Odo

13 Wan boi di koni e teki a pir’ai fu en p’pa,

ma wan spotuman no wani teki rai.*

 2 Na den sani di wan sma e taki kan meki sani waka bun gi en,

ma den bedrigiman e suku nomo fu du sma ogri.

 3 A sma di e luku bun san a e taki nanga en mofo e kibri en libi.

Ma wan taktaki-mofo sma o pori en libi.

 4 A lesiman wani ala sortu sani èn tòg a no abi noti,

ma den sma di e wroko tranga o kisi ala san den wani.*

 5 Wan ret’ati sma no lobi lei srefsrefi.

Ma den sani di den ogrisma e du e tyari soso syen nanga pornen kon.

 6 Retidu e kibri a sma di no e du ogri,

ma ogridu e pori a libi fu wan sondari.

 7 Yu abi sma di e du leki den gudu, ma den no abi notnoti.

Yu abi sma tu di e du leki den pôti, ma den lai gudu.

 8 Wan guduman e pai nanga den gudu fu en fu sma no kiri en,

ma den pôtiwan no abi fu frede srefi taki sma o wani kiri den.

 9 A leti fu den ret’ati sma e skèin krin,*

ma sma o kiri a faya fu a lampu fu den ogrisma.

10 Wan sma di abi heimemre e tyari soso trobi kon,

ma konisma e suku rai.

11 Den gudu di wan sma kisi gawgaw sondro fu wroko fu en o lasi gwe,

ma den gudu fu a sma di e tyari sani kon na wán pkinsopkinso* o kon moro furu.

12 Te wan sma e wakti langa fu kisi san a wani, dan en ati e kon siki,

ma te a kisi san a ben wani, dan dati de leki wan bon di e gi libi.

13 A sma di no e teki rai* o firi den bakapisi,

ma a sma di e lespeki a wet o kisi blesi.

14 A leri* fu den konisma e hori sma na libi.

A e puru den na ini den val di dede seti gi den.

15 Wan sma di koni e meki wan bun nen na trawan,

ma den sani di bedrigiman e du e tyari furu problema kon.

16 Den sani di wan konisma e du e sori taki a abi sabi,

ma a donsma e meki ala sma si fa a don.

17 Wan takr’ati boskopuman e kon na ini problema,

ma wan boskopuman di yu kan fertrow e tyari trowstu kon.

18 A sma di no wani teki pir’ai o kon pôti èn a o kisi syen,

ma a sma di e teki rai* o kisi grani.

19 Te wan sma e kisi san a wani, dan dati switi gi en,

ma a e hati wan donsma fu tapu fu du ogri.

20 Te wan sma e waka nanga konisma, dan en srefi o kon koni,

ma te wan sma e waka nanga donsma, dan sani no o waka bun gi en.

21 Sondari e kisi ala sortu problema,

ma den ret’ati sma o feni bun.

22 Te wan bun sma dede, a e libi en gudu gi den granpkin fu en,

ma den gudu fu den sondari, na den ret’ati sma o kisi den.

23 Te wan pôtisma e wroko a gron fu en, dan a gron e gi furu n’nyan.

Ma te sma e du sani na wan kruka fasi, dan dati kan meki a lasi ala sani.

24 A sma di no e strafu en pkin no lobi en,*

ma a sma di lobi en pkin e teki ala okasi* fu leri en fa a musu tyari ensrefi.

25 Wan ret’ati sma abi nofo fu kan nyan en bere furu,

ma den ogrisma o tan nanga angri.