Wan Openbaring gi Yohanes
3 Disi na san yu musu skrifi gi na engel fu a gemeente na Sardes: A sma di abi den seibi yeye fu Gado nanga den seibi stari taki disi: ’Mi sabi san yu e du. Yu e tyari a nen taki yu de na libi, ma yu dede. 2 Dati meki yu musu de na ai. Yu musu meki den sani di tan abra èn di ben de fu dede kon tranga, bika mi no feni taki yu du ala san yu ben musu du na fesi a Gado fu mi. 3 Fu dati ede tan prakseri* san yu kisi èn san yu yere. Tan du den sani disi èn abi berow. Efu yu no wiki, dan mi o kon leki wan fufurman èn yu no o sabi srefi sortu yuru mi o kon na yu.
4 Ma tòg wan tu sma* de na Sardes di no doti den krosi fu den. Den o weri weti krosi èn den o waka nanga mi, bika den warti fu kisi a grani dati. 5 A sma di wini a strei o weri weti krosi. Noiti mi o figi en nen puru na ini a buku fu libi. Ma na fesi mi P’pa nanga den engel fu en mi o taki dati mi sabi en nen. 6 A sma di abi yesi, meki a arki san a santa yeye e taigi den gemeente.’
7 Disi na san yu musu skrifi gi na engel fu a gemeente na Filadelfia: A santawan, a trutruwan, a wan di abi a sroto fu David, a wan di e opo wan doro, so taki nowan sma kan sroto en èn di e sroto wan doro, so taki nowan sma kan opo en, taki disi: 8 ’Mi sabi san yu e du. Luku, mi opo wan doro gi yu di nowan sma kan sroto. Mi sabi taki yu no abi furu krakti èn taki ala ten yu du san mi taki. Yu no gi mi pornen. 9 Den sma fu a snoga* fu Satan e taki dati den na Dyu, ma den a no trutru Dyu. Den e lei. Mi o meki den kon boigi gi yu* èn mi o meki den kon sabi taki mi lobi yu. 10 Fu di yu hordoro soleki fa mi ben leri yu,* meki mi o kibri yu te a yuru fu tesi kon. A ten dati o kon na heri grontapu fu tesi den sma di e libi na grontapu. 11 Mi o kon es’esi. Tan hori steifi na san yu abi, so taki nowan sma teki yu kroon.
12 Mi o meki a sma di wini a strei tron wan pilari fu a tempel fu mi Gado èn a no o gwe libi a tempel dati noiti moro. Mi o skrifi a nen fu mi Gado èn a nen fu a foto fu mi Gado na en tapu. A foto dati na a Nyun Yerusalem di e saka kmoto fu mi Gado na hemel. Mi o skrifi a nyun nen fu mi na en tapu tu. 13 A sma di abi yesi, meki a arki san a santa yeye e taigi den gemeente.’
14 Disi na san yu musu skrifi gi na engel fu a gemeente na Laodisea: Na Amen, a kotoigi di de fu fertrow èn di e taki san tru, a fosi sani di Gado meki, taki disi: 15 ’Mi sabi san yu e du. Yu no kowru, ma yu no faya tu. Mi ben winsi taki yu ben kowru noso taki yu ben faya. 16 Fu di yu no faya èn yu no kowru tu, ma yu brokokowru, meki mi o spiti yu puru na ini mi mofo. 17 Yu e taki: „Mi na wan guduman, mi abi wan lo gudu kba èn mi no abi noti fanowdu.” Ma yu no sabi taki yu na wan mofinasma, sma e firi sari gi yu, yu pôti, yu breni èn yu de nanga sososkin. 18 Dati meki mi e gi yu a rai fu kon na mi fu bai gowtu di kon soifri na ini faya, so taki yu kan kon gudu. Kon bai weti krosi na mi tu, so taki yu kan weri krosi fu no de nanga sososkin. Dan sma no o si a syen fu yu. Kon bai zalf fu lobi gi yu ai, so taki yu kan si.
19 Mi e pir’ai gi ala den sma di mi lobi èn mi e strafu den, so taki den kan leri wan sani. Dati meki un musu abi berow èn un musu de fayafaya. 20 Luku, mi e tnapu na a doro èn mi e naki na en tapu. Efu wan sma yere mi sten èn a opo a doro, dan mi o kon na ini en oso, mi o nyan nanga en èn a o nyan nanga mi. 21 Neleki fa mi ben wini a strei èn mi ben go sdon nanga mi P’pa na tapu en kownusturu, na so mi o meki a sma di wini a strei kon sdon nanga mi na tapu mi kownusturu. 22 Meki a sma di abi yesi arki san a santa yeye e taigi den gemeente.’”