unu kon na Sion-bergi, na a foto fu a libilibi Gado. Dati na a Yerusalem na hemel nanga den dusundusun engel 23 di kon makandra. Un kon na a gemeente fu den fosi pkin fu Gado di nen skrifi na ini hemel. Unu kon na Gado di de Krutuman fu ala sma èn nanga yepi fu en santa yeye a meki unu tron ret’ati sma di bun na ala fasi. 24 Unu kon na Yesus, a mindriman fu wan nyun ferbontu, di natnati wi nanga a brudu fu en. A brudu disi e taki na wan moro betre fasi leki a brudu fu Abel.

25 Luku bun taki unu no trangayesi* a sma di e taki nanga unu. Den wan di ben trangayesi a sma di ferteri den den warskow di Gado ben gi sma na grontapu, no ben man wai pasi gi strafu. Sobun, wi no o man wai pasi gi strafu tu efu wi drai wi baka gi a sma di e taki kmoto fu hemel! 26 Na a ten dati a sten fu Gado seki grontapu. Ma now a pramisi: „Mi o seki grontapu ete wan leisi. Ma a no grontapu w’wan. Mi o seki hemel tu.” 27 We, den wortu „ete wan leisi”, e sori taki Gado o puru den sani di man seki, dati na sani di Gado no ben meki, so taki den sani di no man seki, kan tan. 28 Fu dati ede, now di wi sabi taki wi o kisi wan Kownukondre di no man seki, dan meki wi du ala muiti so taki Gado tan sori wi bun-ati. Na dati o meki taki wi man du santa wroko gi Gado na wan fasi di a feni bun, fu di wi e frede en èn e lespeki en. 29 Bika a Gado fu wi de leki wan faya di e bron ala sani.