Gi den Hebrewsma

3 Fu dati ede, brada nanga sisa di santa èn di kisi a kari tu fu go na hemel, poti prakseri na a sma di Gado seni kon,* a Granpriester Yesus. Na ini en wi e bribi èn na dati wi e ferteri sma. 2 Ala ten a du a wani fu Gado di poti en na wroko, neleki fa Moses ben e du en wroko na ini na oso fu Gado. 3 Yesus warti fu kisi moro glori leki Moses, fu di a sma di bow wan oso e kisi moro grani leki na oso di a bow. 4 Ja, ibri oso abi wan sma di meki en, ma a sma di meki ala sani na Gado. 5 Moses ben de wan futuboi di ben e du en wroko bun na ini na oso fu Gado èn san a du ben de wan bewijs fu den sani di Gado ben o taki fu den bakaten. 6 Ma Krestes ben de a Manpkin fu Gado di ben e luku na oso fu en P’pa bun. Wi na a oso fu Gado, solanga wi e tan taki sondro frede, solanga wi e tan hori steifi na a howpu fu wi te na a kba èn wi e prisiri nanga dati.

7 Na fu dati ede a santa yeye e taki: „Efu unu arki en sten tide, 8 dan un no musu meki un ati kon tranga, soleki fa a ben psa wan leisi di sma ben meki mi kisi bigi atibron, di den tesi mi na ini a sabana. 9 Na a ten dati den afo fu unu tesi mi, aladi den si den sani di mi du gi den 40 yari langa. 10 Dati meki mi no ben man si den sma dati na ai srefsrefi. Mi ben taki: ’Ala ten den e drai baka gi mi na ini den ati èn den no kon sabi den pasi fu mi.’ 11 Mi ati ben bron èn dati meki mi sweri: ’Den no o rostu leki mi.’”

12 Brada nanga sisa, luku bun taki nowan fu unu kon abi wan takru ati di no e bribi moro, bika disi kan meki taki unu hari unsrefi puru fu a libilibi Gado. 13 Ma tan gi makandra dek’ati ibri dei, solanga „Tide” no psa ete. Dan un ati no o kon tranga èn un no o meki sondu bedrigi unu. 14 Soso te wi hori steifi na a bribi di wi ben abi na a bigin èn te wi tan du dati te na a kba, dan wi o kisi san Krestes kisi. 15 Soleki fa a skrifi: „Efu unu arki en sten tide, dan un no musu meki un ati kon tranga, soleki fa a ben psa wan leisi di sma ben meki a kisi bigi atibron.”

16 Suma na den sma di ben yere, ma tòg den meki Gado kisi bigi atibron? A no ala den sma di Moses tyari kmoto na ini Egepte? 17 Boiti dati, suma Gado no ben man si na ai srefsrefi 40 yari langa? A no den sma di ben sondu èn di dede na ini a sabana? 18 Fu suma Gado ben sweri taki den no ben o rostu leki en? A no fu den sma di ben trangayesi en? 19 Dus wi e si taki den no ben man rostu leki en, fu di den no ben abi bribi.