Mateyus skrifi en

15 Baka dati, den Fariseiman nanga den leriman fu a Wet kmoto na Yerusalem fu kon na Yesus. Den taki: 2 „Fu san ede den disipel fu yu no e du san den bigisma fu wi leri wi? Den no e wasi* den anu fosi den go nyan.”

3 Yesus piki den: „Fu san ede unu no e du san a wet fu Gado e taki, soso fu kan hori den gwenti fu unu? 4 Gado taki: ’Lespeki yu p’pa nanga yu m’ma.’ A ben taki tu: ’A sma di e fluku* en p’pa noso m’ma musu dede.’ 5 Ma unu e taki: ’Efu wan sma e taigi en p’pa noso en m’ma: „Mi pramisi Gado kba fu gi en ala san mi abi. Dati meki mi no man yepi yu”, 6 dan a sma dati no abi fu lespeki en p’pa srefsrefi.’ Na so unu meki a wortu fu Gado lasi krakti, fu di unu wani hori den gwenti fu unu. 7 Un hoigriman, a profeiti Yesaya ben abi leti di a ben taki fu unu: 8 ’A pipel disi e gi mi grani nanga den mofo, ma den ati de farawe fu mi. 9 Na fu soso den e tan anbegi mi, bika den e poti den gwenti fu libisma leki wet gi trawan.’” 10 Baka dati Yesus kari den sma kon na en èn a taigi den: „Un arki mi èn ferstan bun san mi e taigi unu: 11 ’A no san e go na ini wan sma mofo e doti en. Ma na san e kmoto na ini en mofo, na dati e doti en.’”

12 Baka dati den disipel kon na en èn den taigi en: „Yu sabi taki den Fariseiman ati bron di den yere san yu taki?” 13 A piki den: „Mi hemel Papa o hari ibri bon puru di ensrefi no prani. 14 Libi den. Den man disi wani sori trawan a pasi, ma den srefi breni. Efu wan breniman wani sori wan tra breniman a pasi, dan den ala tu o fadon go na ini wan olo.” 15 Petrus piki en: „Taigi wi san na agersitori wani taki.” 16 Ne a taki: „Unu srefi no e ferstan mi ete? 17 Unu no sabi taki ala san wan sma e nyan e go na ini en bere, dan a e kmoto baka pe a musu kmoto? 18 Ma san e kmoto na ini a mofo e kon fu na ati èn na dati e doti wan sma. 19 Fu eksempre, den sani di e kmoto na ini na ati na: ogri prakseri, kiri, wakalibi,* hurulibi,* fufuru, lei, a taki di wan sma e taki ogri fu Gado. 20 Disi na den sani di e doti wan sma. Ma te wan sma e nyan sondro fu wasi en anu, dan dati no e doti wan sma.”

21 Baka di Yesus gwe fu drape, a go na a kontren fu Tirus nanga Sidon. 22 Wan Fenisia uma di ben libi na ini a birti drape, kon na en èn a begi en: „Masra, Manpkin fu David, abi sar’ati nanga mi. Wan ogri yeye e pina mi umapkin.” 23 Ma a no piki na uma. Dati meki den disipel fu en kon na en èn den taigi en: „Seni en gwe, bika a e tan bari na wi baka.” 24 Yesus piki den: „Gado seni mi fu go soso na den lasi skapu fu a pipel fu Israel.” 25 Ma na uma kon, a boigi gi Yesus èn a taki: „Masra, yepi mi!” 26 Yesus piki: „A no bun fu teki a brede fu den pkin èn gi dati na den pkin dagu.” 27 Na uma taki: „Iya mi Masra, ma tòg den pkin dagu e nyan den pkin pisi brede di e fadon fu a tafra fu den basi fu den.” 28 Yesus piki na uma: „Ai frow, a bribi fu yu tranga. Meki a psa soleki fa yu wani.” Na a srefi momenti dati a meisje fu a frow kon betre.

29 Yesus kmoto drape, dan a go krosbei fu a se fu Galilea èn baka di a kren a bergi, a go sdon drape. 30 Ne furu sma kon na en èn den tyari sma kon di ben lan, sma di ben malengri, brenisma, babawsma, nanga furu trawan. Den poti den sikisma na Yesus futusei èn a meki den kon betre. 31 Den sma ben ferwondru di den si taki babawsma ben man taki, taki sma di lan ben man waka èn taki brenisma ben man si. Dati meki den gi a Gado fu Israel glori.

32 Ma Yesus kari den disipel fu en kon èn a taki: „Mi e sari den sma, bika na dri dei kba den de nanga mi èn den no abi noti fu nyan. Mi no wani seni den gwe sondro taki den nyan noso den kan flaw te den de na pasi.” 33 Ma den disipel taigi en: „Pe wi o feni nofo brede na a fara presi disi fu gi someni sma n’nyan?” 34 Ne Yesus aksi den: „Omeni brede unu abi?” Den taki: „Seibi brede nanga wan tu pkin fisi.” 35 Baka di a taigi den sma fu go sdon na gron, 36 a teki den seibi brede nanga den fisi. Baka di a taki Gado tangi, a broko den brede, a prati den gi den disipel, dan den disipel prati den gi den sma. 37 Ala sma nyan den bere furu. Den disipel piki den pisi brede di ben tan abra èn den furu seibi bigi baskita nanga dati. 38 Sowan 4000 man ben n’nyan. Den no ben teri den uma nanga den yongu pkin. 39 Te fu kba, Yesus seni den sma gwe, a go na ini a boto èn a doro na a kontren Magadan.