Tori fu den apostel
6 Na a ten dati di moro nanga moro sma ben e tron disipel, den Dyu di ben e taki Grikitongo bigin krutu nanga den Dyu di ben e taki Hebrewtongo. Den ben feni taki den Griki uma di masra dede kba, no ben e kisi a n’nyan di ben e prati ibri dei. 2 Dati meki den 12 apostel kari ala den disipel kon makandra èn den taigi den: „A no ben o de wan bun sani efu wi ben o tapu fu gi sma leri fu Gado wortu, dan wi go prati n’nyan gi sma. 3 Fu dati ede, brada, un musu suku seibi man na un mindri di abi wan bun nen. Den musu abi santa yeye èn den musu koni, so taki wi kan poti den fu du a prenspari wroko disi. 4 Ma wi o gebroiki wi ten nanga wi krakti fu begi èn fu preiki a wortu.” 5 Ala den sma ben agri nanga san den apostel taki. Ne den teki Stefanus, wan man di ben abi wan tranga bribi èn di ben abi santa yeye, sosrefi Filipus, Prokorus, Nikanor, Timon, Parmenas nanga Nikolas, wan man fu Antiokia, di ben teki a Dyu bribi. 6 Den tyari den go na den apostel èn baka di den apostel begi, den poti den anu tapu na ede fu den man disi.
7 A bakapisi ben de taki moro nanga moro sma ben e kon yere a wortu fu Gado, èn moro nanga moro sma na ini Yerusalem ben e tron disipel. Bun furu priester ben tron bribiman tu.
8 Gado ben e horbaka gi Stefanus èn a ben gi en furu krakti. A ben e du bigi wondru nanga bigi sani tu na mindri a pipel. 9 Ma wan tu man fu a grupu di sma ben kari Snoga fu den Friman èn wan tu sma fu Sireine, Aleksandria, Silisia nanga Asia, bigin meki trobi nanga Stefanus. 10 Ma den no ben man nanga Stefanus, fu di a ben e taki nanga koni èn nanga yepi fu a santa yeye. 11 Fu dati ede kibrikibri den kisi wan tu sma so fara fu taki: „Wi yere fa a taki ogri fu Moses nanga Gado.” 12 Na so den meki taki a pipel, den owru man, nanga den leriman fu Wet ati bron nanga Stefanus. Ne den grabu en wantronso èn den tyari en go na a Grankrutu fu den Dyu. 13 Baka dati den tyari falsi kotoigi kon di taki: „A man disi e tan taki takru sani fu a santa presi disi èn fu a Wet. 14 Bika wi yere fa a taki dati a Yesus disi fu Nasaret o broko a presi disi puru èn taki a o kenki den gwenti di Moses leri wi.”
15 Di ala den sma di ben e sdon na ini a Grankrutu luku Stefanus, den si taki en fesi ben de leki a fesi fu wan engel.