Gi den Filipisma

1 Mi, Paulus, de nanga Timoteyus èn wi de srafu fu Krestes Yesus. Mi e skrifi a brifi disi gi ala den santawan di de bakaman fu Krestes Yesus èn di de na Filipi, makandra nanga den brada di e teki fesi na ini a gemeente nanga den dinari ini a diniwroko.

2 Meki Gado wi P’pa nanga Masra Yesus Krestes sori unu bun-ati. Meki a freide fu den de nanga unu.

3 Ala ten te mi e prakseri unu mi e taki mi Gado tangi 4 na ini den fayafaya begi di mi e begi gi un alamala. Ibri leisi te mi e begi fayafaya gi unu mi e du dati nanga prisiri, 5 bika sensi a fosi dei di unu yere a bun nyunsu unu horbaka gi en teleki now. 6 Gado du wan bun wroko na un mindri. Mi de seiker taki a o go doro nanga a wroko dati teleki a dei fu Krestes Yesus doro. 7 Mi abi bun reide fu denki so fu un alamala, fu di mi lobi unu nanga mi heri ati. Gado sori unu bun-ati neleki fa a sori mi bun-ati aladi mi de na strafu. A sori mi bun-ati tu di mi opo taki gi a bun nyunsu èn di mi du ala san mi man fu meki lanti gi wi a reti fu preiki.

8 Gado sabi fa mi e angri fu si un alamala, fu di mi abi tranga lobi gi unu neleki Krestes Yesus. 9 Mi e tan begi taki unu kan sori lobi moro nanga moro. Ja, mi e begi taki unu kan kon sabi finfini san na den tru tori fu Gado èn taki unu kan ferstan krin san na a wani fu Gado. 10 Mi e begi tu taki unu kan kon sabi san na den moro prenspari sani. Na so sma no o man feni fowtu na un tapu èn unu no o meki trawan fadon teleki a dei fu Krestes doro. 11 Boiti dati, mi e begi taki Yesus Krestes yepi unu fu du san reti unu heri libi langa. Dan unu o man gi Gado glori èn unu o man prèise en.

12 Mi brada, mi wani fu unu sabi taki den sani di miti mi ben meki a bun nyunsu go na fesi. 13 Na so ala den waktiman fu Grankownu* nanga ala tra sma kon sabi taki mi de na strafu fu di mi na wan bakaman fu Krestes. 14 We, fu di mi de na strafu meki furu brada di e dini Masra kisi moro krakti nanga dek’ati fu taki fu a wortu fu Gado sondro frede.

15 A tru taki son sma e preiki fu Krestes fu di den e dyarusu èn fu di den lobi strei. Ma trawan e preiki nanga wan krin ati. 16 Den e du dati fu di den abi lobi. Den sabi taki Gado poti mi fu opo taki gi a bun nyunsu. 17 Ma den trawan e preiki fu di den lobi meki trobi. Den no e preiki nanga wan krin ati, bika den wani meki mi kisi problema na straf’oso. 18 San na a bakapisi? A wan-enkri bakapisi na taki sma e preiki fu Krestes na ala sortu fasi. Awinsi den e du en na wan hoigri fasi noso nanga wan krin ati, tòg a sani disi e gi mi prisiri. Fu taki en leti, mi o tan de nanga prisiri tu, 19 bika mi sabi taki disi o meki mi kisi ferlusu fu di unu e begi fayafaya gi mi èn fu di Yesus Krestes e horbaka gi mi nanga a yeye fu en. 20 Mi e howpu èn e ferwakti nanga mi heri ati taki mi no o kisi syen kwetkweti. Ma fu di mi e taki sondro fu frede, meki Krestes e kisi glori now, soleki fa dati ben e psa ala ten kba. Iya, mi o gi en glori awinsi mi e libi noso awinsi mi dede.

21 Sobun, efu mi e libi, dan mi e libi gi Krestes èn efu mi dede, dan mi wini. 22 We, efu mi musu tan na libi, dan mi o man du moro gi Krestes. Tòg mi no o taki sortwan fu den tu mi wani. 23 A tranga gi mi fu taki sortwan fu den tu sani disi mi wani, bika mi e angri fu kon fri fu kan de nanga Krestes. Mi de seiker taki dati bun moro ala tra sani. 24 Ma a moro bun taki mi tan na libi fu unu ede. 25 Fu di mi e ferstan disi heri bun, meki mi sabi taki mi o tan na libi èn taki mi o de nanga un alamala fu kan yepi unu fu go na fesi èn fu meki unu prisiri fu di unu abi bribi. 26 Na so unu di de bakaman fu Krestes Yesus kan de nanga bigi prisiri te mi de baka nanga unu.

27 Ma tyari unsrefi nomo na wan fasi* di fiti a bun nyunsu fu Krestes. Dan te mi kon mi o si unu, noso awinsi mi no kon, mi o yere taki unu e tnapu kánkan, taki unu abi wán denki èn taki unu e feti sei na sei gi a bribi di unu kon abi di unu yere a bun nyunsu. 28 Awinsi san den feanti fu unu e du, unu no musu frede. Ala den sani disi e sori taki den o kisi pori, ma taki unu o kisi ferlusu. Na Gado tyari disi kon na krin. 29 Bika unu kisi a grani fu no bribi nomo na ini Krestes, ma fu pina tu fu en ede. 30 Unu e feti a srefi feti di mi e feti èn now unu yere taki mi e feti a feti disi te now ete.