Esekièl

8 Na a di fu feifi dei fu a di fu siksi mun na ini a di fu siksi yari, mi ben e s’don na ini mi oso èn den fesiman fu Yuda ben e s’don na mi fesi. Drape a krakti fu a Moro Hei Masra Yehovah kon na mi tapu. 2 Na ini wan fisyun mi si wan sma di gersi faya. Fu en dyonku* go na ondrosei, faya ben de èn fu en dyonku go na loktu wan sani ben de di gersi wan leti. A ben e brenki leki gowtu di moksi nanga solfru. 3 Ne a langa wan sani di gersi wan anu èn a grabu mi na mi ede-w’wiri. Na ini a fisyun di mi kisi fu Gado, wan yeye opo mi na mindri grontapu nanga hemel, dan a tyari mi go na Yerusalem. A tyari mi go na a portu di de na noordsei fu a pkin tempel-dyari. Drape wan popki de di e meki Gado dyarusu. 4 Ne mi si a glori fu a Gado fu Israel drape, leki san mi ben si na a lagipresi.

5 Dan a taigi mi: „Manpkin fu libisma, grantangi, luku go na noordsei.” Dati meki mi luku go na noordsei. Ne mi si wan popki di e meki Gado dyarusu. A ben de na noordsei, na fesi a portu pe na altari de. 6 A taigi mi: „Manpkin fu libisma, yu e si sortu ogri den Israelsma e du? Den e meki taki mi no wani kon krosbei fu mi santapresi. Ma yu o si moro ogri sani srefi.”

7 Dan a tyari mi go na a portu fu a dyari. Ne mi si wan olo na ini a skotu. 8 A taigi mi: „Manpkin fu libisma, grantangi, meki na olo na ini a skotu kon moro bigi.” Ne mi meki na olo kon moro bigi, dan mi si wan doro. 9 A taigi mi: „Go na insei èn luku sortu groskin sani den e du drape.” 10 Dati meki mi go na insei fu luku san den ben e du. Ne mi si taki den Israelsma kerfu ala sortu meti di e kroipi na gron, ala sortu meti di no krin èn ala den fisti gado* fu den, na tapu a heri skotu. 11 Seibitenti fesiman fu Israel ben tnapu na fesi den sani disi, makandra nanga Yasanya, a manpkin fu Safan. Ibriwan fu den ben abi wan pan na ini en anu fu bron switismeri èn a smoko fu a switismeri ben opo go na loktu. 12 Dan a taigi mi: „Manpkin fu libisma, yu si san den fesiman fu Israel e du na ini a dungru? Yu e si san den e du na ini den kamra pe den poti den popki di den e anbegi? Den e taki: ’Yehovah no e si wi. Yehovah gwe libi a kondre.’”

13 Dan a taigi mi: „Yu o si taki den e du moro ogri sani srefi.” 14 Ne a tyari mi go na fesi a portu fu na oso fu Yehovah na noordsei. Drape mi si den uma di ben e s’don e krei gi a gado Tamus.

15 A taigi mi tu: „Manpkin fu libisma, yu si san den e du? Ma now yu o si sani di ogri moro leki disi.” 16 Ne a tyari mi go na a pkin dyari di ben de lontu na oso fu Yehovah. Na a portu fu a tempel fu Yehovah, na mindri a stupu nanga na altari, mi si sowan 25 man. Den ben tnapu nanga den baka go na a tempel fu Yehovah èn a fesi fu den ben drai go na owstusei. Den ben boigi gi a son na owstusei.

17 Dan a taigi mi: „Manpkin fu libisma, yu si san den e du? Na denki den sma fu Yuda e denki taki den sani disi no ogri so? Den furu a kondre nanga ogridu. Den e tan du sani fu meki mi ati bron. Luku fa den e langa wan fisti sani* kon na mi noso. 18 Fu di mi ati e bron srefsrefi, meki mi o strafu den. Mi no o firi gi den èn mi no o sori sar’ati gi den tu. Den o bari kari mi fu yepi den, ma mi no o arki den.”