A di fu tu brifi fu Petrus

1 Disi na wan brifi fu Simon Petrus, wan srafu èn wan apostel fu Yesus Krestes. A brifi disi na gi den sma di abi a srefi Kresten bribi leki wi. Den kisi a bigi grani disi fu di wi Gado èn wi Ferlusuman Yesus Krestes e du san reti.

2 Meki Gado sori unu moro bun-ati èn meki a gi unu moro freide fu di unu kon sabi den finfini tori fu Gado èn fu Yesus wi Masra. 3 Bika na a krakti fu Gado meki taki wi abi ala sani* di de fanowdu fu kisi libi èn fu man dini Gado fayafaya. Wi kon abi den sani disi fu di wi sabi Gado bun. A kari wi fu di a de wan bigi Gado èn a e du san bun. 4 Dati meki a pramisi wi taki a o gi wi bigi blesi di abi furu waarde. Den sani disi meki taki unu kan tron yeye neleki Gado fu di unu gwe libi den takru lostu fu libisma di e pori a grontapu disi.

5 Fu dati ede, un no musu abi bribi nomo, ma un musu meki ala muiti fu du san bun. Boiti taki unu e du san bun, un musu abi sabi. 6 Boiti taki unu abi sabi, un musu dwengi unsrefi. Boiti taki un musu dwengi unsrefi, un musu hordoro. Boiti taki unu e hordoro, un musu dini Gado fayafaya. 7 Boiti taki unu e dini Gado fayafaya, un musu lobi un brada. Boiti taki unu lobi un brada, un musu lobi ala sma. 8 Bika efu unu abi den fasi disi èn unu e sori den fasi disi moro nanga moro, dan dati o yepi unu fu no de sma di no e du noti nanga a soifri leri di abi fu du nanga Masra Yesus Krestes. Boiti dati, unu no o de sma di de leki wan bon di no e meki froktu.

9 Ma efu wan sma no abi den fasi disi, dan a breni. A e tapu en ai gi a leti* èn a fergiti taki a kon krin fu den sondu di a ben du fosi. 10 Fu dati ede brada, du ala muiti fu tan wan sma di Gado kari èn di a teki. Efu unu tan du disi, dan noiti unu o fadon. 11 Na so unu o kisi a bigi blesi fu go na ini a têgo Kownukondre fu wi Masra nanga Ferlusuman Yesus Krestes.

12 Fu dati ede, mi o tan memre unu na den sani disi, aladi unu sabi den kba èn unu e tai hori na den tru tori di unu leri. 13 Ma solanga mi de na ini a tenti* disi, mi denki taki a bun fu memre unu na den sani disi so taki unu kan de na ai. 14 Bika mi sabi taki dyonsro den o puru a tenti fu mi, soleki fa wi Masra Yesus Krestes ben sori mi. 15 Ala ten mi o du ala san mi man, so taki baka te mi gwe unu srefi o man memre* den sani disi.

16 Wi meki unu kon sabi a krakti fu wi Masra Yesus Krestes. Wi meki unu kon sabi tu na sortu ten a o kon.* Ma a no fu di wi ben arki anansitori, meki wi yepi unu fu kon sabi den sani disi, ma na fu di wi si a glori fu Krestes nanga wi eigi ai. 17 Na Gado a P’pa ben gi en grani nanga glori. Disi psa di a Gado di abi bigi glori taki: „Disi na mi Manpkin, a wan di mi lobi èn di mi srefi feni bun.” 18 Iya, di wi ben de nanga en na tapu a santa bergi, wi ben yere den wortu disi e kmoto fu hemel.

19 Dati meki wi kisi moro bribi na ini den profeititori. A ben o bun efu unu tan poti prakseri na den profeititori disi. Na ini un ati den de leki wan lampu di e skèin na wan dungru presi teleki dei broko èn wan m’manten stari opo kon. 20 Un sabi a sani disi: Nowan profeititori fu Gado Buku kmoto fu wan sma en eigi denki. 21 Noiti libisma taki profeititori fu di den srefi ben wani, ma na a santa yeye ben meki den taki sani di kmoto fu Gado.