Odo
3 Mi boi, no fergiti den sani di mi leri yu
èn hori den wet fu mi nanga yu heri ati.
2 Dan yu o libi moro langa
èn sani o waka bun gi yu.
3 Ala ten yu musu sori bun-ati* èn du san yu pramisi.
Tai den sani disi na yu neki.
Skrifi den na tapu yu ati.
4 Dan Gado nanga libisma o prisiri nanga yu
èn den o si yu leki wan sma di man ferstan sani bun.
5 Fertrow tapu Yehovah nanga yu heri ati.
No fertrow tapu yu eigi ferstan.
6 Poti prakseri na en, awinsi san yu e du,
dan a o sori yu a yoisti pasi.
7 No denki taki yu koni.
Abi lespeki gi Yehovah èn no du sani di no bun.
9 Gi Yehovah grani nanga den gudu di yu abi
èn nanga den fosi* froktu fu yu gron.
10 Dan den maksin fu yu o span
èn den baki fu yu* o lai so furu nyun win, taki a o abra a lanki.
11 Mi boi, no weigri fu teki a leri fu Yehovah
èn no ati bron te a e pir’ai gi yu.
12 Bika Yehovah e pir’ai gi den sma di a lobi,
neleki fa wan p’pa e du nanga wan manpkin di a lobi.
13 Koloku fu a sma di kon abi koni.
Koloku fu a sma di e du muiti fu ferstan sani krin.
14 A moro bun fu kon abi koni,
leki fu abi solfru noso gowtu.
16 Langa libi de na ini en ret’anu.
Gudu nanga glori de na ini en kruktu-anu.
17 Ala presi pe koni de, prisiri de
èn na ala sei pe koni e waka, na drape freide de.
18 Gi den sma di e grabu en hori, a de wan bon di e gi libi.
Koloku fu den sma di e tan hori en steifi.
19 Nanga koni Yehovah seti a fundament fu grontapu.
Fu di a koni, meki a seti hemel na so wan fasi taki a no man seki.
20 Na a koni fu en meki taki a ben man prati den dipi watra na tu
èn taki dow e fadon kmoto fu den wolku.
21 Mi boi, no fergiti den sani disi.*
Kibri koni èn tan gebroiki yu ferstan.
22 Den o gi yu libi
èn den o de leki wan moi keti na yu neki.
23 Dan ogri no o miti yu
èn nowan sani o de na yu pasi di o meki yu fadon.*
24 Te yu go d’don, yu no o frede noti.
Yu o go d’don èn yu o sribi switi.
25 Yu no o frede nowan ogri di kan kon na yu tapu wantronso
noso a bigi winti di o wai kon na tapu den ogriwan.
26 Yehovah o de a sma di yu kan fertrow.
A no o meki yu waka go na ini wan val.
28 Te yu man gi wan sma wan sani tide, no taigi en:
„Gwe. Kon baka tamara, dan mi o gi yu san yu abi fanowdu.”
29 Te wan sma di e libi krosbei fu yu e fertrow yu,
dan no go sdon prakseri fa yu kan du ogri nanga en.
30 No suku trobi somaar nanga wan sma,
efu a no du yu nowan ogri.
31 No dyarusu tapu wan sma di e du soso ogri
èn no waka na en baka,
32 bika Yehovah e teige sma di e bedrigi trawan,
ma a de bun mati nanga den sma di ati krin.
33 A fluku fu Yehovah de na tapu na oso fu na ogrisma,
ma a e blesi a tanpresi fu den ret’ati sma.
34 A e spotu den sma di e spotu trawan,
ma a e du bun gi den safr’ati sma.
35 Sma o gi den koniwan grani,
ma den donwan o kisi syen.