Markus skrifi en

7 Wan dei, den Fariseiman nanga wan tu leriman fu a Wet di ben kmoto na Yerusalem, go tnapu lontu Yesus. 2 Dan den si taki wan tu fu Yesus disipel no ben wasi den anu fosi den go nyan, dati wani taki den no ben wasi den anu soleki fa a gwenti ben de. 3 (Den Fariseiman nanga ala den Dyu ben abi a gwenti fu wasi den anu te na den elleboog fosi den go nyan, fu di den ben wani hori densrefi nomonomo na den gwenti fu den sma fu fosten. 4 Boiti dati, te den kmoto na w’woyo, den e krin densrefi nanga watra fosi den nyan. Den teki wan lo tra gwenti abra tu èn den e hori densrefi na den. Fu eksempre, den abi a gwenti fu dopu den kan, den batra nanga den kopro beki na ini watra.) 5 Dati meki den Fariseiman disi nanga den leriman fu a Wet aksi en: „Fu san ede den disipel fu yu no e wasi den anu fosi den nyan? Fu san ede den no e du san den bigisma fu wi leri wi?” 6 A taigi den: „Un hoigriman, a profeiti Yesaya ben abi leti di a ben taki a sani disi fu unu na ini Gado Buku: ’A pipel disi e gi mi grani nanga den mofo, ma den ati de farawe fu mi. 7 Na fu soso den e tan anbegi mi, bika den e poti den gwenti fu libisma leki wet gi trawan.’ 8 Unu no e gi yesi na den wet fu Gado, ma unu de nomonomo fu hori den gwenti fu libisma.”

9 A taigi den tu: „Unu sabi heri bun fa fu psa den wet fu Gado, soso fu kan tan hori den gwenti fu unu. 10 Fu eksempre, Moses ben taki: ’Lespeki yu p’pa nanga yu m’ma.’ A ben taki tu: ’A sma di e fluku* en p’pa noso m’ma musu dede.’ 11 Ma unu e taki: ’Efu wan sma e taigi en p’pa noso en m’ma: „Ala san mi abi fu ben kan yepi yu, na korban (dati na sani di wan sma ben pramisi fu gi Gado)”’, 12 dan unu e meki taki a sma dati no e du noti moro gi en p’pa noso en m’ma. 13 Na so unu e meki a wortu fu Gado lasi krakti, fu di unu e hori den gwenti di unu e leri sma. Unu e du wan lo fu den sortu sani disi.” 14 Baka dati a kari den sma kon baka na en èn a taigi den: „Un alamala musu arki mi èn un musu ferstan san mi e taki. 15 Nowan sani di de na dorosei fu wan sma èn di e psa go na ini en kan doti en. Ma na den sani di e kmoto na ini wan sma, na dati e doti en.” 16* ——

17 Baka di a gwe libi den sma, a go na ini wan oso. Ne den disipel fu en kon aksi en san na agersitori wani taki. 18 Dati meki a taigi den: „Unu srefi no e ferstan? Unu no sabi taki a no den sani di wan sma e nyan e doti en? 19 Disi de so fu di a no e go na ini en ati, ma a e go na ini en bere, dan a e kmoto baka èn a e doro na ini wan gotro.” Na a fasi disi a sori den taki ala n’nyan krin fu nyan. 20 A taki tu: „Na den sani di e kmoto na ini wan sma e doti en. 21 Bika takru prakseri e kmoto na insei fu wan sma, iya, na ini en ati. Den sani dati na hurulibi,* fufuru, kiri, 22 a waka di wan sma e waka gi en trowpatna, big’ai, ogridu, bedrigifasi, ogri di sma e du sondro fu syen,* dyarusu, den ogri di wan sma e taki fu trawan, heimemre, nanga den sani di wan sma e du sondro fu denki. 23 Ala den ogri sani disi e kmoto na insei fu wan sma èn den e doti wan sma.”

24 Baka dati a gwe fu drape èn a go na a kontren fu Tirus nanga Sidon. Dan a go na ini wan oso, ma a no ben wani meki sma sabi taki a de drape. Tòg sma si en. 25 Wan frow fu a kontren dati ben abi wan meisje di ben abi wan ogri yeye na en tapu. Di a yere taki Yesus kon drape a no draidrai, ma a kon na en èn a saka kindi na en futusei. 26 A frow ben de wan Grikisma di ben e libi na Siro-Fenisia.* A tan begi Yesus fu puru na ogri yeye na tapu en meisje. 27 Ma Yesus taigi a frow: „Den pkin fosi musu nyan teleki den bere furu. Bika a no bun fu teki a brede fu den pkin èn gi dati na den pkin dagu.” 28 Ma a frow piki en: „Yu abi leti Masra, ma tòg den pkin dagu na ondro a tafra e nyan den pkin pisi brede fu den pkin di e fadon na gron.” 29 Ne a taigi a frow: „Fu di yu taki disi, yu kan go na oso. Na ogri yeye kmoto kba na tapu yu meisje.” 30 Di a frow go na oso a si taki a yongu pkin ben e d’don na bedi èn taki na ogri yeye ben kmoto na en tapu.

31 Di Yesus ben e gwe fu a kontren fu Tirus, a psa na ini Sidon nanga a kontren fu Dekapolis* teleki a doro na a Se fu Galilea. 32 Drape den sma tyari wan man kon na en di ben dofu èn di no ben man taki bun. Ne den begi Yesus fu poti en anu tapu a man. 33 Yesus puru a man na mindri den sma, a tyari en go na seisei èn a poti en finga na ini a man yesi. Baka di a spiti, a fasi a man tongo. 34 Dan a luku go na hemel, a soktu hebi èn a taigi a man: „Efata”, san wani taki: „Kon opo.” 35 Ne den yesi fu a man opo, en tongo lusu èn a ben man taki bun. 36 Baka dati Yesus taigi den taki den no musu ferteri nowan sma san a du, ma o moro a ben e taigi den, o moro den ben e panya a tori. 37 Den sma ben ferwondru srefsrefi èn den ben taki: „Ala san a man disi e du, a e du bun. A e meki dofu sma srefi yere baka èn babaw sma taki baka.”