A di fu tu brifi gi den Korentesma
11 Mi winsi taki unu ben o abi pasensi nanga mi te a gersi leki mi e meki bigi. Fu taki en leti, unu abi pasensi nanga mi kba! 2 Ma mi e dyarusu gi unu soleki fa Gado e dyarusu gi unu. Mi srefi pramisi taki unu o trow nanga wán masra. Mi wani gi unu na Krestes leki wan uma di krin èn di no sribi nanga wan man ete. 3 Ma mi e frede taki sma kan pori un ferstan, neleki fa a sneki kori Eva nanga lei. Dan unu no o de ret’ati sma èn krin sma moro soleki fa un musu de gi Krestes. 4 Bika te wan sma e kon preiki fu wan tra Yesus di no de a srefi leki a wan di wi preiki fu en, noso te wan sma e kon nanga wan tra denki di no de a srefi leki a wan di unu abi èn te wan sma e ferteri unu wan tra bun nyunsu leki a wan di unu e bribi kba, dan es’esi unu e bribi en. 5 Mi feni taki den kfalek bun apostel fu unu no bun moro mi. 6 Ma awinsi mi no man taki so bun, tòg mi no e mankeri sabi kwetkweti. Wi sori unu dati na ala fasi èn na ini ala sani.
7 Na wan sondu mi du di mi saka misrefi, so taki unu kan kisi grani? Na wan sondu mi du di mi preiki a bun nyunsu fu Gado nanga prisiri gi unu, sondro taki mi aksi unu fu pai mi? 8 Fu tra gemeente mi teki den sani di mi ben abi fanowdu fu yepi unu. A de leki mi ben roof den fu man yepi unu. 9 Ma tòg di mi ben de nanga unu èn mi ben abi sani fanowdu, mi no tron wan hebi gi nowan sma, bika den brada di ben kon fu Masedonia ben gi mi furu sani di mi ben abi fanowdu. Iya, na ala fasi mi sorgu taki mi no tron wan hebi gi unu èn mi o tan du dati. 10 Solanga mi na wan bakaman fu Krestes, mi o tan meki bigi fu a sani disi na ini a heri kontren fu Akaya. 11 Fu san ede mi no ben wani de wan hebi gi unu? Na fu di mi no lobi unu? Gado sabi taki mi lobi unu.
12 Ma mi o tan go doro nanga san mi e du, so taki den sma di wani sori taki den de leki wi no man meki bigi srefsrefi fu den sani di den du. 13 Bika den man dati na falsi apostel nanga bedrigiman di e du leki den na apostel fu Krestes. 14 Dati no e ferwondru mi, bika Satan srefi e tan du leki en na wan engel fu leti. 15 Fu dati ede a no e ferwondru wi taki den dinari fu en e tan du leki den na dinari fu retidu. Ma bakaten den o kisi pai fu san den du.
16 Mi e taki en ete wan leisi: Nowan sma musu denki taki mi no e gebroiki mi ferstan. Ma efu tòg unu e denki dati, dan un musu teki mi leki wan sma di no e gebroiki en ferstan, so taki mi srefi kan meki bigi pkinso. 17 A fasi fa mi e taki now no de leki fa Krestes ben o taki, ma mi e meki bigi leki wan sma di no e gebroiki en ferstan èn di e fertrow tumsi furu tapu ensrefi. 18 Fu di furu sma e meki bigi fu grontapu sani, dan mi srefi o meki bigi tu. 19 Na fu di unu feni taki unu koni so, meki unu abi pasensi nanga den sma di no e gebroiki den ferstan. Unu e du dati nanga prisiri srefi. 20 Unu abi pasensi nanga iniwan sma di e meki unu tron srafu, iniwan sma di e fufuru den sani fu unu, iniwan sma di e teki ala den sani fu unu, iniwan sma di e si ensrefi moro hei leki unu èn iniwan sma di e naki unu na ini un fesi.
21 Wi e syen fu taki disi, fu di a gersi leki wi swaki tumsi fu du wi wroko na wan bun fasi.
Ma efu tra sma abi a dek’ati fu du wan sani, dan mi srefi abi a dek’ati dati tu. Mi e taki leki wan sma di no e gebroiki en ferstan. 22 Den na Hebrewsma? Misrefi na wan. Den na Israelsma? Misrefi na wan. Den na pkin fu Abraham? Misrefi tu. 23 Den na dinari fu Krestes? We, mi o piki leki wan lawman: Mi na a moro bun dinari fu Krestes. Mi wroko tranga moro den, mi ben de na straf’oso moro furu leki den, mi kisi bun furu fonfon èn furu leisi mi misi fu dede. 24 Feifi leisi den Dyu gi mi 39 wipi. 25 Dri leisi den fon mi nanga tiki èn wan leisi den trowe ston na mi tapu fu kiri mi. Dri leisi a sipi pe mi ben de na ini sungu èn mi psa wan heri dei nanga neti na ini a se. 26 Furu tron di mi ben de na pasi, ogri ben kan miti mi na tapu liba èn fufurman ben suku fu du mi ogri. Mi eigi kondreman nanga trakondre sma ben suku fu du mi ogri. Sma ben wani du mi ogri na ini a foto, ogri ben kan miti mi na ini a sabana èn na se. Sma di ben du leki den na brada ben wani du mi ogri tu. 27 Boiti dati, mi ben abi fu wroko bun tranga, furu leisi mi no ben sribi na neti, angri nanga watra ben e kiri mi. Furu leisi mi no ben abi n’nyan, mi ben e kowru èn mi no ben abi krosi fu tapu mi skin.*
28 Boiti ala den sani disi, ibri dei mi e broko mi ede tu nanga ala den gemeente. 29 Suma swaki, dan mi no swaki? Fa mi ati no kan bron te wan sma e meki wan trawan fadon?
30 Efu mi musu meki bigi, dan mi o meki bigi fu den sani di e sori taki mi swaki. 31 A Gado èn P’pa fu Masra Yesus, iya, a sma di musu kisi prèise fu têgo, sabi taki mi no e lei. 32 Di mi ben de na ini Damaskus, a granman di e wroko gi Kownu Areitas, poti waktiman na den portu fu a foto fu di a ben wani kisi mi. 33 Ma a no ben man kisi mi fu di den brada poti mi na ini wan baskita èn den saka mi kmoto na wan fensre di ben de na a skotu fu a foto.