Wan Openbaring gi Yohanes

12 Baka dati mi si wan prenspari sani* na hemel: wan uma ben weri a son leki krosi, a mun ben de ondro en futu èn a ben abi 12 stari na tapu en ede leki wan kroon. 2 Na uma ben de nanga bere. A ben e bari bika a ben abi furu pen èn a ben e pina srefsrefi fu di a ben de fu meki wan pkin.

3 Dan mi si wan tra sani* na hemel: Wan bigi kaiman di ben redi leki faya. A ben abi seibi ede nanga tin tutu èn seibi kroon* ben de na tapu den ede fu en. 4 En tere ben srepi a di fu dri pisi fu ala den stari puru na ini hemel èn a fringi den go na grontapu. A bigi kaiman ben tan tnapu na fesi na uma di ben de fu meki a pkin, fu di a ben wani swari a pkin te na uma ben o meki en.

5 Dan na uma kisi wan boi, wan manpkin, di o tiri ala pipel nanga wan isri tiki. Ne den tyari a pkin es’esi go na Gado èn na a kownusturu fu en. 6 Dan na uma lowe go na ini a sabana pe Gado ben sreka wan presi gi en. Drape den ben o gi en n’nyan 1260 dei langa.

7 Ne wan feti bigin na ini hemel: Mikael* nanga den engel fu en ben feti nanga a bigi kaiman èn a bigi kaiman nanga den engel fu en ben feti nanga den tu. 8 Ma den no wini a feti* èn presi no ben de gi den na ini hemel moro. 9 Dati meki den fringi a bigi kaiman go na grontapu. En na a fosi sneki, a wan di den e kari Didibri nanga Satan. A e kori sma na heri grontapu. Den fringi en go na grontapu èn den fringi den engel fu en go na grontapu makandra nanga en. 10 Ne mi yere wan tranga sten na ini hemel taki:

„Now a Gado fu wi o ferlusu sma! A sori a krakti fu en, a Kownukondre fu en seti kba èn a Krestes fu en bigin tiri kba. Bika den fringi a sma di e taki ogri fu wi brada go na ondro. A sma disi e taki lei fu den na fesi wi Gado dei nanga neti. 11 A brudu fu a Pkin Skapu èn a boskopu di den e ferteri sma, meki taki den wini a bigi kaiman. Den no ben frede fu lasi den libi* srefi. 12 Fu dati ede meki hemel nanga den sma di e libi drape prisiri! Ma bigi ogri o miti grontapu nanga a se, bika Didibri saka kon na unu èn a abi bigi atibron fu di a sabi taki en ten syatu.”

13 Di a bigi kaiman si taki den fringi en go na grontapu, a ben wani du ogri nanga na uma di ben meki a manpkin. 14 Ma na uma ben kisi tu frei di ben gersi den frei fu wan bigi aka, so taki a ben kan frei go na a sabana, na a presi di ben sreka gi en. Drape a kisi n’nyan wán pisi ten nanga tu pisi ten nanga wan afu pisi ten,* sondro taki a sneki ben kan si en.

15 Dan a sneki spiti watra leki wan liba puru na ini en mofo go na a sei fu na uma, so taki na uma ben kan dede na ini a watra. 16 Ma grontapu kon yepi na uma èn a gron priti opo, dan a swari a liba di a bigi kaiman ben spiti puru na ini en mofo. 17 Ne a bigi kaiman ati bron srefsrefi nanga na uma èn a go feti nanga den pkin fu na uma di ben tan abra. Na den e hori densrefi na den wet fu Gado èn na den kisi a wroko fu ferteri sma fu Yesus.