A fosi brifi gi den Korentesma

13 Awinsi mi e taki den tongo fu libisma èn fu engel, ma mi no abi lobi, dan mi kon de leki wan bel noso wan cimbaal* di e meki wan lo b’bari. 2 Awinsi mi man taki profeititori èn mi sabi ala den santa kibritori nanga ala sani di de fu sabi èn awinsi mi abi so wan tranga bribi taki mi man opo bergi poti na wan tra presi, ma mi no abi lobi, dan tòg mi no de noti. 3 Awinsi mi e seri ala san mi abi fu gi pôtiwan wan sani fu nyan èn awinsi mi e gi mi skin leki wan ofrandi fu man meki bigi, ma mi no abi lobi, dan dati no e tyari nowan enkri wini kon gi mi.

4 Lobi abi pasensi èn a abi switifasi. Lobi no e dyarusu, a no e meki bigi èn a no abi heimemre, 5 a no e tyari ensrefi na wan fasi di no fiti,* a no e suku en eigi bun èn a no e mandi esi. A no e tan memre na ogri di trawan du. 6 A no e prisiri nanga sani di no bun, ma a e prisiri nanga sani di tru. 7 A e ferdrage ala sani, a e bribi ala sani, a e howpu ala sani èn a e hordoro awinsi san e psa.

8 Lobi no e kba noiti. Ma awinsi sma man taki profeititori, a o kon na wan kba. Awinsi sma man taki tra tongo,* a o kon na wan kba. Awinsi sma kisi sabi, a o kon na wan kba. 9 Bika wi no sabi ala sani di de fu sabi èn wi no e taki ala profeititori ete. 10 Ma te ala sani kon na krin, dan wi no o sabi den af’afu moro. 11 Di mi ben de wan pkin, mi ben e taki leki wan pkin, mi ben e denki leki wan pkin èn mi ben e si sani leki wan pkin. Ma now di mi tron wan bigisma, mi no e du leki wan pkin moro. 12 Bika nownow wi e luku na ini wan spikri pe wi no man si sani krin, ma bakaten wi o si sani krin. Nownow mi no sabi ala sani, ma bakaten mi o sabi sani finfini,* neleki fa Gado sabi mi finfini. 13 Ma den dri sani disi o tan: Bribi, howpu nanga lobi. Ma a moro prenspariwan fu den na lobi.