A di fu tu brifi gi den Korentesma

9 We, a no de fanowdu taki mi e skrifi unu fu a wroko di unu e du gi den santawan, 2 bika mi sabi taki unu de klarklari fu yepi trawan. Na fu a sani dati mi e meki bigi gi unu na den Masedoniasma. Mi ferteri den taki wan heri yari kba, unu di de na ini Akaya, de srekasreka fu yepi. A faya di unu abi, gi furu fu den dek’ati fu yepi tu. 3 Fu dati ede, mi e seni den brada kon na unu, so taki den kan si taki a no fu soso wi meki bigi gi unu na ini a tori disi, ma taki unu de srekasreka trutru soleki fa mi ben taki fu unu. 4 Bika efu den Masedoniasma ben o kon nanga mi èn den si taki unu no de srekasreka, dan wi nanga unu ben o kisi syen fu di wi ben de seiker taki unu ben o seti ala sani. 5 Fu dati ede mi ben feni en fanowdu fu aksi den brada fu kon na unu fosi mi èn fu sreka den sani di unu pramisi fu gi nanga un heri ati. Na so den sani o de srekasreka te wi doro èn a o de krin taki unu gi disi nanga un heri ati èn no fu di sma dwengi unu.

6 Ma un musu sabi taki a sma di e sai pkinso nomo o koti pkinso tu èn a sma di e sai furu o koti furu tu. 7 Meki ibri sma gi soleki fa a besroiti na ini en ati. A no musu du dati nanga krutukrutu* noso fu di sma dwengi en, bika Gado lobi a sma di e gi sani nanga prisiri.

8 Boiti dati, Gado man sori unu ala en bun-ati. Dati meki ala ten unu o abi ala san unu abi fanowdu èn unu o abi furu sani fu man du ala sortu bun wroko. 9 (A de soleki fa Gado Buku taki: „Na ala sei a e prati sani gi sma.* A e gi den pôtiwan sani tu. Fu têgo a o du san reti.” 10 We, a sma di e gi a saiman furu siri èn di e gi sma brede fu nyan, o gi unu a siri di un musu sai èn a o meki den siri kon moro furu. A o meki unu kisi furu wini fu den bun sani di unu e du.) 11 Gado e blesi unu na ini ala sani, so taki unu kan du furu bun gi trawan na ala sortu fasi. Dati meki sma o taki Gado tangi fu den sani di unu seni gi den. 12 Bika a wroko di unu e du fu a bun fu trawan, a no soso fu gi den santawan ala san den abi fanowdu. Ma a e meki taki furu sma e taki Gado tangi tu. 13 Te sma si den bakapisi fu a wroko disi, dan den o gi Gado glori. Den o si taki unu e gi yesi na a bun nyunsu fu Krestes, soleki fa unu e preiki. Den o gi Gado glori tu fu di unu lobi fu gi den sani èn fu di unu lobi fu gi tra sma sani tu. 14 Boiti dati, den e begi fayafaya gi unu èn den e sori taki den lobi unu, fu di Gado sori unu a bun-ati fu en di bigi moro ala tra sani.

15 Grantangi fu Gado taki a gi wi a bigi kado disi.