Gi den Filipisma
2 Efu unu e gi makandra dek’ati leki Kresten, efu unu e trowstu makandra fu di unu abi lobi, efu unu e sori taki unu e broko un ede nanga makandra, efu unu e firi gi makandra èn efu unu abi sar’ati gi makandra, 2 dan unu e meki a prisiri fu mi kon moro bigi, fu di unu abi a srefi denki nanga a srefi lobi, fu di unu de wán èn unu abi wán denki. 3 No strei nanga makandra èn no prakseri tumsi furu fu unsrefi, ma abi sakafasi èn si trawan moro hei leki unsrefi. 4 No poti prakseri na un eigi afersi nomo, ma poti prakseri na den afersi fu trawan tu.
5 Tan abi a srefi denki di Krestes Yesus ben abi tu. 6 Aladi a ben de leki fa Gado de, tòg a no prakseri fu teki a makti fu en abra fu kan de a srefi leki Gado. 7 Nôno, ma a gwe libi ala san a ben abi. A kon de leki wan srafu èn a tron wan libisma. 8 Ma a du moro leki dati srefi. Di a tron wan libisma, a saka ensrefi èn a du ala san Gado ben wani. Iya, a ben de klarklari srefi fu dede na wan pinapostu.* 9 Na fu dati ede Gado poti en moro hei leki fa a ben de kba èn a gi en wan nen di bigi moro ala tra nen. 10 Na so ala den wan di de na hemel, den wan di de na grontapu nanga den wan di de na ondro gron,* o boigi* na ini a nen fu Yesus. 11 Ala sma o taki krin dati Yesus Krestes na Masra èn na so Gado a P’pa o kisi glori.
12 We, mi lobi brada nanga sisa, di mi ben de nanga unu, ala ten unu ben e du san Gado taki, ma now di mi no de nanga unu, unu de klarklari fu du dati moro srefi. Tan meki muiti fu kisi ferlusu èn du dati nanga frede èn nanga bigi lespeki. 13 Na fu di Gado wani, meki a e tranga unu. A e gi unu a firi nanga a krakti fu du sani di e gi en prisiri. 14 Tan du ala sani sondro fu krutukrutu èn sondro fu hartaki nanga sma, 15 so taki sma no man feni fowtu na un tapu èn taki unu kan de sma di no e du nowan ogri. Iya, unu kan de pkin fu Gado di e tyari densrefi na wan fasi di fiti na mindri den sma fu a grontapu disi di e du soso ogri. Na ini a grontapu disi unu de leki sma di e skèin leti. 16 Tan hori steifi na a wortu di e gi libi. Dan mi o prisiri na a dei fu Krestes fu di mi sabi taki mi no lon fu soso èn taki mi no wroko tranga fu soso. 17 Ma awinsi mi kanti trowe leki wan dringi-ofrandi, tòg mi breiti èn mi e prisiri makandra nanga un alamala. Na bribi meki taki unu tyari den sortu ofrandi dati èn taki unu e du a wroko fu Gado. 18 Na a srefi fasi un musu breiti èn prisiri tu makandra nanga mi.
19 Ma mi howpu taki efu Masra Yesus wani, mi kan seni Timoteyus kon na unu heri esi. Dan mi kan kisi dek’ati te mi yere fa a e go nanga unu. 20 Mi no abi nowan tra sma di e denki leki fa en e denki èn di o sorgu gi unu nanga en heri ati, 21 bika ala den trawan e suku den eigi bun. Den no e suku a bun fu Yesus Krestes. 22 Ma unu sabi taki a ben sori krin kba sortu sma a de. Neleki fa wan pkin e wroko makandra nanga en p’pa, na so a wroko tranga nanga mi fu panya a bun nyunsu. 23 Sobun, en na a sma di mi wani seni kon. Solanga mi sabi fa sani o waka nanga mi, mi o seni en kon. 24 Ja, mi sabi taki efu Masra wani, dan mi srefi o kon heri esi tu.
25 Ma mi feni taki a de fanowdu fu seni mi brada Epafroditus kon na unu baka. A ben e wroko makandra nanga mi èn a ben e strei tu makandra nanga mi. Unu ben seni en kon na mi leki futuboi fu yepi mi nanga den sani di mi abi fanowdu. 26 A e angri fu si un alamala èn a las’ati fu di unu yere taki a ben siki. 27 A tru taki a ben siki èn taki bijna a dede. Ma Gado ben abi sar’ati nanga en. Fu taki en leti, a no ben abi sar’ati nanga en w’wan, ma nanga mi tu, so taki mi no ben o sari, moro leki fa mi e sari kba. 28 Dati meki mi e seni en kon na unu so esi leki mi kan, so taki te unu si en baka, unu kan prisiri. Dan mi no o abi so furu brok’ede moro. 29 Fu dati ede un musu gi en wan switikon, leki fa unu gwenti du nanga tra bakaman fu Masra. Du dati nanga ala prisiri. Tan lespeki den sortu brada dati, 30 bika bijna a dede fu a wroko fu Krestes* ede. A no ben frede fu lasi en libi srefi, soso fu kan yepi mi pe unu no ben man.