Wan Openbaring gi Yohanes

15 Dan mi si ete wan prenspari sani* na hemel di ben meki mi ferwondru srefsrefi. Mi si seibi engel di ben abi seibi rampu. Den rampu disi na den lastiwan, bika te den kba, dan Gado ati no o bron moro.

2 Dan mi si wan sani di gersi wan se di meki fu grasi èn a ben moksi nanga faya. Den sma di wini na ogri meti, a popki di sma meki fu en, nanga en nen di de wan nomru, ben e tnapu na a grasi se èn den ben abi den harpu fu Gado. 3 Den e singi a singi fu Moses, a srafu fu Gado èn a singi fu a Pkin Skapu. Den singi:

„Yehovah* Gado, Almaktiwan, den sani di yu e du bigi èn den e ferwondru sma srefsrefi. Yu na Kownu fu têgo. Den sani di yu e du, na sani di reti èn di sma kan fertrow. 4 Yehovah,* suma no o abi bigi lespeki gi yu* èn suma no o gi yu nen glori? Bika yu w’wan e tan horbaka gi yu pipel! Iya, ala den pipel o kon na yu fesi fu anbegi yu, fu di den kon sabi taki yu e krutu sani na wan reti fasi.”

5 Baka dati mi si taki den opo a santa presi fu a tabernakel* na ini hemel. 6 Den seibi engel di ben abi den seibi rampu, kmoto na ini a santa presi. Den ben weri krin linnen krosi di ben e brenki èn den ben weri gowtu banti lontu den borsu. 7 Dan wan fu den fo kerub-engel* gi den seibi engel seibi gowtu komki di ben furu nanga na atibron fu Gado, a Gado di e libi fu ala ten, iya, fu têgo. 8 A glori nanga a krakti fu Gado ben meki a santa presi kon furu nanga smoko èn nowan sma ben man go na ini a santa presi, solanga den seibi rampu fu den seibi engel no ben kon na wan kba.