A fosi brifi fu Yohanes

5 Ibri sma di e bribi taki Yesus na a Krestes na wan pkin fu Gado èn ibri sma di lobi Gado lobi den pkin fu en tu. 2 Efu wi lobi Gado èn wi e hori wisrefi na den wet fu en, dan wi o lobi den pkin fu Gado. 3 Te wi lobi Gado, dan wi o hori wisrefi na den wet fu en. Ma den wet fu en no de wan hebi. 4 Ala den pkin fu Gado* e wini grontapu. Na a bribi fu wi meki taki wi wini grontapu.

5 Suma man wini grontapu? A no a sma di e bribi taki Yesus na a Manpkin fu Gado? 6 Bika di Yesus kon, a dopu nanga watra èn a gi en brudu leki ofrandi. Dus a no kon nanga watra w’wan, ma a kon nanga brudu tu. A yeye na wan kotoigi fu disi èn a yeye e taki san tru. 7 Dri kotoigi de: 8 A yeye, a watra nanga a brudu. Den dri sani disi e tyari a srefi sani kon na krin.

9 Wi e bribi san libisma e taki, ma san Gado e taki moro prenspari. Gado taki krin suma na en Manpkin. 10 A sma di e bribi na ini a Manpkin fu Gado e bribi den sani di Gado taigi en. A sma di no e bribi Gado e kari Gado wan leiman, bika a no e bribi den sani di Gado taki fu en Manpkin. 11 Gado sori wi krin taki a gi wi têgo libi. A gebroiki en Manpkin fu gi wi a libi disi. 12 A sma di e bribi na ini a Manpkin abi têgo libi. A sma di no e bribi na ini a Manpkin fu Gado no abi têgo libi.

13 Mi e skrifi den sani disi gi unu, so taki unu kan sabi taki unu o kisi têgo libi, bika unu e bribi na ini a nen fu a Manpkin fu Gado. 14 Wi de seiker taki awinsi san wi e aksi en, a e yere wi, solanga na wan sani di a feni bun. 15 Efu wi de seiker taki a e yere wi, awinsi san wi e aksi en, dan wi o de seiker tu taki wi o kisi den sani di wi aksi fu di na en wi aksi den sani disi.

16 Efu wan sma e si taki a brada fu en e du wan sondu di no e tyari dede kon, dan a musu begi gi en èn Gado o gi en libi. Disi abi fu du nanga den sma di no e du sondu di e tyari dede kon. Ma wan sondu de di e tyari dede kon. Mi no taigi unu fu begi gi den sma di du a sortu sondu disi. 17 Ala ogri di sma e du, na sondu. Tòg wan sondu de di no e tyari dede kon.

18 Wi sabi taki den pkin fu Gado no abi a gwenti fu du sondu. A Manpkin fu Gado e kibri den, so taki Didibri* no man du den noti.* 19 Wi sabi taki wi na fu Gado, ma heri grontapu de na ini a makti fu Didibri.* 20 Ma wi sabi tu taki a Manpkin fu Gado kon èn a opo wi ai* fu kon sabi a tru Gado. Gado en Manpkin Yesus Krestes yepi wi fu de wán nanga a tru Gado di e gi sma têgo libi. 21 Mi pkin, luku bun nanga falsi gado.