Gi Titus
2 Ma yu Titus musu tan taki fu sani di e kruderi nanga a soifri* leri. 2 Den man di owru kba musu man dwengi densrefi na ini ala sani. Den musu de seryusu. Den musu de nanga krin ferstan. Den musu abi wan tranga bribi, den musu lobi tra sma èn den musu de sma di e hordoro. 3 Boiti dati, den uma di owru kba musu tyari densrefi na wan fasi di e sori taki den e lespeki Gado. Den no musu ferteri ogr’ati lei fu trawan. Den no musu lobi dringi furu win. Den musu leri sma bun sani. 4 Na so den kan leri den yongu uma fu lobi den masra, fu lobi den pkin fu den, 5 fu de nanga krin ferstan, fu libi wan krin libi, fu wroko na oso,* fu de bun sma èn fu saka densrefi na ondro den eigi masra, so taki sma no kan taki takru fu a wortu fu Gado.
6 Tan gi den yongu man dek’ati tu fu de nanga krin ferstan. 7 Na ala fasi yu musu de wan eksempre gi sma nanga den bun sani di yu e du. Na wan seryusu fasi yu musu leri sma sani di soifri.* 8 Taki na wan fasi di fiti,* so taki sma no man feni fowtu na yu tapu. Na so gensman o kisi syen, fu di den no man taki nowan ogri fu wi. 9 Srafu musu saka densrefi na ondro den basi na ini ala sani. Den musu pruberi fu du san den basi feni bun sondro fu hartaki nanga den. 10 Den no musu fufuru sani fu den basi, ma den musu sori taki sma kan fertrow den na ini ala sani. Na so den kan moi a leri fu Gado, wi Ferlusuman, na ala fasi.
11 Gado meki sma si a bun-ati fu en èn na so ala sortu sma kan kisi ferlusu. 12 Disi e leri wi fu kakafutu gi ogridu èn gi den lostu fu grontapu. A e leri wi tu fu libi nanga krin ferstan, fu de ret’ati sma èn fu dini Gado fayafaya na ini a ten disi.* 13 Wi musu libi na a fasi disi, aladi wi e wakti a sani di e gi wi prisiri èn di wi e howpu na tapu. Boiti dati, wi e wakti fu si fa wi Almakti Gado nanga Krestes Yesus, wi Ferlusuman, o sori a makti fu den. 14 Krestes gi ensrefi gi a bun fu wi èn a ferlusu wi fu wan libi di lai ala sortu kruktudu. Na so a krin wi fu kan de en spesrutu pipel di o de fayafaya fu du bun sani.
15 Tan taki fu den sani disi, tan gi sma dek’ati èn pir’ai gi den, fu di yu kisi a reti fu du dati. No meki nowan sma wiswasi yu.