Gi den Efeisesma

2 Boiti dati, den fowtu nanga sondu fu unu ben meki unu de leki dedesma, ma Gado meki unu kon na libi. 2 Fosi, unu ben e libi leki den sma fu a grontapu disi.* Unu ben e du a wani fu a tiriman fu grontapu di e tiri a denki fu den sma fu grontapu. A denki disi de leki loktu na wi lontu èn a abi krakti tapu den sma di e trangayesi Gado. 3 Fosi, wi ben e libi leki den sma disi fu di wi ben e du san a sondu skin wani. Wi ben e libi leki fa wi ben e firi èn wi ben e du sani leki fa wi ben e denki. Sensi wi gebore, Gado ati bron nanga wi neleki fa en ati e bron nanga den tra sma. 4 Ma Gado abi bun furu sar’ati èn a lobi wi trutru. 5 Fu dati ede a meki wi kon na libi makandra nanga Krestes, aladi wi ben de leki dedesma fu di wi e sondu. Na a bun-ati fu Gado meki unu kisi ferlusu. 6 Boiti dati, a meki wi alamala kon na libi èn a gi wi alamala wan presi na hemel, fu di wi de wán nanga Krestes Yesus. 7 Na ini a ten di e kon* a o sori wi furu bun-ati. A o du bun sani gi wi fu di wi de wán nanga Krestes Yesus.

8 Unu di abi bribi kisi ferlusu fu di Gado sori unu bun-ati. A no fu di unu bun so meki Gado du dati, ma na wan kado a gi unu. 9 A no wan sani di unu du meki taki unu kisi ferlusu. Dati meki nowan sma musu meki bigi. 10 Na Gado meki wi. A meki wi fu de wán nanga Krestes Yesus fu du bun wroko. Gado ben besroiti na fesi kba san na den bun wroko disi di wi ben o du.

11 Dati meki un musu hori na prakseri taki unu a no Dyu èn taki wan ten ben de taki den sma di besnèi* ben e kari unu sma di no besnèi. 12 Na a ten dati, unu no ben sabi Krestes. Unu ben de trakondre sma na ini a kondre Israel èn unu no ben de na ini den ferbontu di abi fu du nanga a pramisi fu Gado. Di unu ben de na ini grontapu unu no ben abi nowan howpu èn unu no ben sabi Gado. 13 Ma unu di ben de farawe fu Gado fosi, de wán nanga Krestes Yesus now èn a brudu fu Krestes meki taki unu kon krosbei fu Gado. 14 Bika na Krestes meki taki wi abi freide. En na a sma di meki den tu grupu kon tron wán èn a broko a skotu di ben prati den. 15 Nanga a dede* fu en a puru a sani di ben meki den de feanti. A sani dati na a Wet fu Moses. Na so a meki den tu grupu kon de wán grupu di de leki wán nyun pipel.* Ja, fu di den tu grupu disi de wán nanga en, meki a e sorgu taki den abi freide. 16 Nanga yepi fu a pinapostu* a sorgu tu taki den tu grupu disi kon bun baka nanga Gado. Na so den ben kan tron wán skin, fu di ensrefi tyari wan kba kon na a sani di ben meki den de feanti. 17 A kon èn a preiki a bun nyunsu fu freide gi unu di ben de farawe fu Gado èn gi den sma di ben de krosbei fu Gado. 18 Bika nanga yepi fu en, wi di kmoto fu ala tu grupu, man taki nanga a P’pa o ten wi wani fu di wi alamala abi a srefi santa yeye.

19 Fu dati ede, unu a no trakondre sma moro, ma unu nanga den santawan na wán èn unu na fu na osofamiri fu Gado. 20 Unu de leki ston di Gado gebroiki fu bow na tapu a fundament fu den apostel nanga den profeiti, èn Krestes Yesus srefi na a moro prenspari ukuston* fu a fundament. 21 Makandra nanga en a heri oso e tron wan santa tempel gi Yehovah* èn ibri pisi e fiti heri bun na makandra. 22 Makandra nanga en unu e tron wan presi pe Gado e tan fu di en santa yeye de drape.