Gi den Romesma
3 We, sortu wini sma abi te den de Dyu noso te den besnèi? 2 Na ala fasi furu wini de. Na a fosi presi, den abi wini fu di Gado gi den a santa wortu fu en. 3 Ma fa a de nanga son sma dan? Efu den no abi bribi, dan disi wani taki dati Gado no o du san a pramisi? 4 Kwetikweti! Gado e taki san tru, awansi ala sma na leiman. A de soleki fa Gado Buku taki: „So taki a sa kon na krin taki yu na wan reti-ati sma te yu e taki èn so taki yu sa wini te den e krutu yu.” 5 Ma efu a kruktudu fu wi e sori taki Gado e du san reti, san wi sa taki dan? Wi kan taki dati Gado no e du san reti te a e sori en bigi atibron? (Mi e taki na wan fasi di libisma man frustan makriki.) 6 Kwetikweti! Fa Gado o krutu grontapu dan?
7 Ma kon meki wi taki dati na lei mi e lei. Efu disi e sori moro krin taki Gado e taki san tru èn sma e prèise en fu dati ede, dan fu san ede mi e kisi krutu leki wan sondari? 8 Dan a moro bun fu taki: „Meki wi du ogri, so taki wan bun kan kon fu dati.” Son sma e lei gi wi taki na so wi e taki. Ma a strafu di den o kisi fiti den.
9 We dan, wi bun moro den? Kwetikweti! Bika wi taki kaba dati Dyu nanga Grikisma abi sondu. 10 A de soleki fa Gado Buku taki: „Nowan reti-ati sma de, nôno, nowan no de. 11 Nowan sma abi frustan, nowan sma e suku Gado. 12 Ala sma gowe libi a reti pasi, den alamala kon tron sma di no warti noti. Nowan fu den e du bun, nôno, nowan fu den.” 13 „A gorogoro fu den de leki wan opo grebi, èn den e bedrigi sma nanga den mofo.” „Den mofobuba abi vergif fu wan takru sneki.” 14 „Den mofo furu nanga fluku èn den e taigi sma soso hati sani.” 15 „Nanga den futu den e lon go kiri sma.” 16 „Ala presi pe den e go, den e tyari pori nanga pina kon. 17 Den no sabi fa fu libi bun nanga sma.” 18 „Den no abi lespeki gi Gado kwetikweti.”
19 Now wi sabi taki ala sani di a Wèt taki, de gi den sma di musu hori a Wèt. Dan nowan sma o abi wan sani fu taki èn heri grontapu o kisi strafu fu Gado. 20 Fu dati ede, a no te wan sma e du san a Wèt taki, dan Gado o si en leki wan reti-ati sma. Ma a Wèt e meki wi kon sabi finifini san na sondu.
21 Ma now a kon na krin taki Gado kan si wan sma leki reti-ati sma awinsi a no e hori a Wèt. A Wèt nanga den buku fu den Profeiti ben taki fu a sani disi tu. 22 Iya, Gado kan si wan sma leki reti-ati sma te a e bribi na ini Yesus Krestes. Disi de so gi ala den sma di e bribi. Bika ala sma na a srefi. 23 Ala sma sondu èn den no man sori a glori fu Gado kwetikweti. 24 Ma na bun-ati fu Gado meki a e si sma leki reti-ati sma nanga yepi fu a lusu-paiman di Krestes Yesus pai èn di e tyari frulusu kon. Disi de leki wan kado di Gado gi sma. 25 Gado gi Krestes leki wan ofrandi di e meki sma kon bun baka nanga Gado te den e bribi na ini a brudu fu Krestes. Gado du disi fu sori taki a e du san reti, bika a sori pasensi èn a gi sma pardon fu den sondu di den du na ini a ten di pasa. 26 Na so Gado sori sma na ini a ten disi taki a e du san reti èn taki a e si sma leki reti-ati sma te den e bribi na ini Yesus.
27 We dan, wan sma kan meki bigi ete? Kwetikweti. Sortu wèt e tapu en fu du dati? Na a wèt di e taki dati den sani di a e du prenspari? Nôno, na a wèt di e taki dati a musu abi bribi. 28 Bika wi e frustan taki Gado e si wan sma leki reti-ati sma te a e bribi èn no te a e du san a wèt e taki. 29 Gado na a Gado fu den Dyu wawan? A no de a Gado fu tra pipel tu? Iya, en na a Gado fu tra pipel tu. 30 Fu di Gado na wán Gado, meki a o si sma leki reti-ati sma te den e bribi, awinsi den besnèi noso no besnèi. 31 We, a de so taki wi no e teri a Wèt moro fu di wi e bribi? Kwetikweti! Na presi fu dati wi e horibaka gi a Wèt.