Numeri

30 Dan Moses taigi den edeman fu den lo fu Israel: „Disi na a komando fu Yehovah: 2 Efu wan man pramisi Yehovah wan sani, noso a sweri fu no du wan sani, dan a musu sorgu taki a du san a taki. Iya, a musu du ala san a taki.

3 Kon meki wi taki dati wan yongu uma e tan na en papa oso ete èn a pramisi Yehovah wan sani, noso a sweri fu no du wan sani. 4 Efu a papa yere taki a pramisi wan sani noso taki a sweri fu no du wan sani, ma a papa no e taki noti, dan na uma musu du ala san a pramisi noso sweri. 5 Ma efu en papa yere taki a pramisi wan sani noso taki a sweri fu no du wan sani, èn na a srefi dei a papa taigi en taki a no musu du san a pramisi noso sweri, dan na uma no musu du dati tu. Yehovah sa gi na uma pardon, fu di en papa no wani taki a du san a sweri noso pramisi.

6 Kon meki wi taki dati wan uma abi wan masra, èn a meki wan sweri, noso a pramisi wan sani sondro fu denki fosi. 7 Efu en masra yere taki a pramisi wan sani noso taki a sweri fu no du wan sani, ma a masra no e taki noti, dan na uma musu du ala san a pramisi noso sweri. 8 Ma efu a masra yere taki en uma meki wan sweri noso taki a pramisi wan sani sondro fu denki fosi, èn a e taigi na uma na a srefi dei taki a no musu du san a sweri noso pramisi, dan na uma no musu du dati tu. Yehovah sa gi na uma pardon.

9 Kon meki wi taki dati wan uma no abi masra moro, fu di en masra kon dede noso a broko trow. Efu so wan uma meki wan sweri, dan a musu du ala san a sweri.

10 Ma efu na ini en masra oso na uma meki wan sweri noso a pramisi fu no du wan sani, 11 èn en masra yere dati, ma a no taki noti èn a no tapu en uma fu du san a sweri, dan na uma musu du ala san a sweri noso pramisi. 12 Ma efu a masra yere taki en uma meki wan sweri noso taki a pramisi fu no du wan sani, èn a e taigi na uma na a srefi dei taki a no musu du san a sweri noso pramisi, dan na uma no musu du dati tu. Na en masra tapu en fu du san a sweri èn Yehovah sa gi na uma pardon. 13 Efu wan uma meki wan sweri, noso a pramisi fu no du wan sani, dan na en masra musu taki efu a kan du dati, noso efu a no musu du dati. 14 Ma efu wan pisi ten pasa èn a masra no taki noti fu a sweri noso a pramisi di na uma meki, dan a masra e agri taki na uma kan du ala san a sweri noso pramisi. Fu di a masra no taki noti na a dei di a yere san na uma du, meki a gi na uma primisi fu du san a sweri noso pramisi. 15 Efu a masra yere san na uma sweri noso pramisi èn bakaten a e taigi en taki a no musu du nowan fu den sani dati, dan na a masra o abi fu gi frantwortu fu a fowtu di na uma meki.”

16 Na Yehovah ben gi Moses den wèt disi di abi fu du nanga wan masra nanga en wefi, èn wan papa nanga en yongu umapikin di e tan na ini en oso ete.