A brifi fu Yakobus

1 Disi na wan brifi fu Yakobus, wan srafu fu Gado èn fu Masra Yesus Krestes.

Mi e seni odi gi den 12 lo di panya na ala sei.

2 Mi brada, un musu prisiri srefsrefi te ala sortu tesi e miti unu, 3 bika unu sabi taki efu unu tan sori bribi awinsi unu kisi tesi, dan dati o yepi unu fu hordoro. 4 Efu unu tan hordoro te na a kba, dan unu o kon bun na ala fasi, unu o de sondro fowtu èn unu no o mankeri noti.

5 Fu dati ede, efu wan fu unu e mankeri koni, dan meki a tan aksi Gado fu dati. Bika te Gado e gi sma sani, a e du dati nanga en heri ati èn sondro fu krutu den.* Dus te unu e aksi Gado koni, dan a o gi unu dati. 6 Ma un musu tan aksi èn un musu bribi taki unu o kisi san unu aksi. Un no musu tweifri srefsrefi, bika a sma di e tweifri de leki wan skwala fu se di winti e wai go-kon. 7 Fu taki en krin, a sma dati no musu denki taki a o kisi wan sani fu Yehovah.* 8 So wan sma no sabi san a wani èn ala yuru a e kenki prakseri.

9 Meki a pôti brada prisiri* te a kisi grani. 10 Meki a gudu brada prisiri te a no abi wan hei posisi. Bika a o libi fu wan syatu pisi ten nomo neleki wan bromki fu a sabana. 11 Te a son e opo kon èn a e kon faya srefsrefi, a e drei den sani di e gro. Den bromki fu den e fadon èn a moi fu den e lasi gwe. Na so den guduman o lasi gwe tu te den e feti baka gudu.

12 A sma di e tan hordoro te tesi miti en o de koloku, bika te a psa a tesi, Yehovah* o gi en a libi* di a pramisi den sma di tan lobi en. 13 Te wan sma e kisi tesi, a no musu taki: „Na Gado e tesi mi”, bika nowan sma kan meki Gado du ogri èn Gado no e meki ogri psa nanga sma tu. 14 Ma ibri sma e kisi tesi fu di en eigi firi e hari en èn e kori en. 15 Efu a e tan kweki a firi, dan a o sondu èn te fu kba a sondu o tyari dede kon.

16 No kori unsrefi,* mi lobi brada. 17 Ibri bun kado di no e mankeri noti e kon fu hemel, fu a Papa di meki a son, a mun nanga den stari. Ala ten a de a srefi èn a no e kenki leki fa skaduw e kenki. 18 Gado ben meki wi kon sabi a tru leri fu di a ben wani gi unu nyun libi. Na so wi tron den fosi libisma di a gi a grani disi.

19 Mi lobi brada, no fergiti a sani disi: Ibri sma musu de gaw fu yere, ma a no musu de gaw fu taki èn a no musu de gaw fu kisi atibron. 20 Bika te wan sma ati bron, a e du sani di Gado no feni bun. 21 Fu dati ede, un musu tapu nanga a morsu libi fu unu èn nanga ala den ogri di unu e du.* Nanga sakafasi* un musu gi Gado wortu na okasi fu teki rutu na ini un ati, so taki unu kan kisi ferlusu.

22 Un musu tron sma di e du san a wortu fu Gado e taki. Efu unu e arki nomo, ma unu no e du, dan unu o kori unsrefi nanga denki di no bun. 23 Bika efu wan sma e yere a wortu fu Gado, ma a no e du san a e taki, dan a de leki wan sma di e luku en eigi fesi na ini wan spikri. 24 A e luku ensrefi, dan a e gwe èn a e fergiti san a si.* 25 Ma efu wan sma e luku finfini san skrifi na ini a wet di bun srefsrefi èn di e meki sma kon fri, dan a no o de wan sma di fergiti san a yere, ma a o de wan sma di e du san Gado wortu e taki. Te a e tan du dati, dan a o de wan koloku sma.

26 Efu wan sma denki taki a e anbegi Gado, ma a no e basi en tongo, dan a e kori ensrefi.* A sma disi e anbegi Gado fu soso. 27 A fasi fu anbegi di wi Gado nanga Papa e si leki wan sani di krin èn soifri, na disi: Wi musu yepi sma di de na nowtu, sma soleki den pkin di no abi p’pa noso m’ma, èn den uma di masra dede kba. Boiti dati, un no musu meki grontapu flaka unu.