Yeremia
50 Yehovah gi Profeiti Yeremia wan boskopu di abi fu du nanga Babilon, a kondre fu den Kaldeyasma. A taki:
2 „Taigi ala pipel èn ferteri ala sma a sani disi.
Poti wan fraga* meki ala sma si dati.
Ferteri sma na ala sei, no kibri noti gi den!
Taki: ’Den teki Babilon abra.
Bel kisi syen.
Merodak kon frede.
Den popki fu Babilon kisi syen.
Den fisti gado* fu Babilon kon frede.’
3 Bika wan kondre kon fu noordsei fu kon feti nanga Babilon.
Sma e skreki fu si san a kondre dati du nanga Babilon.
Nowan sma e libi drape moro.
Den libisma nanga den meti lowe.
Den alamala gwe.”
4 Yehovah taki: „Na a ten dati den Israelsma nanga den sma fu Yuda o kon makandra. Den o krei te den e waka kon. Leki wán grupu den o suku Yehovah, a Gado fu den. 5 Den o aksi sortu pasi e go na Sion, dan den o drai go na a sei dati. Den o taki: ’Kow meki wan ferbontu nanga Yehovah fu ala ten di nowan sma o fergiti.’ 6 A pipel fu mi tron leki skapu di lasi. Den skapuman fu den meki den lasi pasi. Den tyari den go na den bergi èn den meki den waka fu a wan bergi go na a trawan. Den fergiti pe a tanpresi fu den de. 7 Ala sma di feni den, nyan den. Den feanti fu den taki: ’A no wan ogri wi e du, bika den sondu teige Yehovah, a tanpresi fu retidu. Iya, den sondu teige Yehovah, a howpu fu den afo fu den.’”
8 „Un lowe kmoto fu Babilon.
Un gwe libi a kondre fu den Kaldeyasma.
Un musu tron leki den meti di e waka na fes’sei fu na ipi.
9 Bika mi o meki furu bigi pipel kmoto na noordsei
fu kon feti nanga Babilon.
Den o seti densrefi fu kon feti nanga en
èn den o teki en abra.
Den peiri fu den de leki den peiri fu wan srudati
di e kiri pkin sondro fu sari den.
Den no e misi.
10 Den o teki Kaldeya abra
èn den o teki ala den gudu fu en teleki a sari den”, na so Yehovah taki.
11 „Disi o psa nanga unu fu di unu ben prisiri
èn unu ben breiti di unu fufuru a gudu fu mi.
Unu ben e dyompodyompo leki wan umakaw na ini grasi
èn unu ben e bari leki asi.
12 A m’ma fu unu kisi syen.
Na uma di meki unu, las’ati.
A de wan kondre di no prenspari srefsrefi.
A de wan drei sabana èn wan presi pe watra no de.
13 Fu di Yehovah ati bron na en tapu, meki nowan sma o tan drape moro.
A heri kondre o tron wan brokopresi.
Iniwan sma di e waka psa Babilon o luku nanga opo mofo
èn a o froiti te a si den ogri di miti Babilon.
14 Un alamala di e sutu nanga bo,
seti unsrefi lontu Babilon fu go feti nanga en.
Un sutu na en tapu. Sutu ala un peiri,
bika a sondu teige Yehovah.
15 Meki b’bari na ala sei te unu e go feti nanga en.
A gi ensrefi abra.*
Den pilari fu en fadon èn den skotu fu en fadon broko,
bika Yehovah en ati e bron.
Un puru atibron na tapu Babilon.
Den sani di a du, na dati un musu du nanga en tu.
16 Na Babilon un musu kiri den sma di e sai
èn den sma di e koti n’nyan na kotiten.
Na wan ogr’ati fasi sma o kon feti nanga Babilon nanga fet’owru.
Dati meki sma o lowe go baka na den eigi pipel èn na den eigi kondre.
17 Israel na wan skapu di lasi. Den lew meki a lasi pasi. A kownu fu Asiria nyan en fosi. Baka dati Kownu Nebukadnesar* fu Babilon kawkaw den bonyo fu en. 18 Fu dati ede Yehovah di e tiri den legre, a Gado fu Israel, taki: ’Neleki fa mi ben strafu a kownu fu Asiria, na so mi o strafu a kownu fu Babilon nanga a kondre fu en. 19 Dan mi o tyari Israel kon baka na a weigron fu en èn a o nyan grasi na Karmel nanga Basan. Na den bergikontren fu Efrayim nanga Gilead a o nyan en bere furu.’”
20 Yehovah taki: „Na a ten dati
den o suku den fowtu fu Israel,
ma den no o feni noti.
Den no o feni nowan sondu fu Yuda.
Bika mi o gi den sma di mi no kiri, pardon.”
21 Yehovah taki: „Go feti nanga a kondre Meratayim èn nanga den sma di e libi na Peikod.
Kiri ala den sma drape èn pori ala sani krinkrin.
Du ala san mi taigi yu fu du.
22 A b’bari fu feti de fu yere na ini a kondre.
Ala sani pori krinkrin.
23 Luku fa a mokro di masi ala den pipel fu grontapu, kon broko now!
Babilon pori na so wan fasi taki den pipel skreki fu si en!
24 Babilon, mi seti wan val gi yu èn a kisi yu,
ma yu no sabi dati srefi.
Den feni yu èn den grabu yu,
fu di yu ben opo yusrefi teige Yehovah.
25 Yehovah opo en maksin
èn a tyari en fetsani kon na doro fu di en ati e bron.
A Moro Hei Masra Yehovah di e tiri den legre abi wan wroko fu du
na ini a kondre fu den Kaldeyasma.
26 Fu farawe un musu kon feti nanga en.
Opo den maksin fu en.
Poti ala sani fu en na tapu ipi neleki fa sma e du nanga aleisi.
Un pori en krinkrin.
No meki nowan sma fu en tan na libi.
27 Kiri ala den yongu mankaw fu en.
Srakti den alamala.
A kba gi den, bika a dei fu den doro.
A ten doro fu strafu den!
28 Wan b’bari de fu yere.
Na a b’bari fu den sma di e lon gwe èn di e lowe kmoto na a kondre Babilon
fu ferteri na Sion taki wi Gado Yehovah puru atibron tapu Babilon.
Na fu en tempel ede a puru atibron na en tapu.
29 Taigi ala den man di e sutu nanga bo
taki den musu go feti nanga Babilon.
Seti kampu lontu en. No meki nowan sma lowe.
Pai en gi ala sani di a du.
Den sani di a du, na dati un musu du nanga en,
bika a prefuru fu opo ensrefi teige Yehovah,
a Santawan fu Israel.
30 Fu dati ede den yongu man fu en o fadon na den pren*
èn na a dei dati ala den srudati fu en o dede”,* na so Yehovah taki.
31 A Moro Hei Masra Yehovah di e tiri den legre taki: „Yu tranga-ede Babilon, mi o kon feti nanga yu.
A ten o kon te mi o strafu yu.
32 Yu tranga-ede Babilon, yu o stotu yu futu èn yu o fadon.
Nowan sma o opo yu baka.
Mi o sutu faya gi den foto fu yu
èn a o bron ala sani na yu lontu.”
33 Yehovah di e tiri den legre taki:
„Sma e pina den sma fu Israel nanga Yuda.
Ala den sma di tyari den gwe nanga tranga grabu den hori.
Den no wani lusu den.
34 Ma a sma di bai den baka tranga.
Yehovah di e tiri den legre na en nen.
A o opo taki gi den na fesi krutu.
Na so a o sorgu taki ala sani waka bun na ini a kondre.
Ma a o bruya den sma di e libi na Babilon.”
35 Yehovah taki: „Wan fet’owru o naki den Kaldeyasma,
den sma di e libi na Babilon èn den granman nanga den koniman fu den.
36 Wan fet’owru o naki den sma di e taki soso sani* èn den o du don sani.
Wan fet’owru o naki den srudati èn den o kon frede.
37 Den feanti o pori den fetwagi èn den o kiri den asi.
Te den o kon feti nanga ala den trakondre sma di e tan drape,
dan den sma disi o swaki leki umasma.
Den o pori den gudu fu den èn den o tyari ala sani gwe.
38 Wan ogri sani o psa nanga a liba.
A o kon drei fu di a kondre lai nanga afkodrei-popki.
Den sma di e anbegi den e du law sani fu di den kisi takru dren.
39 Den meti di e tan na ini a sabana, den sabanadagu di e bari krei
nanga den stroisfowru o tan drape.
Noiti moro sma o tan drape
èn noiti moro sma o libi na a presi dati.”
40 Yehovah taki: „Mi o drai en tapu neleki Sodom, Gomora nanga den foto na ini a birti fu den. Nowan sma o tan na a presi dati èn nowan sma o libi drape.
41 Luku! Wan pipel e kon fu noordsei.
Wan bigi pipel nanga makti kownu o kon
fu den moro fara presi fu grontapu.
42 Den o kon nanga bo èn nanga lansri.
Den abi ogr’ati èn den no e sari sma.
A b’bari fu den de leki a b’bari fu wan krasi se.
Na tapu asi den e rèi.
Leki wán man den o kon feti nanga yu, umapkin fu Babilon.
43 A kownu fu Babilon yere wan boskopu di abi fu du nanga den.
Dati meki a las’ati.
Na soso frede a e frede.
A abi pen leki wan uma di de fu meki wan pkin.
44 Luku! Wan sma o kon leki wan lew di kmoto na wan bigi busbusi na sei Yordan-liba. A o go na den weigron pe nowan skapu e frede. Ma wantronso mi o meki den* lon gwe libi den weigron. Dan mi o poti wan sma drape leki tiriman. Bika suma man de leki mi? Suma man tapu mi fu du san mi wani? Sortu skapuman man tnapu na mi fesi? 45 Fu dati ede, arki san Yehovah besroiti fu du nanga Babilon èn san a wani du nanga a kondre fu den Kaldeyasma:
Na fu den ede, a o meki a weigron fu den tron wan brokopresi
èn sma o srepi den pkin skapu fu na ipi gwe.
46 Te den o teki Babilon abra, wan bigi b’bari o de fu yere èn grontapu o seki.
Na mindri den pipel wan b’bari o de fu yere.”