Gi den Hebrewsma

5 Ibri granpriester di teki puru na mindri libisma kisi a wroko fu Gado fu yepi libisma, so taki a kan tyari kado nanga srakti-ofrandi fu tapu den sondu fu sma. 2 A priester disi man sori sar’ati gi den wan di no e ferstan sani bun èn di e meki fowtu, fu di a sabi taki ensrefi abi swakifasi tu. 3 Dati meki a musu tyari ofrandi gi en eigi sondu, neleki fa a e tyari ofrandi gi den sondu fu a pipel.

4 Boiti dati, wan sma no e teki a grani disi fu di ensrefi wani, ma a e kisi en soso te Gado poti en na wroko, neleki fa a ben poti Aron na wroko. 5 Na so Krestes no poti ensrefi leki granpriester fu gi ensrefi glori, ma a sma di ben taigi en: „Yu na mi manpkin. Tide mi tron yu p’pa”, na en ben gi en glori. 6 Na wan tra presi a e taki tu: „Yu na wan priester fu têgo, neleki Melkiseidek.”

7 Krestes ben e begi fayafaya di a ben e libi na grontapu. A ben e bari èn a ben e krei. Nanga en heri ati a ben e suku yepi na a sma di ben man puru en na dede. Na fu di a ben lespeki Gado, meki Gado arki den begi fu en. 8 Aladi a ben de a Manpkin fu en, tòg den pina di a ben musu nyan leri en fa fu gi yesi. 9 Baka di a du ala san a ben musu du, a kisi a frantwortu fu sorgu taki ala den sma di e du san a taki kisi ferlusu fu têgo, 10 fu di na Gado poti en fu wroko leki granpriester neleki Melkiseidek.

11 Wi abi furu sani fu taki fu Krestes, ma a muilek fu tyari disi kon na krin fu di un yesi kon lesi fu arki. 12 Te yu luku en bun, dan unu ben musu de leriman kba. Tòg a de fanowdu baka taki wan sma e kon leri unu den moro makelek sani fu den santa boskopu fu Gado. Unu kon de sma baka di abi merki fanowdu èn di no man nyan tranga n’nyan. 13 Bika iniwan sma di e tan dringi merki nomo, no sabi a wortu fu Gado,* fu di en na wan yongu pkin ete. 14 Ma tranga n’nyan na gi lepi sma. A de gi sma di leri fa fu gebroiki den ferstan, so taki den kan si krin san bun èn san no bun.