Odo
8 Koni e kari sma fu arki en
èn ferstan e opo en sten.
2 A e go tnapu na den hei presi na sei pasi
èn na den uku pe den pasi e miti.
3 Koni e tnapu na sei den portu fu a foto,
na den presi pe sma e psa go na ini a foto.
A e tan bari nanga wan tranga sten:
5 Unu di no abi ondrofeni, un kisi ferstan.
Un donsma, un kisi wan koni ati.
6 Arki, bika san mi e taki prenspari
èn mi mofo e taki bun sani.
7 Nanga wan safri sten mi e taki san tru.
Lei na wan sani di mi mofo no lobi srefsrefi.
8 Ala den sani di mi e taki nanga mi mofo tru.
Mi no e taki nowan sani fu bedrigi noso kori sma.
9 A sma di koni e ferstan ala den sani disi.
Den sani disi bun gi den sma di abi sabi.
10 Un teki a warskow fu mi na presi fu teki solfru.
Teki sabi na presi fu teki a moro soifri gowtu,
11 bika koni bun moro koraal-ston.*
Nowan tra sani di wan sma ben o wani kan tnapu na en sei.
12 Mi na koni. Mi nanga ferstan e tan na wán presi.
Mi kisi sabi èn mi leri fa fu denki dipi fu sani.
13 Wan sma di abi bigi lespeki gi Yehovah no wani abi noti fu du nanga ogri.
Mi e teige sma di e meki bigi, di abi heimemre, di e du ogri èn di e taki soso lei nanga den mofo.
14 Mi kan gi sma bun rai èn mi kan sori den fa fu waka nanga koni.
Na mi abi ferstan nanga makti.
15 Na mi e meki taki kownu man tiri
èn taki heihei sma man meki bun wet.
16 Na mi e meki taki granman man tiri
èn taki edeman man koti krutu na wan reti fasi.
17 Mi lobi den sma di lobi mi.
Den sma di e suku mi o feni mi.
19 San mi e gi yu bun moro gowtu, iya, moro soifri gowtu.
San mi abi gi yu warti moro leki a moro bun solfru.
20 Mi e waka na tapu a pasi fu retidu,
iya, mi e waka na mindrisei fu den pasi fu retidu.
21 Mi e gi den sma di lobi mi bun furu gudu.
Mi e span den maksin fu den.
22 Mi na a fosi sani di Yehovah meki,
a foswan fu ala den sani di a meki langa ten psa.
23 Sensi owruten a poti mi na wroko,
iya, sensi a bigin, langa ten fosi grontapu ben de.
24 Di mi gebore, den se no ben de ete.
Na a ten dati watra-olo di lai nanga watra no ben de.
25 A meki mi fosi den bergi ben poti na den presi
èn fosi den pkin bergi ben kon de.
26 Na a ten dati a no ben meki grontapu nanga den wei ete.
A no ben meki a fosi pisi doti srefi.
27 Mi ben de drape di a sreka hemel,
di a poti wan skotu lontu den bigi watra,
28 di a seti* den wolku na loktu,
di a meki den presi pe furu watra de,
29 di a taki te o fara a watra fu se ben musu doro,
di a seti den fundament fu grontapu.
30 Mi ben de na en sei leki wan wrokoman di sabi en wroko heri bun.
Ala dei mi ben e gi en bigi prisiri.
Ala ten mi ben breiti fu di mi ben de nanga en.
31 Mi ben e prisiri te mi ben e luku grontapu pe libisma ben o tan
èn mi ben lobi den libisma* srefsrefi.
32 Sobun mi manpkin, un arki mi,
bika den sma di e arki mi o de koloku.
33 Du san mi e leri unu èn kon kisi koni.
Noiti no si den sani di mi taki leki lawlaw sani.
34 Koloku fu a sma di e arki mi.
Ibri dei a e kon fruku m’manten* na a doro fu mi.
A e wakti na a mofodoro fu mi oso.
35 Bika a sma di feni mi, o feni libi
èn Yehovah o feni en bun.
36 Ma a sma di no wani arki mi e pina ensrefi.
Den sma di e teige mi e suku den dede.”