A fosi brifi gi Timoteyus

4 Ma a yeye fu Gado e taki krin taki na ini a ten di e kon son sma o gowe libi a bribi, fu di den o arki te sma e fruteri den boskopu di gersi leki den komoto fu Gado. Den o poti prakseri na den leri fu ogri yeye. 2 Sma o gowe libi a bribi tu, fu di den arki den lei fu hoigriman. A konsensi fu den hoigriman disi dede neleki na wan faya isri bron en. 3 Den e tapu sma fu trow èn den e taigi sma taki nyanyan-sani de di den no musu nyan, aladi na Gado meki den nyanyan dati fu den sma di abi bribi èn di sabi a tru leri finifini, kan nyan den nanga tangi. 4 Iya, ala sani di Gado meki na bun sani èn wi kan nyan ala sani solanga wi taki Gado tangi fu dati, 5 bika a wortu fu Gado èn begi, e meki den nyanyan-sani kon santa.

6 Te yu gi den brada den rai disi, dan yu o de wan bun dinari fu Krestes Yesus, di kon sabi den wortu fu a bribi èn fu a bun leri di yu ben hori finifini. 7 Ma no arki leitori di e gi Gado porinen, leki den wan di owru uma gwenti fruteri. Na presi fu dati yu musu oefen yusrefi fu dini Gado fayafaya, 8 bika te wi e oefen a skin, dan dati bun gi wan tu sani nomo. Ma te wi e dini Gado fayafaya, dan dati bun gi ala sani, bika dati o meki wi kisi blesi na ini a libi fu wi now èn na ini a ten di e kon. 9 A sani di taki dya de tru èn yu kan bribi en. 10 Na fu dati ede wi e wroko tranga èn e du bun furu muiti, bika wi poti wi howpu tapu wan libilibi Gado, di de wan Frulusuman fu ala sortu sma, spesrutu fu sma di e gi yesi na en ala ten.

11 Tan gi sma den komando disi èn tan leri sma den. 12 No meki nowan sma wisiwasi yu fu di yu yongu. Ma nanga a fasi fa yu e taki, nanga a fasi fa yu e tyari yusrefi, nanga a lobi fu yu, nanga a bribi fu yu èn nanga a krin libi fu yu, yu musu tron wan eksempre gi den sma di e gi yesi na Gado ala ten. 13 Tan meki muiti fu leisi gi sma, fu gi sma deki-ati èn fu gi leri, teleki mi kon. 14 No wisiwasi san Gado gi yu na a ten di den taki profeititori fu yu èn di den owru man fu a gemeente ben poti den anu na yu tapu. 15 Prakseri bun fu den sani disi. Du den nanga yu heri ati, so taki ala sma kan si taki yu e go na fesi. 16 Tan poti prakseri na yusrefi èn na den sani di yu e leri sma. Tan du den sani disi, bika te yu du disi, dan yu o frulusu yusrefi nanga den sma di e arki yu.