Hosea
7 „Ibri tron te mi wani meki Israel kon betre,
den fowtu fu Efrayim de fu si
èn den ogri fu Samaria e kon na krin.
Bika den e bedrigi sma.
Den na fufurman di e broko go na ini sma oso èn di e roof sma na strati.
2 Den no e prakseri taki mi o memre ala den ogri di den e du.
Now den ogri di den e du de ala sei na den lontu.
Leti na mi fesi den e du ogri.
3 Te den e du ogri, a kownu e prisiri
èn te den e bedrigi sma, den granman e prisiri.
Den brudu faya leki wan onfu di wan bakriman leti.
A faya so te taki a man no abi fu wai a faya te a e masi a blon en a e libi en fu a sweri.
5 Na a fesadei fu wi kownu, den granman kon siki.
Den ati bron fu di den dringi tumsi furu win.
A kownu e moksi nanga den spotuman.
6 Den e kon krosbei nanga wan ati di faya leki wan onfu.*
A heri neti a bakriman e sribi.
Te m’manten doro, a faya na ini na onfu kon moro bigi.
Ala den kownu fu den fadon.
Ma tòg nowan fu den e bari suku yepi na mi.
8 Efrayim e moksi nanga den tra pipel.
Efrayim de leki wan lontu kuku di baka na wán sei nomo.
9 Freimdesma meki a kon swaki, ma a no sabi dati.
En ede-w’wiri kon weti, ma a no e si dati.
10 Na a bigifasi fu Israel e krutu en.
Tòg den no drai go baka na Yehovah, a Gado fu den.
Aladi den sani disi e miti den, tòg den no suku yepi na en.
11 Efrayim de leki wan don doifi di no abi ferstan.
Den go suku yepi na Egepte èn den go na Asiria.
12 Awinsi pe den go, mi o fringi mi net na den tapu.
Mi o fanga den neleki fa sma e fanga fowru di e frei na loktu.
Mi o strafu a pipel, soleki fa mi ben warskow den na fesi.
13 Bigi ogri o miti den fu di den lon gwe fu mi!
Meki den kisi pori, bika den sondu teige mi!
Mi ben wani ferlusu den, ma den ben taki lei fu mi.
14 Den ben e bari krei na tapu den bedi
ma den no ben suku yepi na mi nanga den heri ati.
Den ben kotkoti den skin fu di den ben wani sani soleki aleisi nanga nyun win.
Ma den drai baka gi mi.
15 Mi ben e gi den leri èn mi ben gi den krakti,
ma tòg den trangayesi mi èn den e prakseri soso ogri.
16 Den teki wan tra pasi, ma a no ben de wan moro bun wan.*
Mi no ben man fertrow den, bika den ben de leki wan bo di no e wroko bun.
Sma o kiri den granman fu den nanga fet’owru fu di den abi bigitaki.
Dati meki sma o spotu den na ini a kondre Egepte.”