Yohanes skrifi en

8 12 Fu dati ede Yesus taigi den sma: „Mi na a leti fu grontapu. A sma di e waka na mi baka, noiti no o waka na ini a dungru, ma a o abi a leti di e gi libi.” 13 Dati meki den Fariseiman taigi en: „Na yu e taigi sma suma na yu, ma den sani di yu e taki no tru.” 14 Yesus piki den: „Awinsi na mi srefi musu ferteri sma suma na mi, tòg den sani di mi e taki tru fu di mi sabi pe mi kmoto èn pe mi e go. Ma unu no sabi pe mi kmoto èn pe mi e go. 15 Unu e krutu trawan leki fa libisma e du dati. Ma mi no e krutu nowan sma. 16 Ma awinsi mi krutu wan sma, mi o krutu en na wan reti fasi, fu di mi no de mi w’wan. A P’pa di seni mi kon de nanga mi. 17 Na ini un eigi Wet skrifi: ’Efu tu kotoigi e taki a srefi sani, dan a sani dati tru.’ 18 Mi na mi eigi kotoigi èn a P’pa di seni mi kon na wan kotoigi gi mi tu.” 19 Ne den taigi en: „Pe yu P’pa de?” Yesus piki: „Unu no sabi mi èn unu no sabi mi P’pa. Efu unu ben sabi mi, dan unu ben o sabi mi P’pa tu.” 20 Na den sani disi a ben taki di a ben e gi leri na ini a tempel na a presi pe den e kibri a moni fu a tempel. Ma nowan sma ben grabu en fu di en yuru no ben doro ete.

21 Dati meki a taigi den baka: „Mi o gwe èn unu o suku mi. Ma unu o dede nanga a sondu fu unu. Pe mi e go, unu no man kon.” 22 Fu dati ede den Dyu bigin taki: „Na kiri a o kiri ensrefi? Bika a taki: ’Pe mi e go, unu no man kon.’” 23 Dan a taki: „Unu na fu ondrosei, ma mi na fu loktusei. Unu na fu a grontapu disi, ma mi a no fu a grontapu disi. 24 Dati meki mi taigi unu: Unu o dede nanga den sondu fu unu. Bika efu unu no e bribi taki mi na a sma di ben musu kon, dan unu o dede nanga den sondu fu unu.” 25 Ne den taigi en: „Suma na yu?” Yesus taigi den: „Fu san ede mi e du muiti fu taki nanga unu srefi? 26 Furu sani de di mi wani taki fu unu. Mi o krutu unu gi ala den sani di unu e du. A sma di seni mi kon e taki san tru èn den srefi sani di mi yere fu en, mi kon ferteri na grontapu.” 27 Den no ben ferstan taki a ben taki nanga den fu en P’pa. 28 Fu dati ede Yesus taki: „Baka te unu anga a Manpkin fu libisma na wan postu, dan unu o sabi taki mi na a sma di ben musu kon èn taki mi no e du san mi srefi wani. Ma mi e taki den sani disi soleki fa a P’pa leri mi. 29 A sma di seni mi kon, de nanga mi. A no libi mi fu mi tan mi w’wan fu di ala ten mi e du san a wani.” 30 Di a taki den sani disi, furu sma bigin bribi na ini en.

31 Dati meki Yesus taigi den Dyu di ben bribi na ini en: „Efu unu tan du san mi taki, dan unu na mi disipel trutru. 32 Unu o sabi san tru èn na dati o meki unu kon fri.” 33 Den piki en: „Wi na pkin fu Abraham èn noiti wi ben de srafu fu wan sma. Dan fa yu kan taki dati wi o kon fri?” 34 Yesus piki den: „Un kan bribi mi: Ibri sma di e du sondu, na wan srafu fu sondu. 35 A srafu no e tan na ini na oso fu en masra ala ten, ma a manpkin e tan fu ala ten. 36 Fu dati ede efu a Manpkin meki unu kon fri, dan unu o de fri trutru. 37 Mi sabi taki unu na pkin fu Abraham. Ma unu wani kiri mi fu di unu no wani teki den sani di mi e taigi unu. 38 Mi e taki den sani di mi si di mi ben de na mi P’pa. Ma unu e du den sani di unu yere fu un p’pa.” 39 Den piki en: „Na Abraham na wi p’pa.” Yesus taigi den: „Efu unu na Abraham pkin, dan un ben o du san Abraham du. 40 Ma now unu wani kiri mi, wan man di taigi unu den tru sani di mi yere fu Gado. Abraham noiti no ben o du a sani dati. 41 Unu e du den sani di un p’pa e du.” Den taigi en: „Wi a no hurupkin.* Na wán P’pa wi abi, dati na Gado.”

42 Yesus taigi den: „Efu Gado ben de un P’pa, unu ben o lobi mi. Bika na fu Gado mi kon èn na fu di Gado wani, meki mi de dya. A no ben de mi prakseri fu kon dya, ma na Gado seni mi kon. 43 Ma fu di unu no wani arki mi, meki unu no man ferstan san mi e taki. 44 Didibri na un p’pa èn unu wani du san un p’pa wani. Di a bigin waka en eigi pasi* a ben de wan kiriman. A drai baka gi ala san tru, bika a no lobi san tru. Te a e lei, a e taki soleki fa en srefi de, fu di a de wan leiman èn a p’pa fu ala lei. 45 Ma mi e taki san tru. Dati meki unu no wani bribi mi. 46 Suma fu unu man taki dati mi sondu? Efu mi e taki san tru, dan fu san ede unu no e bribi mi? 47 A sma di de fu Gado e arki den sani di Gado e taki. Na fu di unu no de fu Gado, meki unu no e arki.”

48 Den Dyu piki en: „Wi no ben abi leti di wi taki dati yu na wan Samariasma èn dati yu abi wan ogri yeye na yu tapu?” 49 Yesus piki den: „Mi no abi wan ogri yeye na mi tapu. Mi e gi mi P’pa grani, ma unu no e gi mi grani. 50 Mi no e suku grani gi misrefi. Ma wan tra sma e suku grani gi mi èn en na a krutuman. 51 Mi e taigi unu: Efu wan sma e du den sani di mi taki, dan noiti a o si dede.” 52 Den Dyu taigi en: „Now wi sabi seiker taki yu abi wan ogri yeye na yu tapu. Abraham dede èn den profeiti dede tu, ma yu e taki: ’Efu wan sma e du den sani di mi taki, dan noiti a o si dede.’ 53 Yu wani taigi wi taki yu bigi moro wi p’pa Abraham di dede kba? Den profeiti dede tu. San yu e denki fu yusrefi?” 54 Yesus piki den: „Efu mi e gi misrefi grani, dan a grani fu mi no wani taki noti. Na mi P’pa e gi mi grani, a sma fu suma unu e taki dati en na un Gado. 55 Tòg unu no sabi en. Ma mi sabi en. Efu mi taki dati mi no sabi en, dan mi na wan leiman neleki unu. Ma mi sabi en èn mi e du san a e taki. 56 Un p’pa Abraham ben prisiri srefsrefi fu di a ben ferwakti fu si a dei fu mi. A si a dei dati èn a ben prisiri.” 57 Dan den Dyu taigi en: „Yu no abi 50 yari srefi, dan yu e taki dati yu si Abraham?” 58 Yesus taigi den: „Bribi mi: Fosi Abraham ben de, mi ben de kba.” 59 Ne den teki ston fu trowe na Yesus tapu. Ma Yesus go kibri, dan a kmoto na ini a tempel.