Yeremia

41 Ismael ben de a manpkin fu Netanya, a granpkin fu Elisama èn a bakapkin fu wan kownu. A ben de wan fu den prenspari man fu Kownu tu. Na a di fu seibi mun Ismael nanga ete tin man kon na Gedalia na Mispa èn den bigin nyan nanga makandra. 2 Dan Ismael, a manpkin fu Netanya, nanga den tin man opo teki den fet’owru èn den kiri Gedalia di ben de a manpkin fu Ahikam èn a granpkin fu Safan. Na so den kiri a sma di a kownu fu Babilon ben poti fu tiri a kondre. 3 Boiti dati, Ismael kiri ala den Dyu nanga den srudati fu den Kaldeyasma di ben de drape nanga Gedalia na Mispa.

4 Na a di fu tu dei, nowan sma no ben sabi ete taki den kiri Gedalia. 5 Ne 80 man fu Sikem, Silo nanga Samaria kon na a oso fu Yehovah fu tyari n’nyan-ofrandi nanga switismeri. Den ben koti den barba puru, den ben priti den krosi èn den ben kotkoti den skin. 6 Ismael, a manpkin fu Netanya, kmoto na Mispa fu go miti den. Nanga watra-ai a waka go miti den èn a taki: „Un kon na Gedalia, a manpkin fu Ahikam.” 7 Ma di den doro na ini a foto, dan Ismael, a manpkin fu Netanya, nanga den man fu en kiri den. Baka dati den trowe den na ini wan peti.

8 Ma tin fu den man taigi Ismael: „No kiri wi. Wi kibri tarwe, groto,* oli nanga oni na den gron.” Fu dati ede a no kiri den di a kiri den tra man. 9 A peti pe Ismael ben trowe ala den dedeskin fu den man, ben de wan bigi peti di Kownu Asa ben meki na a ten di Kownu Bayesa fu Israel ben kon feti nanga en. Na a peti dati Ismael, a manpkin fu Netanya, ben furu nanga den dedeskin fu den man di a kiri.

10 Baka dati Ismael teki den umapkin fu Kownu nanga ala den tra sma di ben de ete na Mispa èn a tyari den gwe. Nebusaradan, na edeman fu den waktiman, ben poti Gedalia, a manpkin fu Ahikam, leki tiriman fu den sma disi. Ma Ismael, a manpkin fu Netanya, dwengi den sma disi fu go nanga en. A ben wani meki den abra nanga en go na a kondre fu den Amonsma.

11 Yohanan, a manpkin fu Kareya, nanga ala den legre-edeman di ben de nanga en ben kon yere ala den ogri di Ismael, a manpkin fu Netanya, ben du. 12 Dati meki den teki ala den srudati èn den hari go feti nanga Ismael, a manpkin fu Netanya. Ne den feni en na Gibeon na a presi pe furu watra de.*

13 Ala den sma di Ismael ben tyari gwe, bigin bari fu prisiri di den si Yohanan, a manpkin fu Kareya, nanga ala den legre-edeman di ben de nanga en. 14 Ne ala den sma fu Mispa di Ismael ben dwengi fu go nanga en, drai gwe baka nanga Yohanan, a manpkin fu Kareya. 15 Ma Ismael, a manpkin fu Netanya, nanga aiti man fu en lowe gi Yohanan. Den go na den Amonsma.

16 Dan Yohanan, a manpkin fu Kareya, nanga ala den legre-edeman di ben de nanga en, fri ala den sma di ben tan abra. Ismael, a manpkin fu Netanya, ben dwengi den sma disi fu gwe libi Mispa, baka di a ben kiri Gedalia, a manpkin fu Ahikam. Na so ala den heihei man, den srudati, den man, den uma nanga den pkin kmoto na Gibeon. 17 Ne den go tan na wan presi pe Kimham ben e yuru kamra gi sma na ini a birti fu Betlehem. Den ben wani go na Egepte 18 fu di den ben wani lowe gi den Kaldeyasma. Den ben e frede den Kaldeyasma fu di Ismael, a manpkin fu Netanya, ben kiri Gedalia, a manpkin fu Ahikam, di a kownu fu Babilon ben poti leki tiriman fu a kondre.