Yohanes skrifi en

14 „No broko un ede. Bribi na ini Gado èn bribi na ini mi tu. 2 Furu tanpresi de na ini na oso fu mi P’pa. Efu dati no ben de so, dan mi ben o taigi unu. Mi e gwe fu sreka wan presi gi unu. 3 Te mi gwe èn mi sreka wan presi gi unu kba, dan mi o kon baka èn mi o teki unu na ini oso, so taki unu kan de pe mi de. 4 Unu sabi a pasi fu doro a presi pe mi e go.”

5 Tomas taigi en: „Masra, wi no sabi pe yu e go, dan fa wi kan sabi a pasi?”

6 Yesus taigi en: „Mi na a pasi, a waarheid nanga a libi. Nowan sma kan kon na a P’pa sondro mi. 7 Efu unu ben sabi mi, unu ben o sabi mi P’pa tu. Ma now unu o sabi en. Fu taki en krin, unu si en kba.”

8 Filipus taigi en: „Masra, sori wi a P’pa, dan dati nofo kba gi wi.”

9 Yesus taigi en: „Filipus, so langa mi de nanga unu kba èn tòg yu no sabi mi? A sma di si mi, si a P’pa tu. Fu san ede yu e aksi: ’Sori wi a P’pa’? 10 Yu no e bribi taki mi de wán nanga a P’pa èn taki a P’pa de wán nanga mi? Den sani di mi e taigi unu, a no san mi srefi e prakseri, ma na a P’pa e gebroiki mi fu du sani gi en èn ala ten a de wán nanga mi. 11 Unu kan bribi mi taki mi de wán nanga a P’pa èn taki a P’pa de wán nanga mi. Efu unu no wani bribi san mi taki, dan bribi den sani di mi e du. 12 Mi e taigi unu: A sma di e bribi na ini mi, o du den sani tu di mi e du. A o du moro bigi sani leki den sani disi, fu di mi e go na a P’pa. 13 Èn mi o du ala sani di unu e aksi na ini mi nen, so taki a Manpkin kan gi a P’pa glori. 14 Efu unu aksi wan sani na ini mi nen, mi o du dati.

15 Efu unu lobi mi, unu o du san mi e taigi unu. 16 Mi o aksi a P’pa èn a o gi unu wan tra yepiman* fu de nanga unu ala ten. 17 A yepiman na a santa yeye di e sori san tru. Grontapusma no man kisi a yeye disi, fu di den no e si en èn den no sabi en. Ma unu sabi a yeye disi, fu di a e tan nanga unu èn a de na ini unu. 18 Mi no o gwe libi unu leki pkin di no abi p’pa nanga m’ma, ma mi o kon na unu baka. 19 Ete wan syatu pisi ten, dan grontapu no o si mi moro. Ma unu o si mi, fu di mi e libi go doro èn unu o libi tu. 20 Na a ten dati, unu o sabi taki mi de wán nanga mi P’pa. Unu o sabi tu taki unu de wán nanga mi èn taki mi de wán nanga unu. 21 Efu wan sma arki den wet fu mi èn a e du san den e taki, dan a sma disi lobi mi. Mi P’pa o lobi a sma di lobi mi èn mi o lobi en tu. Mi o sori en krin suma na mi.”

22 Yudas (a no Yudas Iskariot) taigi en: „Masra, fu san ede yu wani sori unu krin suma na yu, ma yu no wani sori grontapu dati?”

23 Yesus piki en: „Efu wan sma lobi mi, a o du san mi taki èn mi P’pa o lobi en. Dan mi nanga mi P’pa o kon na a sma dati èn wi o tan nanga en. 24 A sma di no lobi mi, no e du san mi taki. Den sani di mi e taigi unu no e kon fu mi, ma fu a P’pa di seni mi kon.

25 Mi e taigi unu den sani disi now di mi de nanga unu ete. 26 Ma a yepiman, sobun a santa yeye di a P’pa o seni kon na ini mi nen, o leri unu ala sani èn a o meki unu memre ala den sani di mi taigi unu. 27 Freide mi e libi gi unu. A freide di mi e gi unu, no de leki a di fu grontapu. No broko un ede èn no frede. 28 Unu yere taki mi taigi unu: Mi e gwe, ma mi o kon baka na unu. Efu unu lobi mi, dan unu o breiti taki mi e go na a P’pa, bika a P’pa bigi moro mi. 29 Mi e taigi unu a sani disi now, fosi a psa, so taki unu kan bribi te a e psa. 30 Mi no o taki furu nanga unu moro, bika a tiriman fu grontapu e kon. A no abi krakti na mi tapu. 31 Mi e du san a P’pa taigi mi fu du, so taki grontapu kan sabi taki mi lobi a P’pa. Opo, kow gwe fu dya.